މިއަހަރު 1.5 މިލިޔަން ފަތުރުވެރިން ރާއްޖެ އަންނާނެކަމަށް ބެލެވޭކަމަށް ޓޫރިޒަމް މިނިސްޓަރު ޑރ. އަބްދުﷲ މަޢުސޫމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މަރަދޫ ދާއިރާގެ މެމްބަރު އިބްރާހިމް ޝަރީފް ކުރެއްވި ސުވާލަކަށް ޖަވާބުދެއްވަމުން ޓޫރިޒަމް މިނިސްޓަރު ޑރ.އަބްދުﷲ މައުސޫމް ވިދާޅުވީ، ރައްޔިތުންގެ މަޖިލީހުން މިއަހަރުގެ ބަޖެޓް އެކުލަވާލިއިރު މިއަހަރު ރާއްޖެއަށް އަންނާނެކަމަށް ލަފާކޮށްފައިވަނީ 1 މިލިޔަން ފަތުރުވެރިން ކަމަށާއި ނަމަވެސް އެ އަދަދު ރިވިއުކޮށް މިއަހަރު ރާއްޖެއަށް އަންނާނެކަމަށް ލަފާ ކުރެވޭ ފަތުރުވެރިންގެ އަދަދު 1.5 މިލިޔަނަށް އަރާފައިވާކަމަށެވެ. ސަބަބެއް ކަމަށް މިނިސްޓަރު ވިދާޅުވީ، ހީކުރި ވަރަށް ވުރެ އަވަހަށް ރާއްޖެއަށް ކޮވިޑް ވެކްސިން ލިބި އޭގެ ބޭނުން ހިފަން ފެށުމެވެ.
މިނިސްޓަރު ވިދާޅުވީ، މިދިޔަ އަހަރުގެ ޖެނުއަރީ މަހާ އަޅާބަލާއިރު މިއަހަރު ޖެނުއަރީ މަހު ރާއްޖެ އައި ފަތުރުވެރިންގެ އަދަދު 47 ޕަސެންޓް ދަށްވެފައިވާކަމަށާއި ސަބަބަކީ ޔޫރަޕާއި ޗައިނާގެ މާކެޓް ބަންދުވެފައިވުން ކަމަށެވެ. އަދި ޗައިނާއާއި ކޮރެއާއިން ފަތުރުވެރިން އަންނަން ފެށުމުން މިއަދަދު ރާސްލާފައި އިތުރުވެގެން ދާނެކަމަށް މިނިސްޓަރު ވިދާޅުވިއެވެ.
މިނިސްޓަރު މައުސޫމް ވިދާޅުވީ، މިއަހަރު ފަތުރުވެރިން ގުނުމުގައި ބޮޑަށް ބައްލަވާނީ "ބެޑް ނައިޓްސް" އަށް ކަމަށާއި އެއީ އާމްދަނީ ބިނާވެފައިވަނީ ފަތުރުވެރިން ރާއްޖޭގައި ހޭދަކުރާ ވަގުތަށް ކަމަށެވެ. މިގޮތުން މިއަހަރު ބެޑް ނައިޓްސް 10 މިލިޔަނަށް އަރާނެކަމަށް ލަފާކުރެވޭކަމަށް މިނިސްޓަރު ވިދާޅުވިއެވެ.
