މ. މުލަކުގައި ކުރިއަށްދާ މުންނި ކަޕް 2021 ފުޓްސަލް މުބާރާތުގައި އިއްޔަ ކުޅުނު މެޗްތައް ފަޅޯ ގޭންގާއި އުރީދޫއިން ކާމިޔާބުކޮށްފިއެވެ.
އިއްޔެ ކުޅުނު ފުރަތަމަ މެޗް ފަޅޯ ގޭންގުން ކާމިޔާބު ކުރީ އަފިނިޓީ ޔުނައިޓެޑް 3-1 ލަނޑު ބަލިކޮށްގެންނެވެ. މިމެޗްގައި ފަޅޯ ގޭންގްގެ ތިން ލަަނޑުވެސް ޖަހައި ދިނީ މި މެޗްގައި މޮޅު ކުޅުމެއް ދައްކާ މެޗްގެ މޮޅު ކުޅުންތެރިޔާގެ މަޤާމް ހޯދި އަލީ މުހައްމަދެވެ. އަފިނިޓީގެ ހަމައެކަނި ގޯލް ކާމިޔާބުކޮށްދިނީ ޝިޔާޒް އަލީ އެވެ.
އިއްޔެ ކުޅުނު ދެވަނަ މެޗްގައި ފޯރބިޑަން ސިޓީއާއި އުރީދޫ ބައްދަލުކުރި މެޗް 3-1 ކާމިޔާބުކުރީ އުރީދޫއެވެ. މިމެޗްގައި އުރީދޫގެ ގޯލްތައް ޖަހައިދިނީ ހުސައިން އާތިފާއި، މުހައްމަދު ފަޒީލްގެ އިތުރުން އަބްދުﷲ ޖަމީލެވެ. ފޯރބިޑަން ސިޓީގެ ހަމައެކަނި ގޯލް ޖަހައިދިނީ އަލީ މުސްތަފާއެވެ. މިމެޗްގެ މޮޅު ކުޅުންތެރިޔަކަށް ހޮވުނީ އުރީދޫގެ 2 ވަނަ ގޯލް ޖަހައިދިން މުޙައްމަދު ފަޒީލެވެ.
މުބާރާތުގައި މިއަދުވެސް ފޯރިގަދަ 2 މެޗް ކުޅޭނެއެވެ. މިއަދުގެ ފުރަތަމަ މެޗްގައި ބައްދަލުކުރާނީ އެފްސީ މަންތާއާއި މިސްޔޫ ސްޕޯޓްސްއެވެ. ދެވަަނަ މެޗްގައި ބައްދަލުކުރާނީ ދޫނި އެފްސީއާއި ކީސް ކަންމައްޗެވެ.
މި މުބާރާތަކީ މުލަކު އަތޮޅު ކައުންސިލްގެ ނާއިބްރައީސް އަހުމަދު ހަސަން (މުންނި)ގެ އިސްނެންގެވުމުގެ މަތިން މުލަކު ޒުވާނުންނަށް ޚާއްޞަކޮށްގެން ރަށު ފެންވަރުގައި ބާއްވާ އެންމެ ފޯރިގަދަ ފުޓްސަލް މުބާރާތެވެ. މިއީ މި މުބާރާތް ބާއްވާ ތިން ވަނަ އަހަރެވެ. މިފަހަރުގެ މުބާރާތުގައި ޖުމްލަ 9 ޓީމު ބައިވެރިވެފައި ވެއެވެ.
މި މުބާރާތުގެ މަޤްސަދަކީ ރަށުގެ ޒުވާނުންގެ މެދުގައި އޮންނަ ގުޅުން ހަރުދަނާކޮށް ކުޅިވަރުގެ މައިދާނުގައި ޒުވާނުންނަށް އޮތް ފުރުސަތުތައް އިތުރުކޮށް ހުނަރުވެރި ފުޓްސަލް ޒުވާނުން އުފައްދައި ގައުމީ ފެންވަރުގައި އެ ކުޅުންތެރިންގެ ހުނަރު ދައްކާލުމުގެ ފުރުސަތު ފަހިކޮށްދިނުން ކަމަށް މުބާރާތް އިންތިޒާމްކުރާ ފަރާތުން ބުނެއެވެ. ފާއިތުވި ދެއަހަރު ބޭއްވި މުބާރާތުން މުބާރާތުގެ މަޤްޞަދު ވަރަށް ރަނގަޅަށް ހާޞިލްވެފައިވާކަމަށް މުބާރާތުގެ އިންތިޒާމް ކޮމެޓީން ބުނެއެވެ.
