ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާގައި ހައްޔަރުކުރި، ފޮޓޯގައިވާ، ދެ މީހުންނަކީ ވެސް ތަފާތު ކުށްތަކުގެ ރެކޯޑު އޮންނަ ބައެއް ކަމަށް ފުލުހުން ބުނެފިއެވެ.
މީގެ ކުރި އިރުކޮޅެއް ކުރިން ބޭއްވި ނޫސްވެރިންގެ ބައްދަލުވުމެއްގައި ފުލުހުން ވަނީ އެ ހާދިސާގެ ތުހުމަތުގައި ހައްޔުރތު ކުރި ދެ މީހުންގެ މަޢުލޫމާތާއި ބާރުގަދަ އައިއީޑީ ގޮއްވާލި ވީޑިއޯ ވެސް އާންމުކޮށްފައެވެ. އެވީޑިއޯއިން އޭގެ ބާރު ގަދަ ކަމާއި ނުރައްކާތެރިކަން ސާފުކޮށް އެނގެއެވެ.
އައިއީޑީ ހަރުކޮށްފައިވާ ސައިކަލުގެ ނަމްބަރު ޕްލޭޓް ބަދަލުކޮށް، އިންޖީނު ނަންބަރު ފޮހެލަން މަސައްކަތްކޮށްފައިވާ ކަމަށާއި އެކަމަކު ފޮރެންސިކުން މިހާރު ވަނީ އިންޖީނުގެ ނަންބަރު ދެނެގަނެފައި ކަމަށް ވެސް ފުލުހުން ބުންޏެވެ.
މި ޕްރެސްގައި ޕްރޮސެކިއުޓަރ ޖެނެރަލް ހުސައިން ޝަމީމް ވެސް ބައިވެރިވެ ވަޑައިގަތެވެ. ޕްރެސްގައި ޕީޖީ ޝަމީމް ވިދާޅުވީ މިހާތަނަށް ބެލެވޭ ގޮތުން، ހައްޔަރުކުރި މީހުންނާ ހަރުކަށި ފިކުރާ ގުޅުން އޮތްކަމަށް ބެލެވޭ ކަމަށެވެ. އަދި ތަހުގީގުގައި ފުލުހުންނަށް އެހީތެރިވެދިނުމުގައި ސީދާ އެމަނިކުފާނު އަމަލީ ގޮތުން ބައިވެރިވެ ވަޑައިގަންނަވާ ކަމަށެވެ.
