އަންނަ މަހުން ފެށިގެން ހއ. ދިއްދޫގެ ފްލެޓްތަކަށް ފައިސާ ދެއްކުމަށް ކައުންސިލުން ކުއްލި ގޮތަކަށް އިއުލާންކުރުމުން، ފްލެޓް ލިބުނު ފަރާތްތަކުން ނުރުހުމާއެކު ކަންބޮޑުވުން ފާޅުކުރަން ފަށައިފިއެވެ.
ދިއްދޫ ކައުންސިލުން ބުނީ އެގޮތަށް އިއުލާންކުރީ، ފްލެޓްތަކުން ކުލި ނަގަން ފެށުމަށް ޕްލޭނިން މިނިސްޓްރީން އެކައުންސިލަށް އަންގަވާފައިވާތީ ކަމަށެވެ.
ދިއްދޫ ރައްޔިތުންގެ އަޑުގެ ނަމުގައި ހިންގާ ފޭސްބުކް ޕޭޖުގައި އާންމުކޮށްފައިވާ ބަޔާނެއްގައިވާ ގޮތުގައި ޕްލޭނިންގ މިނިސްޓްރީން މި ކަމަށް އެދި ކައުންސިލަށް ސިޓީއެއް ފޮނުވުމުން، އެ ސިޓީ އޮތް ގޮތަށް ކުއްލިއަކަށް އިޢުލާންކުރެއްވުން ގޯހެވެ. އެއީ، ކައުންސިލަކީ އެ ރަށެއްގެ ރައްޔިތުންގެ ކަންކަން އެންމެ ރަނގަޅަށް އެނގޭނެ ފަރާތުގެ ހައިސިއްޔަތުން، މި ކަމުގައި ރައްޔިތުންނާއި ކަމާ ބެހޭ ފަރާތްތަކާ މަޝްވަރާކުރެވެން ވާނެ ކަމަށާއި ވަކިން ޚާއްޞަކޮށް މަޖިލިސް މެމްބަރާއި، އަތޮޅު ކައުންސިލާއި، ފްލެޓްތަކުގެ ވެރި ފަރާތްތަކާއެކު މިކަން ޙިއްޞާކޮށްލެވެން ވާނެ ކަމަށް އެ ބަޔާނުގައި ބުނެފައިވެއެވެ. އެފަދަ އެއްވެސް ކަމެއް ކައުންސިލުން ނުކޮށް ތިބެ، ފްލެޓް ކުލި ދެއްކުމަށް އިއުލާން ކުރުމުން އެކަން ހަރުކަށި އިބާރާތުން ކުށްވެރިކޮށްފައިވެއެވެ.
"…މި ފަދަ ކުއްލި ކަމެއްގެ ސަބަބު ރައްޔިތުންނަށް ދިމާވެދާނެ ދަތިތަކަކާ ބެހޭ ގޮތުން ޕްލޭނިންގ މިނިސްޓްރީއާ މަޝްވަރާކޮށް މި ކަމުގައި ލުއި ގޮތްތަކެއް ނުވަތަ ފައިސާ ދެއްކެވެން ތިއްބެވި ބޭފުޅުން ފައިސާ ދެއްކެވިދާނެ ކަމާއި އެހެން ބޭފުޅުންނަށް އިތުރު ތިން ހަތަރު މުއްދަތެއް ވެސް ހޯއްދެވިދާނެއެވެ. އަދި މި ނޫން ވެސް ކިތަންމެ ފޯމިއުލާއެއް ނެރެވިދާނެއެވެ." ދިއްދޫ ރައްޔިތުންގެ އަޑުގެ ނަމުގައި ނެރެފައިވާ ބަޔާނުގައިވެއެވެ. "ވީމާ، ދިއްދޫގެ ފްލެޓްތަކަށް ފައިސާ ދެއްކެވުމުގައި އަދިވެސް ލުއި ގޮތްތަކެއް ކަމާ ބެހޭ ފަރާތްތަކާއެކު މަޝްވަރާކުރައްވައިގެން ހޯއްދެވުމަށް އަޅުގަނޑުމެން ދިއްދޫ ކައުންސިލަށް ގޮވާލަމެވެ. އަދި މިއަދު ނެރުއްވި އިޢުލާނާއި އެ އިޢުލާން ނެރުމުގައި އިންތިޒާމީ ގޮތެއްގައި ދިއްދޫ ކައުންސިލުން ވެވަޑައިގެންނެވި އިހުމާލު އެންމެ ހަރުކަށި ޢިބާރާތުން ކުށްވެރިކުރަމެވެ."
