މީސް މީޑިއާގެ މަޝްހޫރު މެސެޖިންގ ޕްލެޓް ފޯމެއްކަމުގައިވާ "ވަޓްސްއެޕް" އިން އެކުންފުނީގެ ޕްރައިވެސީ ޕޮލިސީއަށް ގެނައި ބަދަލާ ގުޅިގެން މިލިއަނުން މިލިއަނުން މީހުން ވަޓްސްއެޕް ދޫކޮށްދާން ފަށާފައި ވަނިކޮށް އައު ޕޮލިސީ ތަންފީޒުކުރުން އެކުންފުނިން ފަސްކޮށްފިއެވެ.
ޖެނުއަރީ ހަތްވަނަ ދުވަހު އެކުންފުނިން މީގެ ކުރިން ނިންމައި ޢާންމުކޮށްފައިވާ ގޮތުގައި، ވަޓްސްއެޕްގެ ޒާތީ މައުލޫމާތު ހިއްސާކުރުމާބެހޭ އުޞޫލަށް ގެނެވުނު އައު ބަދަލަށް އެއްބަސް ނުވާނަމަ ފެބްރުއަރީ 8 ވަނަ ދުވަހުން ފެށިގެން އެ އެޕްލިކޭޝަން ބޭނުންނުކުރެވޭނެއެވެ.
އެހެންނަމަވެސް އެކުންފުނިން ކަނޑައަޅާފައިވާ 8 ފެބްރުއަރީގެ މިމުއްދަތު މިހާރުވަނީ މުއްދަތެއް ނެތްގޮތަށް ފަސްކޮށްފައެވެ.
ވަޓްސްއެޕްގެ އައު ޕޮލިސީއަށް ގެނައި ބަދަލާ ގުޅިގެން އެ އެޕްލިކޭޝަން ބޭނުންކުރަމުން ގެންދާ މީހުން ވަޓްސްއެޕް ދޫކޮށް، ވާދަވެރި ޓެލެގްރާމް އަށާއި ސިނގްނަލް އަށް ބަދަލުވަމުން ގެންދެއެވެ.
ރައްކާތެރިކަމުގެ ގޮތުން ޢާންމުންގެ ހިތްތަކުގައި ރަސްކަން ކުރަމުން އައި ވަޓްސްއެޕް ގެ ޕޮލިސީއަށް ބަދަލުގެނައުމާ ގުޅިގެން ޓެލްގްރާމް ބޭނުންކުރަމުން ގެންދާ މީހުންގެ ޢަދަދު އިންތިހާއަށް ބާރަށް މިދުވަސްކޮޅު އިތުރުވާން ފަށާފައިވެއެވެ. ޓެލްގްރާމް ބޭނުންކުރަމުން ގެންދާ މީހުންގެ ޢަދަދު ފާއިތުވެދިޔަ ހަފްތާގައި 500 މިލިއަނަށް އަރާފައި ވާއިރު، 72 ގަޑިއިރުގެ ތެރޭގައި އެކަނިމެ 25 މިލިއަނަށްވުރެ ގިނަ މީހުން އަލަށް ޓެލްގްރާމް ބޭނުންކުރަށް ފަށާފައިވެއެވެ.
ވަޓްސްއެޕް ބޭނުންކުރާ ފަރާތްތަކުން އެބަދަލަށް އެއްބަސްވުމަށް މަޖުބޫރުކޮށްގެން ވަޓްސްއެޕް އިން ޕްރައިވެސީ ޕޮލިސީ އަށް ގެނައި ބަދަލުތަކުގެ ދަށުން، އެޕްލިކޭޝަން ބޭނުންކުރަމުންދާ ފަރާތްތަކުގެ ޒާތީ މުހިންމު އަދި ޙައްސާސް މައުލޫމާތުތަކެއް ފޭސްބުކް އާ ޙިއްސާކުރާނެއެވެ. ފޯނު ނަމްބަރާއި ލޮކޭޝަނާއި ބްރޯސިންގ ހިސްޓްރީއާއި ފޯނުގެ މޮޑެލްގެ އިތުރުން ވިޔަފާރި ހިސްޓްރީ ފަދަ މައުލޫމާތުތައްވެސް މެއެވެ.
ވަޓްސްއެޕް އާ ވާދަވެރި ޓެލްގްރާމް އިން ދާދިފަހުން ވަނީ ވަޓްސްއެޕް އަށް ޖޯކުޖަހައި ވީޑިއޯއެއްވެސް ޢާންމުކޮށްފައެވެ. ވަޓްސްއެޕް ގެ ޕޮލިސީއަށް ގެނެވުނު ބަދަލު ދައްކުވަދައިދޭ މެސެޖެއް ސަންދޯކެއްގެ ކުރީގައި ޖަހައިގެން ނަށަމުން ވަޅުލަން ގެންދެވޭ ތަން ދައުކުވައިދޭ ވީޑިއޯއެއް މެއެވެ.
— Telegram Messenger (@telegram) January 10, 2021
