އެއްފަހަރާ ގިނަ ރަށްތަކެއްގައި ފެނާއި ނަރުދަމާގެ މަސައްކަތް އެޅުމަށް ނިންމައި، އެ މަސައްކަތްތައް ކޮށްދޭނެ ފަރާތްތައް ހޯދުމަށް އަންނަ އާދިއްތަ ދުވަހު ބީލަން ހުޅުވާލުމަށް ސަރުކާރުން ނިންމައިފިއެވެ.
ފިނޭންސް މިނިސްޓްރީން ބުނި ގޮތުގައި އާދިއްތަ ދުވަހު ވާދަވެރި ބީލަމަށް ހުޅުވާލަނީ 25 ރަށެއްގެ ފެނާއި ނަރުދަމާ އެޅުމުގެ މަސައްކަތްތަކެވެ. އޭގެ ތެރޭގައި ކޮންޓެރެކްޓަރުން އަމިއްލައަށް ޑިޒައިންކޮށްގެން މަސައްކަތްކުރިއަށް ގެންދަން ޖެހޭ 11 ރަށެއް ވެސް ހިމެނެއެވެ.
ފެނާއި ނަރުދަނާ އެޅުމަށް އާދިއްތަ ދުވަހު ބީލަން ހުޅުވާލާ ރަށްތަކަކީ ތ. ދިޔަމިގިލި، ތ. މަޑިފުށި، ވ.ކެޔޮދޫ، ވ. ރަކީދޫ، ގއ. ދެއްވަދޫ، ގއ. ނިލަންދޫ، ގދ. ނަޑެއްލާ، ކ. ތުލުސްދޫ އާއި ނ. މިލަދޫ، ނ. ލަންދޫ، ނ. މަގޫދޫ، ށ.ބިލެތްފަހި، ށ. ނޫމަރާ، ބ. ކުޑަރިކިލު، ބ. ދޮންފަނު، ބ. ކިހާދޫ، ބ. ފުޅަދޫ، ބ. ފެހެންދޫގެ އިތުރުން ކ. ހިންމަފުށްޓާއި އދ. ދިއްދޫ، އދ. އޮމަދޫ، މ. ނާލާފުށި، މ. ރަތްމަންދޫ، ލ. ހިތަދޫ އަދި ލ. ކުނަހަންދޫ އެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދާދި ފަހުން ވިދާޅުވެފައިވާ ގޮތުގައި ރާއްޖޭގެ ހުރިހާ ރަށެއްގައި ފެނާއި ނަރުދަމާ ނިޒާމުގެ ޢަމަލީ މަސައްކަތް، މިއަހަރު ނިމުމުގެ ކުރިން ފެށޭނެ އެވެ.
