އެމްޑީޕީން އެންމެ ފުރަތަމަ ވެރިކަމަށް އައީ ވެސް މި ވަޢުދު ހިފައިގެންނެވެ. އެހެންނަމަވެސް މާގިނަ މަސައްކަތްތަކެއް ނުކުރެވި އުޅެނިކޮށް ދައުރު މެދުތެރެއިން ރައީސުލްޖިމްޖޫރިއްޔާ ބަދަލުވުމުގެ ސަބަބުން އެ ޕާޓީގެ ވަޢުދުނާމާ ވެސް ބަދަލުވެގެން ދިޔައެވެ. ދެން ފެނުނީ ކުރީގެ ރައީސް އަބްދުﷲ ޔާމީން އަބްދުލްޤައްޔޫމުގެ ވެރިކަމެވެ. މަސްތުވާތަކެތީގެ ވިޔަފާރި ރާއްޖޭގައި އިންތިހާއަށް ތިޔާގިވެ، އެމީހުންގެ ނުފޫޒާއި ބާރުވެރިކަން އިންތިހާ ގަދަވިއެވެ. އެހެންކަމުން އެވެރިކަން ނިމިގެން ދިޔައިރުވެސް މަސްތުވާތަކެތީގެ މައްސަލަތައް ހައްލުކުރުމަށް އެޅި ހަރުދަނާ ފިޔަވަޅެއް ނެތެވެ. ކުރި ޚާއްސަ މަސައްކަތެއް ނެތެވެ.
ރައީސް އިބްރާހީމް މުހައްމަދު ސޯލިހުގެ ރިޔާސީ އިންތިހާބުގެ ކެމްޕޭނުގައި ދެއްކި ވާހަކައިގައި މަސްތުވާތަކެތީގެ މައްސަލައަށް އެކަށީގެންވާ ހައްލެއް ގެންނަވާނެ ކަމަށް ތަކުރާރުކޮށް ވިދާޅުވަމުން ގެންދެވިއެވެ. އެމަނިކުފާނުގެ ވެރިކަން ވެސް ދެބައި ވަނީއެވެ. ގިނަ މަސްތުވާތަކެތި އަތުލައިގެންފިއެވެ. އެހެންނަމަވެސް ފަރުދާގެ ފުރަގަހުގައި ފޮރުވިފައި އަތްތަކެއްގެ ނުފޫޒުން އަދިވެސް ދުވަނީ ނާކާމިޔާބުގެ ވަހެވެ. ބައެއް ފަހަރު މަސްތުވާތަކެތީގެ ވިޔަފާރިއާއި ބޭނުންކުރުމުގެ މައްސަލަތަކެކޭ ޖާދޫއެއް ނުވަތަ ސިހުރެކޭ ހީވާ ފަހަރުވެސް ދެއެވެ.
ބައެއް ފަހަރު ކްރައިމް ސީން އިން ގޯސް ހަދައެވެ. ހައްޔަރު ކުރާ ގޮތް ގޯސް ވެދާނެ އެވެ. ތަހުގީގުގައި މުހިއްމު އެތައް ކަމެއް އަތްދަށުން ގޮސްދާނެ އެވެ. ދައުވާކުރަން ފޮނުވުމުން ބައެއް ފަހަރު ކޮންމެވެސް އެޒުރެއް މެދުވެރިވެގެން ދައުވާ ނުކުރެވި ދުވަސް ފާއިތުވެދެއެވެ. ނޫނީ ކޯޓަށް ހުށަހެޅުމުން އިދާރީ ކަންކަމުގައި ވެސް މައްސަލަ ކޯޓުން ބޭރުކޮށްލައެވެ. ހަގީގަތަކީ ރާއްޖޭގެ ޖިނާއީ އަދުލުގެ ނިޒާމު ބައްޓަންވެފައި އޮތްގޮތުން، ފައިސާއިން ކަމުގެ ހަގީގަތް ފަސްއަޅާ ފޮރުވާލެވެއެވެ. ފައިލް ބަންދުކުރެވެއެވެ. ބޭނުންވާ ގޮތަށް ހުކުމް ކުރެވެއެވެ. ބައެއް ފަހަރު ދައުލަތުގެ ވަކީލުން ވެސް ގޯސް ހަދާތަން ފެނިގެންދަނީކީ މަދެއްކޮށް ނޫނެވެ.
