މިހާރު މި ރާއްޖެ ބޮޑަށް ވައްތަރުވަމުން މިދަނީ "ކައުބޯއީ" ފިލްމަކާއި ކަމަށް ޒަރިޔަންދު ވިދާޅުވެއްޖެއެވެ.
ނޭޝަނަލް ޓެންޑަރ ބޯޑުގެ ޗެއަރމަންކަންވެސް ކުރައްވާ ޒަރިޔަންދު މިފަދައިން ވިދާޅުވެފައި މިވަނީ އަންގާރަ ދުވަހު ކުރެއްވި ޓްވިޓެއްގައެވެ.
"މަރަންވީމާ މަރަންވީ، ބޮންގޮއްވަންވީމާ ބޮންގޮއްވަންވީ، ވައްކަންކުރަންވީމާ ވައްކަންކުރަންވީ، އިންސާފުގެ ކަންފުޅެއް ނެތް………………"
ޤައުމުގައި ހިނގަމުންދާ ކޮރަޕްޝަނާއި އަދި އިޖްތިމާޢީ މައްސަލަތަކާ ގުޅޭގޮތުން މަންސަތަކުގައި ޚިޔާލުފާޅުކުރައްވައި ބަސްވިދާޅުވަމުން ގެންދަވާކަން ފާހަގަކޮއްލެވޭ ޒަރިޔަންދު ކުރެއްވި މި ޓްވީޓުގައި އިތުރަށް ތަފްޞީލުކޮއްދެއްވައި ވިދާޅުވެފައި ވެއެވެ.
މިހާރު މި ރާއްޖެ ބޮޑަށް ވައްތަރުވަމުން މިދަނީ "ކައުބޯއީ" ފިލްމަކާ،
މަރަންވީމާ މަރަންވީ،
ބޮންގޮއްވަންވީމާ ބޮންގޮއްވަންވީ،
ވައްކަންކުރަންވީމާ ވައްކަންކުރަންވީ،
އިންސާފުގެ ކަންފުޅެއް ނެތް………………— Ismail Zariyand (@zariyand) June 22, 2021
ދާދިފަހުން، ޢުމުރުން އެންމެ 13 އަހަރުގެ ކުއްޖަކު މަރާލި ޙާދިސާއަކީ މުޅި ޤައުމު "ސިހިގެން" ނުދިޔަ ނަމަވެސް ރައްޔިތުން އިންތިހާއަށް ކަންބޮޑުވެ ބިރުވެރިކަމުގެ ތެރަށް ވައްޓާލި، އަދި ޤައުމުގެ "ކުށުގެ ވެށި" ގެ އިތުރުން އިޖްތިމާޢީ ޙާލަތު އޮތްހިސާބު އަންދާޒާކޮށްދޭ ހާދިސާއެކެވެ.
ޤައުމުގައި ހުރިހާ ގޮތަކުންވެސް ބާރުގަދަ "ވިޔަފާރިވެރިން" ގެ "ޝޮޕް" ތަކުގައި "ބޯއީ" އެއްގެ ގޮތުގައި އެތަކެއް ދުވަހަކަށް ގެންގުޅެ، ގޭންގުގެ ބޮޑުންގެ ޖިންސީ ޣަރީޒާތަކުގެ ޝިކާރައަކަށްވެ ހިންގި ފާޙިޝް ޖަރީމާއެއް މަތިއެޅުމުގެ ބޭނުމުގައިކަމަށް ބެލެވޭގޮތުން، ރަހީނުކޮށް ހިފެހެއްޓުމަށް ފަހު ކޮށްލި ޤަތުލެވެ.
ދައުލަތުގެ ތިންބާރުގެ ތެރެއިން އެއްބާރުގެ ވެރިޔާއަށް، ރާއްޖޭގެ އެންމެ ކާރޫބާރު ބޮޑު މަގުގައި އަދި މީހުން ތޮއްޖެހުން އިންތިހާ ގިނަ ވަގުތެއްގައި، ކާރުކޮޅުގެ ބުޑުގައި ސައިކަލެއް ޕާކުކޮށް މަގުގެ އަނެއްފަޅީގައި ރިމޯޓުއަތައް ލައިގެންހުރެ ބޮމެއްގޮއްވާލައި ހަށިކޮޅު "ތޮރުފާލި" ނިރުބަވެރި ޙަމަލާއެވެ.
ޤައުމުގެ ސަލާމަތާއި ރައްޔިތުންގެ ރައްކާތެރިކަމާއި މުޖުތަމަޢުގެ މަސަލަސްކަން ޙިމާޔަތްކޮށް ދެމެހެއްޓުމުގެ ބޭނުމުގައި ހެދިފައިވާ ޤާނޫނުތަކުގެ މޭވާ ރައްޔިތުންނާ ހަމައަށް ވާޞިލުކޮށްދިނުމުގެ މަސްއޫލިއްޔަތު މަތިކުރެވިފައިވާ ދައުލަތުގެ މުއައްސަސާތަކާއި ގުނަވަންތައް ތަކުރާރުކޮށް މަތިމައްޗަށް ފެއިލްވަމުންދާނަމަ، ޒަރިޔަންދުގެ ޓްވީޓުގައި ވިދާޅުވެފައި ވާފަދަ "ކައުބޯއީ" ފިލްމުތަކުގެ ޝޫޓިންގްތައް މި ޤައުމުގެ މަގުތައްމަތީގައި ހަގީގީ ސިފައެއްގައި ނެގެމުންދާ ބިރުވެރި މަންޒަރު ބަލަން ތިބުން ނޫންގޮތެއް ރައްޔިތުންނަކަށް އޮންނާނެ ހެއްޔެވެ!
