މާލެ ސަރަހައްދުގައި ހަވީރު 6:00 އިން ފެށިގެން ހެނދުނު 6:00 އަށް އެއްގަމު އުޅަނދު ދުއްވުން މަނާކޮށް އެންގި އެންގުން ހެލްތު ޕްރޮޓެކްޝަން އެޖެންސީން ބާތިލުކޮށްފި އެވެ.
ޑިރެކްޓަރު ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކުރައްވައި ރޭ ނެރުނު އިއުލާނެއްގައި ވަނީ މާލެ ސަރަހައްދުގައި ހަވީރު 6:00 އިން ފެށިގެން ހެނދުނު 6:00 އަށް، އެއްގަމު އުޅަނދުފަހަރު ދުއްވުން މަނާކޮށް އަންގާފައިވާ އެންގުން މިހިނދުން ފެށިގެން ބާތިލުކޮށްފައިވާ ކަމަށެވެ. މީގެ އިތުރުން ޕާކްތަކާއި މައިޒާންތައް ބަންދު ކުރުމަށް ނިންމި ނިންމުންވެސް ރޭ ވަނީ ބާތިލުކޮށްފައެވެ. އެއްގަމު އުޅަނދު ދުއްވުމަށް ހުއްދަ ދިން ނަމަވެސް ކާފިއު ވަގުތަށް ބަދަލު ގެނެސްފައެއް ނުވެއެވެ. މާލެ ސަރަހައްދުގައި ރޭގަނޑު 11:00 އިން ފަތިހު 4:30 އަށް އަންނަނީ ކާފިއު ހިންގަމުންނެވެ.
ބައެއް ކަންތައްތަކަށް ލުއި ދިން ނަމަވެސް ބައެއް ފިޔަވަޅުތައް ވަނީ އިތުރު ހަތް ދުވަހަށް ދަމަހައްޓާފައެވެ. އެ ފިޔަވަޅުތަކަކީ ފަސް މީހުންނަށްވުރެ ގިނައިން މީހުން އެއްވެ ނޫޅުމާއި ސްކޫލްތަކާއި ކޮލެޖްތައް ބަންދުކޮށް އޮންލައިންކޮށް ކިޔަވައިދިނުމާއި ދުވާ ޓްރެކްތަކާއި ސިނަމާތައް ބަންދުކުރުމާއި އެކަނި ކުރާ ކަސްރަތުތައް ފިޔަވައި ކުޅިވަރު އަދި ކަސްރަތު ހަރަކާތްތައް ހުއްޓާލުމެވެ. ރާއްޖޭގައި ފުޓްބޯޅަ ސީޒަން ހުއްޓާލާފައި އޮތުމުގެ ސަބަބުން އެފްއޭއެމާއި ކްލަބްތަކުން އަންނަނީ ކަންބޮޑުވުން ފާޅުކުރަމުންނެވެ.
