ދިއްދޫ އޮތް ތަނުގެ ގޮތުން ދިއްދުއަަށް ތަރައްޤީ އައުމަކީ މުޅި ހއ އަތޮޅަށް މުހިންމު ކަމެއް ކަމުގައި އެމްޑީޕީގެ ފަރާތުން ހއ ދިއްދޫ ކައުންސިލްގެ ރައީސް ކަމަށް ވާދަކުރައްވާ ޢަބްދުﷲ ސިރާޖް ވިދާޅުވެއްޖެއެވެ.
އެމްޑީޕީގެ ފަރާތުން ކައުންސިލްގެ އިންތިޚާބުގައި ވާދަކުރާ ހއ އަތޮޅުގެ ކެންޑިޑޭޓުންނާއެކު ރައީސުލްޖުމްހޫރިއްޔާ އިބްރާހީމް މުޙައްމަދު ޞޯލިހް އަދި ރައްޔިތުންގެ މަަޖިލީހުގެ ރައީސް، ރައީސް މުޙައްމަދު ނަޝީދު ރޭ ބޭއްވެވި ބައްދަލުވުމުގައި ވާހަކަ ދައްކަވަމުން ސިރާޖް ވިދާޅުވީ ދިއްދުއަށް އަންނަ ތަރައްޤީގެ ފައިދާ ހަމައެކަނި ކުރަނީ ދިއްދޫގެ ރައްޔިތުންނަށް ނޫން ކަމާއި، އޭގެ ފައިދާ މުޅި އަތޮޅަށް ކުރާނެ ކަމަށެވެ. އަދި އެ ގޮތުން ދިއްދޫގައި ހުންނަ ހއ އަތޮޅު ހޮސްޕިޓަލްގައި މި ސަރުކާރުން އެތައް އާ ޚިދުމަތްތަކެއް ފެށުމުން އޭގެ ފަސޭހަކަން މުޅި އަތޮޅުގެ ރައްޔިތުންނަށް ކުރަމުންދާ ކަމަށް އޭނަ ވިދާޅުވިއެވެ.
މި ބައްދަލުވުމުގައި 2021 ވަނަ އަހަރުގެ ދައުލަތުގެ ބަޖެޓްގައި ދިއްދޫގައި ހިންގެވުމަށް ކަނޑައަޅުއްވާފައިވާ ތަރައްޤީގެ މަޝްރޫޢުތައް ދިއްދޫގައި އަވަހަށް ފެށުމުގެ މުހިންމުކަމުގެ މައްޗަަަަށް ވެސް އޭނާ ވަނީ އަލިއަޅުވާލައްވާފައެވެ. އެ ގޮތުން ދިއްދޫގެ ޓަރޝަރީ ހޮސްޕިޓަލް ޢިމާރާތްކުރުމާއި، ޖޫނިއަރ ކޮލެޖް އަދި ފުޓްބޯޅަ ދަނޑާއި ބިން ހިއްކުން ޚާއްޞަކޮށް ފާހަގަކުރެއްވިއެވެ. މީގެ އިތުރުން ބޯހިޔާވަހިކަމުގެ މަޝްރޫޢެއް ދިއްދޫގައި ހިންގުމާއި، މަސްވެރިންނަށް އައިސް ޕްލާންޓެއް ޤާއިމްކުރުމާއި، ޒުވާނުންގެ މަރުކަޒުގެ އިންޑޯ ކުޅިވަރުތައް ކުޅެވޭނެ އިންތިޒާމާއި ޖިމްގެ ޚިދުމަތް ފެށުމުގެ މުހިންމު ކަމަށް ވެސް އަލިއަޅުވާލެއްވިއެވެ.
ސިރާޖްގެ ވާހަކަފުޅަށް ރައީސުލްޖުމްހޫރިއްޔާ ވަނީ ޖަވާބު ދެއްވާފައެވެ. އެ ގޮތުން ހއ އަތޮޅު ހޮސްޕިޓަލްގެ މަސައްކަތް މާރޗް މަހު އަލުން އިޢުލާންކުރެވޭނެކަމާއި، ޕަބްލިކް ޕްރައިވެޓް ޕާޓްނަރޝިޕްގެ އުސޫލުން ދިއްދޫގެ ޖޫނިއަރ ކޮލެޖް ޢިމާރާތްކުރެވޭނެކަމަށް އެ މަނިކުފާނު ވަނީ ވިދާޅުވެފައެވެ. ހަމައެއާއެކު ދިއްދޫގެ ބިން ހިއްކުމުގެ ޑިޒައިން މަސައްކަތް ނިމުމާއެކު، އެ މަސައްކަތް އިޢުލާންކުރެވޭނެކަމާއި އޭގެ ފަހުން ބޯހިޔާވަހިކަމުގެ މަޝްރޫޢެއް ހިންގަވާނެ ކަމަށް ވެސް ވިދާޅުވިއެވެ.
މީގެ އިތުރުން ދިއްދޫގައި ކުނިކޮށްޓެއް ޤާއިމްކުރައްވާނެ ކަމަށާއި، ސަޢޫދީ ފަންޑްގެ އެހީގައި އައިސް ޕްލާންޓެއް ޤާއިމްކުރެވޭނެކަމަަަށް ވެސް ވިދާޅުވިއެވެ. ދިއްދޫގެ މަގުތައް ހެދުމުގެ ކޮންސަލްޓެންސީ މަސައްކަތް މިހާރު ހިނގަމުންދާކަމާއި، އޭގެ ޢަމަލީ މަސައްކަތް ވެސް މިއަހަރު ފެށިގެންދާނެ ކަމަށާއި، ދިއްދޫގެ ފުޓްބޯޅަ ދަނޑުގެ ސިޑިބަރިއާއި ލައިޓްގެ މަސައްކަތް ވެސް ފެށިގެންދާނެ ކަމަށް ހާމަކުރައްވާފައިވެއެވެ. އަދި ދިއްދޫގެ ފްލެޓްތަކަށް ފައިސާ ދެއްކުމަށް މިހާރު ކުރެވިފައިވާ އިޢުލާނާ ގުޅިގެން ރައްޔިތުން އެދޭ ގޮތަށް ފައިސާ ދެއްކުމުގެ ކަންކަން ހަމަޖެހިފައިވާ އުސޫލުގެ ތެރެއިން ފަސްކޮށްދެއްވަން މަސައްކަތްކުރައްވާނެ ކަމުގައި ވަނީ ވިދާޅުވެފައެވެ.
