ކޮވިޑް-19ގެ ނުރައްކާ ރާއްޖެއަށް ކުރިމަތިވި ދުވަހުން ފެށިގެން، ދިވެހިންނަށް، ދިވެހި ގައުމަށް ހެޔޮ ގޮތްތައް ހޯއްދަވައި ދެއްވުމުގައި ޚާރިޖީ ވަޒީރު ޢަބްދުﷲ ޝާހިދުގެ ހިކުމަތްތެރިކަމާއި ހުށިޔާރުކަން ވަރަށް ސާފުކޮށް ފެންނަން އެބަ އޮތެވެ. ދުނިޔޭގެ ގައުމުތައް ފުރަބަންދުވެ، އިގްތިސާދުތައް ހުއްޓިފައިވާ ހާލަތުގައި ވެސް ރާއްޖެއަށް، ފަންނީ، މާލީ، މާއްދީ ހިލޭ އެހީތައް ދުނިޔޭގެ އެކި ގައުމުތަކުން ހޯއްދަވައި ދެއްވިއެވެ. މިހާރު ވެސް ގެންދަވަނީ އެ މަސައްކަތް ހަމަ ކުރިއަށެވެ.
ކޮވިޑުގެ ނުރައްކަލުގެ ހާލަތުގައި ވެސް ގައުމުތަކަށް ދަތުރުކުރައްވައިގެންނާއި ޚާރިޖީ ވިއުގައިގެ ތެރެއިން ވަކިވަކި ބޭފުޅުންނަށް ގުޅުއްވައި ރާއްޖޭގެ ހާލަތު އޮޅުންފިލުއްވައި ދެއްވައި، ދިވެހިންގެ ހާލަތު ބަދަލުކުރުމަށް ކޮންމެހެން ބޭނުންވާ އަސާސީ ކަންކަން ގެންދެވީ ފަހިކޮށްދެއްވަމުންނެވެ. ޚާރިޖީ ގުޅުންތައް ވަރުގަދަކޮށް އިތުބާރު ދަމަހައްޓަވައިގެންނެވެ.
މާލީ އެހީތެރިކަމުގެ އިތުރުން ކޮވިޑް-19 އިން ރައްކާތެރިވުމަށް ވެކްސިން ހޯއްދެވުމުގައި ވެސް އެމަނިކުފާނު ކާމިޔާބު މަސައްކަތް ފާހަގަކޮށްލަން ޖެހެއެވެ. އިންޑިޔާގެ ކޮވި ޝީލްޑާއި ޗައިނާގެ ސިނޮފާރމާއި ފައިޒާ ވެކްސިން ވެސް ރާއްޖެއަށް ލިބޭނޭ ގޮތްތައް ފަހިކޮށްދެއްވިއެވެ.
ރާއްޖޭގެ ގިނަ ބަޔަކު އެންމެ ފުރަތަމަ ޖެހީ އިންޑިޔާގެ ކޮވިޝީލްޑް ވެކްސިނެވެ. މިއީ އިންޑިޔާގެ ހިލޭ އެހީގެ ބައެކެވެ. ވެކްސިންގެ ދެވަނަ ޑޯޒް ޖެހުމުގެ ވަގުތު ކުޑަތަން ވެގެން އައިއިރު، އިންޑިޔާއަށް ކޮވިޑްގެ ތިން ވަނަ ރާޅު، ވައިރޯޅިއެއްހެން މުޅި ގައުމަށް ފެތުރި، ބޮޑުވެގެންވާ މުސީބާތަކަށްވެ، ގައުމުގެ ހުރިހާ ވަސީލަތެއް ބޭނުން ކުރުމުން ވެސް އޮބި ނޯންނަ ހިސާބަށް ކޮވިޑުގެ ހާލަތު ގޯސްވެގެން ދިޔައެވެ. ނަތީޖާއަކަށްވީ އެ ގައުމަށް ބޭނުންވާ މިންވަރަށް ކޮވިޝީލްޑް ވެކްސިން އުފެއްދޭނެ ގޮތެއް ނެތިގެން، ދެ ބިލިއަން ވެކްސިން ގައުމުން ބޭރުން ހޯދަން ދުނިޔޭގައި އަތްފުނާ އަޅަން ފެށުމެވެ. އެހެންކަމުން ރާއްޖެއަށް އިންޑިޔާގެ ކޮވިޝީލްޑް ވެކްސިން އިތުރަށް ހޯދުމަށް ދަތިތަކާ ކުރިމަތިވިއެވެ. އެހެންނަމަވެސް ޝާހިދު ގެންދަވަނީ އެކަމަށް ވެސް ހައްލެއް ފެނޭތޯ މަސައްކަތްކުރައްވަމުންނެވެ. އެއީ ކޮވިޝީލްޑްގެ ދެވަނަ ޑޯޒް ޖެހޭނެ ދުވަހެއްގެ އިންތިޒާރުގައި ތިބި ގިނަ ދިވެހިންނަށް ހިތްހަމަ ޖެހުން ގެނެސް ދެއްވުމަށް ޓަކައެވެ.
