މާލޭ ސިޓީ ކައުންސިލުން ގެންދަނީ ތަފާތު ދައްކަމުން

ހައުސިން މިނިސްޓަރުކަމުގެ ދައުރުގައި ޑރ. މުއިއްޒު ފެނުނީ ހަރުކަށި، ރުންކުރު އަދި ކައުންސިލުތަކުގެ ބާރުތައް މައިސަރުކާރަށް ނެގުމަށް އެންމެ އިސްދައުރެއް އަދާކުރެއްވި އެއް މޭސްތިރީގެ ގޮތުގައެވެ. އެކަމާ ގުޅިގެން ނޫސްވެރިން ސުވާލު ކުރުމުން ވިދާޅުވެފައިވަނީ އޭރު އަދާކުރެއްވީ ސަރުކާރުން ހަވާލުކުރެއްވި "ވަޒީފާގެ މަސްޢޫލިއްޔަތު" ކަމަށެވެ. އެދުވަސްތައް މާޒީވެ ހިނގައްޖެއެވެ. ޑރ. މުއިއްޒަކީ މިހާރު ރައްޔިތުން އިންތިހާބުކޮށްފައިވާ މާލޭގެ މޭޔަރެވެ. މަގާމުގެ އާކޮޅު މޭޔަރު ފެންނަނީ ހިތްތިރި، ހަރަކާތްތެރި، ގިނަ ބަޔަކަށް ފައިދާވާނެ ކަންކަން އަވަހަށް ތަންފީޒުކުރެއްވުމަށް އިސްކަން ދެއްވައި، ކައުންސިލުގެ ބާރުތައް އޭގެ ފުރިހަމަ މާނައިގައި ދަމަހައްޓަވަމުން ގެންދަވާތީއެވެ.

މާލޭ ސިޓީ ކައުންސިލުގެ ސާފު އަޣުލަބިއްޔަރު ވާދަވެރި ކޯލިޝަނަށް ލިބުމުން ކަންކަން ހެޔޮ މަގުން ހިނގާނެ ކަމަށް ބެލެވުނެވެ. އެކަން ހަގީގަތަކަށްވާ ތަން މިހާރު އެދަނީ ފެންނަމުންނެވެ. ކައުންސިލުގެ ބެލުމުގެ ދަށުގައިވާ ބައެއް ތަންތަނުގެ ޚިދުމަތުގެ ފީތައް ކުޑަކޮށްލައިފިއެވެ. ގޮނޑުވެފައި އޮތް މާލެ އާއި ހުޅުމާލެ ސާފުކޮށް، މަގުތައް ޑިސް އިންފެކްޓްކޮށް އެބަ ދޮވެއެވެ.

ސިޓީ ކައުންސިލުން ވަނީ މޭޔަރުގެ ވިސްނުންތައް ހަގީގަތަކަށް ހެދުމުގެ ހުށަހެޅުންތަކަށް ރުހުން ދީފައެވެ. ނިމިދިޔަ ކައުންސިލު ގޮތަށް ދެކޮޅުވެރިކަމެއް ނެތިއެވެ.

މާލޭގައި ޕާކިން ޒޯންތައްވެސް އެދަނީ ހަދަމުންނެވެ. ކޮންމެ މަސައްކަތްކެއް ހިނގަމުންދާއިރު، ކައުންސިލް މެންބަރުން ހާޒިރުވެ ތިއްބަވައެވެ. ކަން ހިނގާ ނުހިނގާގޮތް ބައްލަވައެވެ.

މޭޔަރު ޑރ. މުއިއްޒު ގެންދަވަނީ ސަރުކާރުގެ އިސްވެރިންނާ ބައްދަލުކުރައްވައި، މާލޭގެ ތަރައްގީއަށް ކުރެވެން ހުރި ކަންކަމާ ބެހޭ މަޝްވަރާތައް ކުރައްވަމުންނެވެ. ފެއްޓެވީ ރައީސް އިބްރާހީމް މުހައްމަދު ސޯލިހުއާ ހަމައިންނެވެ. އެ ބައްދަލުވުމުގައި ރައީސްގެ ފުރިހަމަ ތާއީދު ސިޓީ ކައުންސިލުގެ މަސައްކަތްތަކަށް އޮންނާނެ ކަމުގެ ކަށަވަރު ބަސް ވިދާޅުވެފައިވެއެވެ.

ޑރ. މުޢިއްޒު ގެންދަވަނީ ރައްޔިތުންގެ ހައްގުގައި ސަރުކާރުން ބައެއް ކަންކަން ވަކި މަގަކުން، ހަމައަކުން ކުރިއަށް ގެންދިއުމަށް ގޮވާލައްވައި، ސަރުކާރަށް ޕްރެޝަރު ދެއްވަމުންނެވެ. އަދި ނޫސްވެރިންނާ ގާތް ގުޅުމެއް ބާއްވަވައި، ރައްޔިތުންނަށް ކަންކަން ސާފުކޮށް ވިދާޅުވެދެއްވަމުން ގެންދެވުމަކީ ވެސް މިނިސްޓަރުކަމުގައި ހުންނެވިއިރު އެހާ އާންމު މަންޒަރެއް ނޫނެވެ.

މާލޭ މޭޔަރުގެ މިޒާޖު ބަދަލު ކުރައްވައިފިއެވެ. ބަހުރުވަ ލުއި ވެއްޖެއެވެ. އޯގާތެރި ވެއްޖެއެވެ. މަސައްކަތުގެ ސްޕީޑު ހަލުވި ކުރައްވައިފިއެވެ. ކައުންސެލަރުން ހަރަކާތްތެރި ކުރުވައިފިއެވެ. މި ބަދަލުތަކުގެ ސިއްރަކީ ކޮބައިތޯއެވެ؟ ސިޔާސީ ވިސްނުމަކުން ދިރާސާކޮށްލާއިރު އެމަނިކުފާނު އަމާޒު ހިފާފައިވަނީ ސީދާ ރައީސުލްޖުމްހޫރިއްޔާގެ ގޮނޑިއަށެވެ.