ރައްޔިތުންގެ މަޖިލީހުގައި އިހުތިޖާޖުކުރުމަކީ ބަރުލަމާނީ ކަލަންޑަރުގައި އެކި ގޮތްގޮތަށް ލިޔެވިފައިވާ ހަގީގަތެކެވެ. މިކަންކަން ބޮޑަށް ހިނގާފައިވަނީ ފަރުދީ ގޮތުންނަށްވުރެ ބޮޑަށް ޕާޓީތަކުގެ ގޮތުގައި ނުވަތަ ވަކި ފިކުރަކަށް ތާޢީދުކުރާ ޖުމްލަ ވިސްނުމެއް ރަމްޒުކޮށްދިނުމުގެ ގޮތުންނެވެ.
ރައީސް ޔާމީނުގެ ވެރިކަމުގައި އެމަނިކުފާނު ރިޔާސީ ބަޔާން އިއްވާ ކޮންމެ ފަހަރަކު އެމްޑީޕީން ވަނީ ވަރުގަދަ އިހްތިޖާޖުތަކެއް ކޮށްފައެވެ. ޑރ. މުހައްމަދު ވަހީދު ހަސަން މަނިކުގެ ސުވާލު އުފެދިފައިވާ ވެރިކަމުގެ ދުވަސްވަރު ވެސް އެމްޑީޕީން ރައްޔިތުންގެ މަޖިލީހުގައި ހަރުކަށިކަން ދެއްކިއެވެ. އެއީ ސިޔާސީ ވެށީގެ ހަގީގަތެވެ.
މިހާރު އިބްރާހީމް މުހައްމަދު ސޯލިހުގެ ވެރިކަމުގައި ވެސް އިދިކޮޅު ފަރާތްތަކުން ވަނީ މަޖިލީހުގައާއި މަޖިލީހުން ބޭރުގައި އިހްތިޖާޖުކޮށް އަޑުއުފުލާފައެވެ. މައިގަނޑު ގޮވާލުމަކީ "ރައީސް ޔާމީން މިނިވަންކުރޭ"އެވެ. އެހެންނަމަވެސް މަޖިލީހުގެ ތަޅުމުގައި އިދިކޮޅުން އަޑުގަދަކޮށް، ޝުއޫރުފާޅުކުރުމުގެ ބަދަލުގައި ފޮތިގަނޑުތަކާއި ބޯޑުތަކުގައި ލިޔެފައިވާ ލިއުންތަކުގެ ޒަރީއާއިން އެމީހުންގެ ސިޔާސީ ކަންބޮޑުވުންތައް ހާމަކުރިއެވެ. ރައީސް ސޯލިހު އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެމަންޒަރުތައް ގާތުން ބެއްލެވިއެވެ. ކަންބޮޑުވުންތަކުގެ އަޑުއެއްސެވިއެވެ.
ރިޔާސީ ބަޔާން އިއްވެވުމަށް ރައީސް ސޯލިހު ވަޑައިގަތުމާއެކު، ވަކި ފަރުދެއްގެ ނަފުރަތާއި ރުޅިވެރިކަމާއި ޖަދަލުކުރުމުގެ ޖަޒުބާތުން ފުރިފައިވާ ބަސްތަކުން އަޑުގަދަކުރައްވަން ފެއްޓެވިއެވެ؛ އެއީ ކާށިދޫ ދާއިރާގެ އިއްޒަތްތެރި މެންބަރު އަބްދުﷲ ޖާބިރު(ފޮޓޯ)އެވެ.
ޖާބިރުގެ ހަޑިހުތުރު ބަސްތަކުގެ ސަބަބުން މަޖިލީހުގެ ބައެއް މެންބަރުންނަށް އިސްދަށަށް ޖަހާލެވުނެވެ. ރިޔާސަތުގައި އިންނެވި ރައީސް މުހައްމަދު ނަޝީދުގެ މޫނުފުޅުން ފާޅުވީ ހިތްޕުޅު ހަމަޖެހިވަޑައިނުގަތުމާއި ކަންބޮޑުވުމުގެ އަސަރެވެ.
ޖާބިރު އިހްތިތާޖު ކުރައްވާނެކަން، އެމްޑީޕީގެ ޕީޖީ ގްރޫޕުގެ ވައިބަރ ގްރޫޕުގައި ރައީސް ނަޝީދު އޭގެ ކުރީ ދުވަހު ލިޔުއްވައި މެންބަރުންގެ ސަމާލުކަމަށް ގެންނަވާފައިވެއެވެ.
