ކޮވިޑް-19 އިން ރައްކާތެރިވުމަށްޓަކައި ބޭނުންވާ ވެކްސިން ގިނަ ދުވަހެއް ނުވެ ރާއްޖެއަށް ލިބޭނެކަމުގެ ބަސް ރައީސުލްޖުމްހޫރިއްޔާ ވިދާޅުވުމުން ރައްޔިތުންނަށް ލިބުނީ ހިތްހަމަ ޖެހުމެވެ.
އިންޑިޔާއިން ރާއްޖެއަށް ހަދިޔާކުރި އެއްލައްކަ ޑޯޒުގެ ކޮވިޑް ވެކްސިން ލިބުމުގެ މުނާސަބަތުގައި ޤައުމާ މުހާތަބުކުރައްވައި ރައީސް އިބްރާހީމް މުޙައްމަދު ސާލިހު ވަނީ އިންޑިޔާގެ ބޮޑު ވަޒީރަށާއި ރައްޔިތުންނަށް އިހްލާސްތެރި ޝުކުރު އަދާކުރައްވާފައެވެ.
އިންޑިޔާއިން ރާއްޖެއަށް ހިލޭ އެހީ ގޮތުގައި ފޯރުކޮށްދިން ވެކްސިންގެ ސަލާމަތާއި ރައްކާތެރިކަމާ ގުޅުވައިގެން ރާއްޖޭގެ ސިޔާސީ ވާދަވެރި ފަރާތްތަކުން ގެންދަނީ ތަފާތު ވާހަކަތައް ދައްކަމުންނެވެ.
އެކަމާ ގުޅިގެން ސަރުކާރުގެ ނަސޭހަތަކީ ނާޒުކު މި ދަނޑިވަޅުގައި، ވެކްސިނާ ބެހޭ ގޮތުން ސާބިތު ނުހިފޭ ވާހަކަ ނުދެއްކުމަށާއި ރައްޔިތުންގެ ހިތްތަކުގައި ބިރުވެރިކަމާއި ނުތަނަވަސްކަން އުފެދޭ ވާހަކަތަކާ ދުރުވުމަށެވެ.
ހެލްތު ޕްރޮޓެކްޝަން އޮތޯރިޓީއިން ކަށަވަރު ކޮށްދެއްވާ ގޮތުގައި ވެކްސިން ދުނިޔޭގެ ސިއްހަތު ޖަމިއްޔާގެ މިންގަނޑުތަކަށް ފެތެއެވެ. އަދި ވެކްސިން ދެމުންދާއިރު ވެސް އޭގެ ސައިޑް އިފެކްޓްތައް ދިރާސާކޮށް ބަލަމުން ގެންދާނެ ކަމަށެވެ.
އިންޑިޔާއިން ހިލޭ ފޯރުކޮށްދިން ވެކްސިންގެ ޝިޕްމެންޓާ ހަވާލުވުމުގެ ރަސްމިއްޔާތުގައި ވާހަކަ ދައްކަވަމުން ދިވެހި ޚާރިޖީ ވަޒީރު އަބްދުﷲ ޝާހިދު ވިދާޅުވީ، ކޮޑިވް ވެކްސިން ހޯދުމުގެ މަސައްކަތް އެމަނިކުފާނާ ހަވާލުކުރެއްވި ހިސާބުން ފެށިގެން، އެންމެ ބޮޑު އިސްކަމެއް ދެއްވީ ވީ އެންމެ އަވަހަކަށް ދިވެހިންނަށް ވެކްސިން ލިބޭނެ އިންތިޒާމު ހަމަޖެއްސެވުމަށް ކަމަށެވެ. އަދި ބޭރުގެ އެކި ފަރާތްތަކާއެކު ކުރެވުނު މުޢާމަލާތްތަކުގެ ނަތީޖާއެއްގެ ގޮތުން ދިވެހިންނަށް ބޭނުންވާ ވެކްސިން ކަށަވަރުވުމަކީ ވަރަށް ބޮޑު ހިތްހަމަޖެހުމެއް އަދި ކާމިޔާބެއް ކަމަށްވެސް ޝާހިދު ވިދާޅުވިއެވެ.
އެމަނިކުފާނުގެ ވާހަކަފުޅުގައިވެސް އިންޑިޔާއަށް ޚާއްސަ ޝުކުރެއް އަދާކުރެއްވިއެވެ. އަދި އަވަށްޓެރި ގައުމުތަކުގެ ތެރެއިން އިންޑިޔާގެ ވެކްސިން ފޯރުކޮށްދިން ފުރަތަމަ ގައުމަށް ރާއްޖެވުމަކީ ދެގައުމުގެ ދެމެދުގައިވާ ވަރުގަދަ ގުޅުން ރަމްޒުކޮށްދިން ކަމެކެވެ.
އިންޑިއާ ސަރުކާރުން ރާއްޖެއަށް ހަދިޔާ ކުރީ އިނގިރޭސިވިލާތުގެ އޮކްސްފޯޑް ޔުނިވާސިޓީ އާއި އެކްސްޓްރާޒެނެކާ ވެކްސިންގެ އެއް ލައްކަ ޑޯޒެވެ. ރާއްޖެއަށް ހަދިޔާ ކުރާ ވެކްސިން އިންޑިއާއިން ތައްޔާރު ކޮށްފައި ވަނީ ކޮވިޑް-19 ބައްޔަށް މިހާރު އުފައްދާފައިވާ ވެކްސިންތަކުގެ ތެރެއިން، އޮކްސްފޯޑް – އެސްޓްރާޒެނެކާ ވެކްސިނާ ގުޅިގެން ތައްޔާރުކުރި ދިރާސާގެ އަލީގަ އެވެ.
އަހަރަކު 1.5 ބިލިއަން ވެކްސިން ޑޯޒް އުފެއްދުމުގެ ގާބިލުކަން ހުރި އިންޑިއާގެ ސީރަމް އިންސްޓިޓިއުޓަކީ ދުނިޔޭގެ އެންމެ ގިނައިން ވެކްސިން އުފައްދާ މަރުކަޒެވެ. ރެކޯޑުތަކުން ދައްކާގޮތުގައި ދުނިޔޭގެ 170 ގައުމެއްގައި ދިރިއުޅޭ ކުދިންގެ ތެރެއިން 65 ޕަސަންޓަށް ދޭ ވެކްސިން އުފައްދަނީ ސީރަމް އިންސްޓިޓިއުޓުންނެވެ.
އިންޑިޔާގެކޮވިޑްވެކްސިންހޯދުމަށްދުނިޔޭގެބޮޑެތިގައުމުތަކުންވެސްވަނީއޯޑަރުކަށަވަރުކޮށްފައެވެ.
