ފޮޓޯއިން އެފަންނަނީ ރައީސް މުހައްމަދު ނަޝީދުގެ އަވަހާރަކޮށްލުމަށް ދިން ޓެރަރިސްޓް ހަމަލާގައި ބޭނުންކުރި ބާރުގަދަ އައިއީޑީ ގޮއްވާލިކަމަށް ފުލުހުން އެންމެ ބޮޑަށް ތުހުމަތުކުރާ މީހާއެވެ.
ފުލުހުން މިއަދު ބުނީ މި މީހާ އަކީ ފުލުހުންގެ ތަހުގީގަށް މިވަގުތު އެންމެ މުހިއްމު މީހާ ކަމަށާއި މި މީހާ ހޯދުމުގައި އާންމުންގެ އެހީތެރިކަން ވަރަށް މުހިއްމު ކަމަށެވެ.
"މީނައާ ބެހޭ އެއްވެސް މައުލޫމާތެއް އެނގޭނަމަ އެކަން އެންގެވުން އެދުން. މައުލޫމާތުދޭ ފަރާތްތައް އަޅުގަނޑުމެން ސިއްރުކުރާނަން،" ފުލުހުންގެ ތަހުގީގުޓީމުގެ ވެރިޔާ މުޙައްމަދު ރިޔާޒު ވިދާޅުވިއެވެ.
ސައިކަލެއްގައި ހަރުކޮށްފައިވާ އައިއީޑީ ގޮއްވާލިއިރު ފޮޓޯއިން އެފެންނަ މީހާ ހުރީ އަތަމާ ޕެލަސް އަން ވަންނަ ގޯޅި ތެރޭގައި ފާރުގައި ލެނގިލައިގެންނެވެ.
މި މައްސަލައާ ގުޅުން ހުރި ދެމީހަކު މިއަދު ފުލުހުން ހައްޔަރުކޮށް ތަހުގީގު ކުރަމުން އެބަ ގެންދެއެވެ.
