ދޫނިދޫ ކަސްޓޯޑިއަލް ޖަލުތަކުގައި ބަންދުކޮށްފައިތިބި ޤައިދީންގެ ތެރޭން، ޝަރީޢަތުން ގޮތެއް ނިމެންދެން ރިމާންޑް ޖަލުތަކުގައި ބަންދުކުރުމަށްޓަކައި އަމުރު ނެރެފައިވާ ޤައިދީންނާއި، މޯލްޑިވްސް ކަރެކްޝަނަލް ސަރވިސަސް އިން އަދިވެސް ޙަވާލުވެފައިނުވާތީ، އެކަމާ ނުރުހުން ފާޅުކޮށް ބަނޑު ހައި ހޫނުކަމުގެ ހަޅުތާލެއް ދޫނިދޫ ޖަލުތަކުގެ ޤައިދީންކުރިޔަށް އެބަގެންދެއެވެ.
އިތުބާރުހުރި ފަރާތަކުން އިރުވަރު ނޫހަށް މަޢުލޫމާތު ދީފައިވާ ގޮތުގައި، ބަނޑު ހައި ހޫނުކަމުގެ ހަޅުތާލު ޤައިދީންކުރަމުން އަންނަތާ މިއަދަށް މިއީ 6 ވަނަ ދުވަހެވެ. އަދި، އިއްޔެއިން ފެށިގެން މިއަދާއި ހަމައަށް ގިނަ ޢަދަދެއްގެ ޤައިދީން ފެއިންޓްވެގެން ގޮޅި ތެރެއަށް ވެއްޓި ދޫނިދޫ ކުލިނިކު ފަރުވާދެމުން އެބަ ގެންދެއެވެ.
ޖަލުތަކާއި ޕެރޯލް ޤާނޫނު ބުނާގޮތުން ޝަރީޢަތުން ގޮތެއް ނިމެންދެން ބަންދުގައިތިބޭ ފަރާތްތަށް ބަންދުކުރަންޖެހޭނީ ރިމާންޑް ޖަލުތަކުގައެވެ. އެއީ، މާލޭ ޖަލު ނުވަތަ މާފުށީ ޖަލެވެ. އެހެން ނަމަވެސް، ޝަރީޢަތުން ގޮތެއް ނިމެންދެން ބަންދުކުރެވޭ މީހުންގެ ޢަދަދު ހިފެހެއްޓުމެއްނެތި މައްޗަށް ދިޔުމުގެ ނަތީޖާއަކީ، ޖަލުތަށް ފުރިބާރުވެ، ޤައިދީންގެ ޤާނޫނީ އެތަކެއް ޙައްޤަކަށް އުނިކަން ލިބެމުން ދިޔުމެވެ.
މީގެ ކުރީން، ރިމާންޑް ޖަލުގައި ބަންދުކުރުމަށްޓަކައި އަމުރުކޮށްފައިވަނިކޮށް، ކަސްޓޯޑިއަލް ޖަލެއްގައި ބަހައްޓާފައިހުރި ޤައިދީއެއް ކުރިމިނަލް ކޯޓުން ބަންދުން ދޫކޮށްލުމުން، ދިވެހިރާއްޖޭގެ ހައިކޯޓުން އެނިންމުމަށް ތާއީދުކުރިއެވެ. އެހެން ނަމަވެސް އޭގެ ފަހުން، ހަމަ އެބާވަތުގެ އެހެން މައްސަލައެއްގައި ހައިކޯޓުންވަނީ، ރިމާންޑް ޖަލުގައި ޖާގަނެތްކަމުގައިވާނަމަ، ރިމާންޑް ޖަލުތަކުގައި ބަންދުކުރުމަށްޓަކައި އަމުރުނެރޭ ޤައިދީން ކަސްޓޯޑިއަލް ޖަލުތަކުގައި ބަންދުކޮށްފައި ތިބުމަށް ޤާނޫނީ ހުރަހެއްނެތްކަމުގައި ކަނޑައަޅާފައެވެ.
ނަން މަޝްހޫރު ބައެއް ވަކީލުން ބުނާ ގޮތުގައި، ޝަރީޢަތުން ގޮތެއް ނިމެންދެން ބަންދުގައިތިބޭ ޤައިދީންގެ ޙާލަތު ވަނީ ވަރަށް ބޮޑަށް ގޯސްވެފައެވެ. މިފަހުން ބޭއްވޭ ކޮންމެ ޝަރީޢަތެއްގައިމެ، ޤައިދީންގެ ޝަކުވާ ފުނިޖެހެމުންދެއެވެ. ބޮޑެތި އޮޕަރޭޝަން ކުރަންޖެހޭ ޙާލަތުގައިތިބި ޖަލުގައި ބައިތިއްބަން ހެޔޮ ނުވާވަރުގެ ޤައިދީންވެސް ރިމާންޑ ޖަލުތަކުގައި އަދިވެސް ބަންދުކޮށްފައި އެބަތިއްބެވެ.
ސާފުކޮށް ފެންނަން އޮތް ޙަޤީޤަތަކީ ދިވެހިރާއްޖޭގެ ޖަލުތަކުގެ ޙާލަތު ދަށްކަމެވެ. ޤައިދީންނަށް ދޭންޖެހޭ އެންމެ އަސާސީ ޚިދުމަތްތަށްވެސް ފޯރުކޮށްނުދެވެއެވެ. މިމައްސަލާގައި ޕްރޮސެކިއުޓަރ ޖެނެރަލްގެ އޮފީހާއި، ކަމާ ގުޅުންހުރި އެންމެހައި މުއައްސަސާތަށްވަނީ ފެއިލްވެފައިކަމުގައި ބައެއް ވަކީލުން ބުނެއެވެ.