އިންޑިޔާގެ ވެކްސިންގެ ލިބުމުގައި ކުރިމަތިވި ތަދުކަން ކަނޑުވާލުމަށް ޝާހިދު ގެންދަވަނީ ރަޝިޔާގެ ސްޕަޓްނިކް ވީ ވެކްސިން ރާއްޖެއަށް ވީއެންމެ އަވަހަކަށް ގެންނެވުމަށް މަސައްކަތް ކުރައްވަމުންނެވެ. މިއީ ކުއްލި ހާލަތުގައި ބޭނުންކުރުމަށް، ރާއްޖޭގެ ފުޑް އެންޑް ޑްރަގް އޮތޯރިޓީން ހުއްދަ ދެއްވާފައިވާ ވެކްސިނެކެވެ. މި ވެކްސިން ހުއްދަ ކޮށްފައިވަނީ އުމުރުން 18 އަހަރުން މަތީގެ މީހުންނަށެވެ. އަދި މައިނަސް 18 ޑިގްރީ ސެލްސިއަސްގެ ފިނިހޫނުމިނެއްގައި ނޫނީ މި ވެކްސިން ނުބެހެއްޓެއެވެ. އެހެންކަމުން، އެމްއެފްޑީއޭ އިން މި ވެކްސިނަށް ހުއްދީފައި ވަނީ ރާއްޖެ އެތެރެ ކުރުމުގެ ކުރިން ވާންޖެހޭ ތައްޔާރީތަކާއި ވެކްސިން އެތެރެކުރުމަށް ފަހު، އަދި ހިފައި ގެންގުޅުމުގެ ހުރިހާ މަރުހަލާއެއްގައި ވެސް އެ ފިނިހޫނުމިން ދެމެހެއްޓުމަށް ޝަރުތުކޮށްގެންނެވެ
ކޮވިޑް-19 އިން ދިފާއުވުމަށް ރަޝިއާ އިން އުފައްދާފައިވާ "ސްޕަޓްނިކް ވީ" ވެކްސިން ވީހާ ވެސް އަވަހަކަށް ރާއްޖެ އަށް ފޯރުކޮށްދެއްވަން މަސައްކަތް ކުރައްވާނެ ކަމުގެ ޔަގީންކަން އެ ގައުމުގެ ފޮރިން މިނިސްޓަރު ސަރްގޭ ލަވްރޯފް ވަނީ ދިވެހި ހާރިޖީ ވަޒީރަށް ދެެއްވާފައެވެ. މި ޔަގީންކަން ރަޝިއާގެ ހާރިޖީ ވަޒީރު ލަވްރޯފް ސަރްގޭ ދެއްވީ ދެ ބޭފުޅުން ފޯނުން ގުޅުއްވައި، ކޮވިޑްގެ ހާލަތާ ގުޅިގެން ކުރެއްވި މަޝްވަރާތަކުގަ އެވެ.
އެ މަޝްވަރާގައި ޝާހިދު ވަނީ ރާއްޖެ އަށް ކޮވިޑްގެ ސަބަބުން ކުރިމަތިވެފައިވާ ދަތި ހާލަތާއި މި ހާލަތުން މިންޖުވުމަށް ސަރުކާރުން ކުރާ މަސައްކަތްތަކާ ބެހޭ ގޮތުން ރަޝިޔާގެ ފޮރިން މިނިސްޓަރަށް މަޢުލޫމާތު ދެއްވާފައެވެ.
މިހާރު ވެސް 66 ގައުމެއްގައި އިމަޖެންސީގައި ބޭނުންކުރުމަށް މި ވެކްސިނަށް ހުއްދަދީފައިވެ އެވެ.
ކޮވިޑުގެ ބަލިމަޑުކަމުން އަރައިގަނެ، ދިވެހި އިގްތިސާދު ހަމަ އިސްކޮޅަށް ނެގުމަށްޓަކައި އެހެން ގައުމުތަކުގެ ފަންނީ، މާލީ އަދި އެނޫންވެސް އެހީތެރިކަން ރާއްޖެއަށް ލިބޭނެކަން ކަށަވަރުކުރެއްވުމަށް ޚާރިޖީ ވަޒީރާއި ޚާރިޖީ ޓީމުގެ މަސައްކަތް ފާހަގަނުކޮށް ދޫކޮށްލެވޭކަށް ނެތެވެ.
