ގއ. ދެއްވަދޫ އިން ގިނަ ބަޔަކު ކޮވިޑް19 އަށް ފައްސިވެ އެތަކެއް ގެތަކެއް ކަރަންޓީނުކުރެވި މުޅިރަށް ލޮކްޑައުންއަކަށް ދާންޖެހުމާ ގުޅިގެން ދެއްވަދޫ ރައްޔިތުންނަށް ކުރިމަތިވެފައިވާ މި ދަތިއުނދަގޫ ވަގުތުގައި އެރައްޔިތުންނަށް އެހީތެރިވުމުގެ ގޮތުން އެއަތޮޅު ގެމަނަފުއްޓަށް ނިޞްބަތްވާ "އުފާ" ދޯނިން ދެއްވަދޫ ރައްޔިތުންނަށް ކަނޑުމަސް ހަދިޔާކޮށްފިއެވެ.
"ގެމަނަފުށީ އުފާ ދޯނިން ދެއްވަދޫ ރައްޔިތުންނަށް ހަދިޔާކުރި ކަނޑުމަސް ދެއްވަދޫ ކައުންސިލްގެ ބޭފުޅުންނާއި މޯލްޑިވްސް ޕޮލިސް ސާރވިސަސްގެ ބޭފުންޅުންނާ ޙަވާލުކޮށްފި""ޒުވާން މަސްވެރިޔާ" ފޭސްބުކް ޕޭޖުގައި މީގެ ކުޑައިރުކޮޅެއް ކުރިން ފޮޓޯއާއެކު ހިއްސާކޮށް، ބުނެފައިވެއެވެ.
މީގެ ދެދުވަހެއް ކުރިން މީޑިއާތަކުން ފެނިގެން ދިޔައީ ދެއްވަދޫއިން ބޯފެނާއި ކަނޑުމަސް ހުއްސްވެއްޖެ ޚަބަރެވެ. އެހެންނަމަސް ޖެހިގެން އައި ދުވަހުގައި އިއްޔެ ފެނިގެން ދިޔައީ، ދެއްވަދޫއަށް ފެން ފޯރުކޮށްދިނުމަށް ހުވަދުއަތޮޅުގެ ރަށްތަކުގެ ރައްޔިތުން ކުރަމުން އައި މަސައްކަތްތަކުގެ ތެރެއިން ނެގިފައިވާ، ހިތަށް ފިނިކަން ގެނެސްދޭ ފޮޓޯތަކެވެ.
މިއަދު ފެނިގެން މިދިއައީ، ކަނޑުން އަރައިގެން ދޯނިފަހަރު އައިސް މަސްކިރާލާފައި ބާސްކެޓުތައް ގަތްފަރާތުގެ ޕިކަޕަށް އޮއްސާލާގޮތަށް، ދެއްވަދޫ ރައްޔިތުންނަށްޓަކައި މަސްތައް ހަދިޔާކުރި މަންޒަރެވެ.
ރަށުން ކޮވިޑް19 އަށް ފައްސިވީ މީހުންގެ ޢަދަދު 30 އަށްވުރެ މައްޗަށް އަރާފައި ވާއިރުއާއި ބައްޔަށް ފައްސިވެފައިވާ ފަރާތްތަކުގެ ތެރޭގައި އެއް ޢާއިލާއަކުން މަންމައާއި ބައްޕަގެ އިތުރުން ދަރިންވެސް ހިމެނި، ރަށުގެ މީހުން ދިރިއުޅޭ 147 ގޭބިސީގެ ތެރެއިން 56 ގޭބިސީއަކަށްވެސް ބަލީގެ ހިރާސް އޮތްހިނދު، ދެއްވަދޫގެ ރައްޔިތުންނަށް މިހިނދު ދިމާވެފައިވާ ކެކުޅުމުގެ އިޙްސާސް މުޅި ހުވަދު އޮތަޅުގެ އެންމެހައި ރައްޔިތުންގެ ހިތްތަކުގެ އެންމެ ފުންމިނަށްވެސް ވާޞިލުވެފައި ވާކަމީ ދެއްވަދޫ ރައްޔިތުންގެ ހިތްތަކަށް ލިބިގެންދާނެ ތަސައްލީއެއްކަން ކަށަވަރެވެ.
އިރުވަރު ޓީމްގެ ދުޢާއަކީ ދެއްވަދޫގެ ލޮބްވެތި ރައްޔިތުންނަށް މިހިނދު ކުރިމަތިވެފައިވާ ދަތިއުނދަގޫ އަދި ނުތަނަވަސް ޙާލަތުން އެރައްޔިތުން އަވަސްގޮތެއްގައި މިންޖުވެގެން ދިއުމެވެ. އަދި ކޮވިޑް19 ގެ ނުރައްކާތެރިކަމުން އެރަށުގެ ކުދިބޮޑު އެންމެހައި ރައްޔިތުންނަށް ސަލާމަތްތެރިކަމާއި ރައްކާތެރިކަން މާތް ﷲ މިންވަރުކޮށްދެއްވުމެވެ. އަދިހަމަ މުޅި ރާއްޖޭގެ އެންމެހައި ރައްޔިތުންނަށްވެސް، މިބަލިން ރައްކާތެރިކަން ކަށަވަރުވެގެން ދިއުމެވެ.
اللَّهُمَّ إِنا نعُوذُ بِكَ مِنَ الْبَرَصِ، وَالْجُنُونِ، وَالْجُذَامِ، وَمِنْ سَيِّئِ الأَسْقَامِ….. އާމީން…
