ކޮވިޑް-19 އިން ދިފާޢުވުމަށް އުފައްދާފައިވާ ވެކްސިންގެ 170 މިލިއަން ޑޯޒް މީހުންނަށް ދީފައިވާއިރު ފެންނަން އޮތީ އުފާވެރި މަންޒަރެކެވެ. ސޯޝަލް މީޑިޔާގައި ވެކްސިނާ ދެކޮޅަށް ފާޅުކުރަމުން ގެންދިޔަ ބިރުވެރި ދޮގު ވާހަކަތަކުގެ ސަބަބުން އެތައް ބައެއްގެ ހިތްތައް ކިލަނބުވެގެން ދިޔަ ނަމަވެސް، ވެކްސިން ޖެހި މީހުންގެ ކިބައިން މިހާތަނަށް މާބޮޑު ސައިޑް އިފެކްޓެއް ފެނިފައެއް ނުވެއެވެ. ދުނިޔޭގެ ސިއްހަތު ޖަމިއްޔާއިން އެކަން ތަކުރާރުކޮށް ގެންދަނީ ހާމަކުރަމުންނެވެ.
ބައެއް މީހުން ބަނޑުހައިވެ ހުރެ ވެކްސިން ޖެހުމުން، ބޮލަށް އެނބުރުން އަރާގޮތް މެދުވެރިވިއެވެ. ލޭމައްޗަށް ދިއުމާއި ކޮލެސްޓްރޯލް ފަދަ ބަލިތަކަށް ބޭސްކަމުން އަންނަ ބައެއް މީހުންނަށް ވެކްސިން ދިނުމުން، ހުން އައިސް ހީކަރުވާ ގޮތް މެދުވެރިވިއެވެ.
އިންޑިޔާގެ ހަތް މިލިއަން މީހުންނަށް ވެކްސިން ޖަހާފައިވާއިރު، ރާއްޖޭގައި ޖަހަމުންގެންދާ އޮކްސްފޯޑު ވެކްސިން ދިން މީހުންގެ ކިބައިން މާބޮޑު ސައިޑް އިފެކްޓެއް ނުފެނެއެވެ.
ދުނިޔޭގެ ހުރިހާ ގައުމުތަކެއްގެ ސިއްޚީ ޚިދުމަތްތެރިން ރައްޔިތުންނަށް ކުރާ އިލްތިމާސަކީ އިންޓަނެޓުން ފެންނަ މެސެޖްތަކަށް ތަބާނުވެ، ދިފާއަށް ވެކްސިން ޖެހުމަށެވެ. ރައްކާތެރިކަން އޮތީ އޭރުންނެވެ. އަދި ވެކްސިންގެ ދެ ޑޯޒް ހަމަކުރުމަށް ވެސް އެމީހުން އިންތިހާއަށް ބާރުއަޅައެވެ.
