ރާއްޖޭގެ ދެކުނުގެ މަސްވެރިކަން ރަނގަޅުވެ ގިނަ އަދަދަކަށް މަސް ބާނަން ފަށައިފިއެވެ.
އިއްޔެ އެކަނި މިފްކޯއަށް 539 ޓަނު މަސް ލިބިފައިވާއިރު މިއީ މިފަހުން އެންމެ ގިނައިން މަސް ލިބުނު ދުވަސް ކަމަށް މިފްކޯއިން ބުނެއެވެ. މިއީ95 ދޯނިން ބޭނި މަހެވެ. ގިނަ އަދަދަކަށް މަސް ލިބުމުގެ ސަބަބުން ކޫއްޑޫަގައި ފްރީޒިން ކެޕޭސިޓީ ފުލް ވުމާއި ގުޅިގެން 25 ދޯނީގެ މަސް މިއަދު ކިރާ ގޮތަށް ހަމަޖައްސާފައިވާކަމަށް ކޫއްޑޫއިން ބުނެއެވެ.
ކޫއްޑޫގެ އެސިސްޓެންޓް ރީޖިނަލް މެނޭޖަރު މުސްތަފާ ޖަމީލް ވިދާޅުވީ، ހުކުރުދުވަހަކީ މިފްކޯއަށް އާންމުކޮށް މަސް ގަންނަ ދުވަހެއް ނޫންކަމަށާއި ނަމަވެސް ކިޔުގައި ތިބި ދޯނިފަހަރުގެ މަސް މިއަދު ގަންނާނެކަމަށެވެ. މިގޮތުން މިއަދު ހެނދުނު 8 ގެ ފަހުން މަސް ކިރަމުންދާކަމަށް މުސްތަފާ ވިދާޅުވިއެވެ. އިއްޔެ މަސް ބޭނި ދޯނިފަހަރުގެ ތެރެއިން މަސް ނުކިރި ހުރި 25 ދޯނީގައި 210 ޓަނުގެ ގޮދާ އެބަހުރި ކަމަށް މުސްތަފާ ވިދާޅުވިއެވެ. މުސްތަފާ ވިދާޅުވީ، މަސް ކިރަން ކިޔުގަ ޖެހޭ ދޯނިފަހަރަކަށް ކޫއްޑޫން ހިލޭ އައިސް ފޯރުކޮށްދެމުންދާކަމަށެވެ.
ރާއްޖޭގެ މަސްވެރިކަން ރަނގަޅުވާ ދުވަސްވަރު މަސް ކިރުމުގައި ދަތިތަކެއް ދިމާވަމުން އާދެއެވެ. މިދިޔަ އަހަރުގެ ފަހުކޮޅު ރާއްޖޭގެ އުތުރުގައި މަސްވެރިކަން ރަނގަޅުވެ މަސް ކިރުމުގައި ބޮޑެތި ދަތިތަކެއް ކުރިމަތިވިއެވެ. މަސް ކިރަން އެތައް ދުވަހަކު ނަމްބަރު ނަގައިގެން ކިޔުގައި ތިބެން ޖެހުނެވެ. މިކަމާ ގުޅިގެން އުތުރުގެ މަސްވެރިން މުޒާހަރާވެސް ކުރިއެވެ.
