ކޮވިޑް-19 ގެ ސަބަބުން ފަސްކުރެވިފައިވާ ލޯކަލްކައުންސިލްތަކުގެ އިންތިޚާބަށް ކުރިމަތިލުން ސަންސެޓް ޤާނޫނަކުން ބަންދުކޮށްފައި އޮތް މާއްދާ ބާޠިލުކޮށްދެއްވުމަށް އެދި ހައިކޯޓަށް ހުށައެޅި މައްސަލަ ބެލުމުގެ އިޚްތިޞާޞް އެކޯޓަށް ލިބިގެންނުވާކަމަށް ކަނޑައެޅުމުން، މައްސަލައިގައި ގޮތެއް ކަނޑައެޅުމުގެ ކުރިން އިންތިޚާބުގެ ވޯޓުނެގުން ހުއްޓުވުމަށް ވަގުތީ އަމުރަކަށްވެސް އެދި އެމައްސަލަ ސްޕްރީމް ކޯޓަށް ހުށައަޅައިފިއެވެ.
މިމައްސަލަ މިއަދުގެ ވަގުތެއްގައި ސްޕްރީމް ކޯޓަށް ހުށައެޅުއްވީ މިމައްސަލަ ހައިކޯޓަށްވެސް ހުށައަޅުއްވައިގެން ވަކާލާތުކުރެއްވި ޤާނޫނީ ވަކީލެއްކަމުގައިވާ މުޙައްމަދު ތަސްލީމެވެ.
މިމައްސަލައާ ގުޅޭގޮތުން އިރުވަރު ނޫހަށް މައުލޫމާތު ދެއްވަމުން ތަސްލީމް ވިދާޅުވީ، މިމައްސަލައަކީ ރާއްޖޭގައި ބޭއްވޭ އެންމެ ގިނަ ކެނޑިޑޭޓުން ވާދަކުރާ އަދި އެންމެ ގިނަ ޢާންމު ރައްޔިތުންނާ ސީދާ ގޮތެއްގައި ގުޅިފައިވާ އެންމެ ބޮޑު އިންތިޚާބާ ގުޅުން ހުރި މައްސަލައަކަށް ވާއިރު، ޤާނޫނުއަސާސީން ކަނޑައަޅައި ބަޔާންކޮށްފައިވާ އަސާސީ ޙައްޤުތަކެއް އެތަކެއް ހާސް ރައްޔިތުންނެއްގެ ކިބައިން ސީދާގޮތެއްގައި، އަދި އެންމެހައި ރައްޔިތުންގެ ކިބައިން ނުސީދާގޮތެއްގައި މިއިންތިޚާބުގައި ހިފެހެއްޓިފައިވާކަމަށް ބެލެވި ޤަބޫލުކުރެވޭނެ ޤާނޫނީ ސަބަބުތަކެއް ހުރި މައްސަލައެއްކަމުގައި މިމައްސަލަ ވާހިނދު، މައުޟޫއީ ގޮތުން މި މައްސަލަ ބެލިގެންގޮސް ގޮތެއް ކަނޑަނޭޅި އޮއްވާ އިންތިޚާބު ބޭއްވުނުނަމަވެސް އިންތިޚާބަކީ ޤާނޫނާއެއްގޮތަށް ބޭއްވުނު އިންތިޚާބެއްކަމާމެދު ޝައްކުއުފައްދައި މައްސަލަތަކެއް އުފަންވެގެން ދިއުމުގެ ފުރުޞަތު އިންތިހާއަށް ބޮޑުކަމެއްކަން ފާހަގަކުރެއްވިއެވެ.
ތަސްލީމް އިތުރަށް ފާހަގަކުރެއްވި ގޮތުގައި، ޤާނޫނުއަސާސީގައި ކަނޑައަޅާފައިވާ އަސާސީ ހަމަތައްކަމުގައިވާ ދިމިޤްރާތީ އުޞޫލާއި ރައްޔިތުންގެ ބާރުވެރިކަންފަދަ އެތަކެއް ޕްރިންސިޕަލްތަކަކާވެސް ޚިލާފު ޢަމަލުތަކެއްވެސް، މިއިންތިޚާބުގައި މިހިނދު އުފަންވެގެން އަންނަތަން ފެންނަ ހިނދު، މިމައްސަލައަކީ މިޙާލަތުގައި މުޅި ޤައުމު ދުސްތޫރީ ނިޒާމުން ބޭރުވާފަދަ ސަބަބުތަކެއް އެކުލެވޭވެސް މައްސަލައަކަށް ވެފައިވާކަންވެސް ފާހަގަކުރެއްވިއެވެ.
ލޯކަލްކައުންސިލް އިންތިޚާބު އަހަރަކަށްވުރެވެސް ގިނަ ދުވަހަށް ފަސްވެގެން ދިއުމާ ގުޅިގެން، އެއިންތިޚާބުގައި ވާދަކުރުމަށް ކުރިން ހުށައެޅި، އާދަޔާއި ޚިލާފަށް ގިނަ ޢަދަދެއްގެ ކެނޑިޑޭޓުން އެމީހުންގެ ދިރިއުޅުމުގެ ޙާލަތައް އައި ކުއްލި ބޮޑެތި ބަދަލުތަކާ ގުޅިގެން މަޖުބޫރު ޙާލަތުގެ ސަބަބުން ނަން އަނބުރާގެންދަން ޖެހި އެކަން ކޮށްފައިވާއިރު، އެތަކެއް ކެނޑިޑޭޓުންނެއް މިހިނދުވެސް އިންތިޚާބުގައި ވާދަކުރަމުން އެދަނީ މިނިވަންކަމާއެކު ލިބިގެންވާ ފުރިހަމަ އިޚްތިޔާރެއްނެތް ޙާލު، އެކެނޑިޑޭޓުން ވާދަކުރާ ސިޔާސީ ޕާޓީތަކަށް ލިބިދާނެ ގެއްލުމަކާ މަޖުބޫރުވެގެންކަން ތަފާތު ގިނަ ކެނޑިޑޭޓުންގެ ފަރާތުން އައިސްފައިވާ ކަންބޮޑުވުންތަކުން އެނގިގެންދާކަންވެސް ތަސްލީމް ފާހަގަކުރެއްވިއެވެ.
އިލެކްޝަންސް ކޮމިޝަންގެ ރައީސް ދާދިފަހުން ކުރަށްވާފައިވާ ޓްވީޓެއްގައިވެސް ހާމަކޮށްފައިވާ ގޮތުން، ކައުންސިލް އިންތިޚާބު ފަސްވެގެން މިދިޔަ އަހަރެއްހާ ދުވަހުގެ ތެރޭގައި 5000 އަށްވުރެ ގިނަ މީހުނަށް އަލަށް ޢުމުރުން 18 އަހަރު ފުރިފައިވާކަންވެސް ފާހަގަކޮށްލެވެއެވެ.
