އަންނަ އެޕްރީލް މަހު 10 ގައި ބާއްވަން ހަމަޖެހިފައި ވާ ލޯކަލް ކައުންސިލް ތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ވޯޓުލާން މިހާރު ރަޖިސްޓްރީ ވެފައިވާ ތަން ނޫން އެހެން ތަނަކަށް ވޯޓު ލާ ނަމަ އަވަހަށް ރީ-ރަޖިސްޓާ ވާން އިލެކްޝަން ކޮމިޝަނުން އިލްތިމާސް ކޮށްފިއެވެ.
އެކޮމިޝަންގެ ރައީސް، އަހްމަދު ޝަރީފް ކުރެއްވި ޓްވީޓެއްގައި ވަނީ، ވޯޓުލާތަން ބަދަލު ކުރަން ރީ-ރަޖިސްޓާ ކުރަން އެންމެ ފަހު ވަގުތަށް މަޑު ނުކުރުމަށް އިލްތިމާސް ކުރައްވާ ކަމަށެވެ.
Voter reregistration emme fahu vaguthah madu nukurahvaa, mifaharu inthikhaab ge schedule thah varah tight pic.twitter.com/VKwcebsqaw
— Ahmed Shareef (@ShareefRangondi) March 3, 2021
ރީ ރަޖިސްޓްރޭޝަނުގެ ފުރުސަތު ހުޅުވާލާފައި ވަނީ މިމަހު 2 ވަނަ ދުވަހުން މިމަހު 11 ވަނަ ދުވަހުގެ ނިޔަލަށެވެ. ޝަރީފް ޓްވިޓާގައި ހިއްސާ ކުރެއްވި ތަފާސް ހިސާބުތަކުން ދައްކާ ގޮތުގައި މިމަހު 3 ވަނަ ދުވަހުގެ ނިޔަލަށް ރީ-ރަޖިސްޓާ ވާން ފޯމު ހުށަހަޅާފައި ވަނީ އެންމެ 110 މީހެކެވެ. އެއީ ދެވަނަ ދުވަހު ފޯމު ހުށަހެޅި 9 މީހަކާއި 3 ވަނަ ދުވަހު ފޯމު ހުށަހެޅި 101 މީހެކެވެ.
މިހާރު ވޯޓުލުމަށް ރަޖިސްޓާ ވެފައިވާ ތަނުގެ މައުލޫމާތު އީސީގެ ވެބްސައިޓުން ބެލޭނެއެވެ. އަދި އެސްއެމްއެސް މެދުވެރިކޮށް ވެސް ބެލޭނެއެވެ. އެގޮތުން VR ޖެހުމަށް ފަހު ހުސްތަންކޮޅެއް ދޫކޮށްލުމަށް ފަހު އައިޑީކާޑު ނަންބަރު ޖަހާ، 1414 އަށް ފޮނުވުމުން ވޯޓުލުމަށް ރަޖިސްޓާ ވެފައި ވާ ތަނުގެ މައުލޫމާތު އެނގޭނެއެވެ.