މަސްތުވާތަކެތީގެ ބޮޑުން މައްސަލަތަކަށް ނުފޫޒު ވަންނަނީ ހަމައެކަނި ދިވެހިންގެ ކިބައިން އެކަންޏެއްނޫނެވެ. އެމީހުންނާ ރާއްޖޭން ބޭރުން ގުޅިފައިވާ ބޮޑެތި ނެޓްވޯކު ތަކުގެ އެޖެންޓުން ރާއްޖެ އައިސް، ބައެއް މައްސަލަތަކުގެ ވަކީލުންގެ ފީތައް ހަމަޖެއްސުމާއި "އެހެނިހެން" އިންތިޒާމުތަކަށް ބޮޑެތި އަދަދުތަކުން ފައިސާ ހޭދަކޮށްފައިވެއެވެ. އެގޮތުން ރާއްޖެ އައިސްފައިވަނީ ދުބާއީ އާއި ލަންކާ އަދި އިންޑިޔާގެ އިތުރުން ޕާކިސްތާނާއި ޗައިނާ އަދި ތައިލެންޑުގެ ނެޓްވޯކުތަކާ ގުޅިފައިވާ ބައެއް ފަރާތްތަކެވެ.
އޭގެ ބައެއް މީހުން ރާއްޖެ އައިސްފައިވަނީ އިންވެސްޓަރުންގެ ގޮތުގައެވެ. އަނެއް ބަޔަކު ތިބީ ލަގްޒަރީ ރިސޯޓްތަކުގައެވެ. ހުރިހާ "ޑީލެ" ހަދަނީ ރިސޯޓުތަކުގެ ޕްރައިވެޓް ކޮޓަރީގައެވެ. ރަސްމީ އޮފީސްތަކުގެ މޭޒުދޮށުގައެވެ.
ފުލުހުން އަތުލާ އަދަދު ގިނަވި ނަމަވެސް، ހަގީގީ މައްސަލައަށް ލުޔެއް ނުދެއެވެ. ފުލުހުންގެ ތަހުގީގޫ ކުރިފަޅައިގެން މުޅި ނެޓްވޯކާ ހަމައަށް އަތެއް ނުދެއެވެ. އަބަދުވެސް އަތުލަނީ ނުވަތަ އަތުލެވެނީ މަދުބައެކެވެ. އެއީ ފާޅުގައި އެތަކެތީގައި އަތްލާ މީހުންނެވެ. އެއްތަނުން އަނެއް ތަނަށް ގެންދާ މީހުންނެވެ. ކަމުގެ އަޑީގައި ތިބި ހުދު ގިރުވާންލީ މީހުންނާ ހަމައަކަށް ވާސިލެއް ނުވެވެއެވެ. ފުލުހުންގެ ތަހުގީގު އެފުނަށް ނުފީނާނަމަ، ދައުވާ ކުރާ މީހުންނަށް ވެސް ކުރެވޭނެ ކަމެއް ނޯންނާނެއެވެ.
އަދި ދައުވާކުރާ ގިނަ މައްސަލަތައް ދަށުކޯޓު މަރުހަލާގައި ސާބިތުނުވާ ކަމަށް ނިމިގެން ދިއުމަކީވެސް، މަސްތުވާތަކެތީގެ ވިޔަފާރީގައި އުޅޭ މީހުންނަށް ލިބޭ ބޮޑު ހިތްވަރެކެވެ.
އެހެންކަމުން މަސްތުވާތަކެތީގެ ބޮޑެތި މައްސަލަތައް ހައްލުކުރުމަށް ރާއްޖޭގެ ޖިނާއީ އަދުލުގެ ވެށި އަދި ވަރަށް ބީރައްޓެއްސެވެ. އެކަމަށް ކުރަން ޖެހޭ މަސައްކަތް އަހަރުތަކަށް ދެމިގެންދާނެއެވެ.