"އަހަރުމެނަށް ކުރިން އޮތީ އެކަން އެނގިފަ. އެކަމަކު އެހާ ހަޑިހުތުރު ބަސްތަކުން ހަޅޭއްލަވާ ހަދާނެ ކަމަށް ގަބޫލެއް ނުކުރަން. ޖާބިރު ވަރަށް ދަށު ދަރަޖައަކަށް ވެއްޓިގެން އެދިޔައީ. ވަރަށް ލަދުގަތް ކަމެއް އެއީ،" ރައްޔިތުންގެ މަޖިލީހުގެ އެމްޑީޕީ މެންބަރަކު ވިދާޅުވިއެވެ.
މީޑިޔާގައި ޖާބިރު ވިދާޅުވެފައިވަނީ ރައީސް ޔާމީންގެ ވެރިކަމާ ދެކޮޅަށް އެމްޑީޕީ އާއި ގުޅިފައިވާ އިއްތިހާދުން ކެމްޕޭންކުރުމުގައި އޭނާގެ އަމިއްލަ ފައިސާ އެމްޑީޕީގެ ލީޑަރޝިޕުން ބޭނުން ކުރުމަށް ފަހު، ވެރިކަން ލިބުމުން ބާކީ ކޮށްލެއްވުމަކީ ބަލައިގަނެވޭނެ ކަމެއް ނޫން ކަމަށެވެ.
އެއްވެރިކަމުން އަނެއް ވެރިކަމަށް ފުރޮޅިގެންދާ ކޮންމެ ފަހަރަކު ގިނަ ބަޔަކު ފައިސާގެ ގޮތުންނާއި އެނޫންވެސް ގޮތްގޮތުން އިދިކޮޅު ސިޔާސީ ފަރާތްތަކަށް ވިޔަފާރިވެރިންނާއި ވޮލަންޓިއަރުންގެ ފަރާތުން އެހީތެރިކަން ފޯރުކޮށްދެއެވެ.
"ސިޔާސީ މީހުންނަކީ އެގޮތަށް ކަލަގޮވާ ބަޔަކަށް ވެއްޖެނަމަ ބޮޑެތި ހަމަނުޖެހުންތަކާއި އޮޅުންބޮޅުންތަކާއި ނަފްރަތާއި ރުޅިވެރިކަން އުފެދިގެންދާނެ. ފައިސާ ޚަރަދުކުރީ ހިތުން ރުހުމުން، އޭރު އޮތް ނުރައްކާތެރި ހާލަތުން އަރައިގަތުމަށްޓަކައި. ކުއްލިއަކަށް ޖާބިރު "ޖާބިރު ބޭނުންވާ ހުރިހާ ކަމެއް ނުވުމަކީ މުޅި މަޖިލީހުގެ ކަރާމާތާއި ރައީސުލްޖުމްހޫރިއްޔާގެ އަބުރުފުޅަށް ހުތުރުވާ ގޮތަށް ހަޑިހުތުރު ބަހުން ޖަޒުބާތުގައި ވާހަކަ ދެއްކުމެއް ނޫން ދެއްތޯ. ކިތައް މީހުންތޯ ތިބީ އެމީހުން އުންމީދުކުރި ގޮތަށް ކަންކަން ނުދާތީ މާޔޫސްވެފަ. އެކަމަކު އެމީހުން ވެސް ކެތްތެރިވެގެން އެތިބެނީ ސިޔާސީ ވެށީގެ އެނބުރޭ އޮއިވަރުގެ ހަގީގަތް ގަބޫލުކޮށްގެން. ވަޅެއް ނުތެޅޭނެ، ތެޅޭނީ ދާނި." ރައްޔިތުންގެ މަޖިލީހުގެ ރައީސްކަން ކުރިން ކުރެއްވި ބޭފުޅަކު ވިދާޅުވިއެވެ.
ރިޔާސީ ބަޔާން ނިމުމުން މަޖިލީހުގެ ރައީސް ސައިކޮޓަރިއަށް ވަޑައިގެން ޖާބިރުގެ އެ އަމަލާމެދު ހިތްޕުޅު ހަމަޖެހިވަޑައިނުގަންނަވާކަން ގިނަ މެންބަރުންގެ ހާޒިރުގައި ހާމަކުރެއްވިއެވެ.
ޖާބިރުގެ އެ އަމަލުގެ ސަބަބުން އޭނާ އެ އެދޭ ސިޔާސީ މަންފާ ލިބިދާނެ ހެއްޔެވެ؟ ބަލަން ތިބެމާ ހިނގާށެވެ.
