ކުރީގެ ރައީސް އަބްދުﷲ ޔާމީނުގެ ވެރިކަމުގައި ހިންގެވި އެންމެ ބޮޑު ހައުސިން މަޝްރޫއަކީ 7000 ހައުސިން ޔުނިޓު ހިމެނޭ ހިޔާ މަޝްރޫއެވެ. އެއީ 25 ބުރީގެ ޓަވަރުތަކެކެވެ. މަޝްރޫއުގެ ކަރުދާހުގައިވާ މިންވަރަށް ތަންމައި މިހާރު އެތަންތަން އޭގެ ވެރިފަރާތްތަކާ ހަވާލުކުރުމުގެ އެންމެ ފަހުގެ މަސައްކަތްތައް ރައީސް އިބްރާހީމް މުހައްމަދު ސޯލިހުގެ ސަރުކާރުން އެގެންދަވަނީ ކުރައްވަމުންނެވެ.
މިހާރު އުފެދިގެން އުޅޭ ބަހުސަކީ ތަނުގެ ފިނިޝިން ނުނިންމާ ހުރި ފްލެޓްތަކުގެ ކުލި ބޮޑުވުމާއި ޖާގައިގެ ދަތިކަމުގެ ވާހަކައެވެ. އެތަނަށް ޒިޔާރަތްކުރި ބައެއް މީހުން ބުނި ގޮތުގައި ތަނަށް ކޮށްފައިވާ ހަރަދާއި ތަން ހުރި ފެންވަރު ނުބައްދަލެވެ. މާ ފެންވަރު ދަށެވެ. އަދި ތަނުގެ ކުލި ހަތް ހާސް ރުފިޔާއިން މައްޗަށް ދިއުމަކީވެސް އަސާސީ ހައުސިންގެ އަގުތަކަށްވުރެ މަތީ އަގެއް ކަމަށް ވެސް އެމީހުން ދެކެއެވެ.
މަޝްރޫއު ފެށިއިރު ހައުސިން މިނިސްޓަރުކަމުގައި ހުންނެވި ޑރ. މުހައްމަދު މުޢިއްޒު ހިޔާ މަޝްރޫއާ ބެހޭ ގޮތުން ދާދި ފަހުން ދެއްވި ޓެކްނިކަލް ޕްރެޒެންޓޭޝަނެއްގައި ވިދާޅުވެފައިވަނީ ފެލެޓުގެ ކުލި ފަސްހާސް ރުފިޔާގައި ހިފެހެއްޓޭނެ ކަމަށާއި ތަނުގެ އަގުތައް އުފުލިފައިވަނީ މި ސަރުކާރަށް މެނޭޖްކުރަން ނޭނގުމުން ކަމަށެވެ. ސިޔާސީ ގޮތުން ކުޅިއެއް ކުރިއަށް ކުޅުއްވީއެވެ.
މަޝްރޫއު ފެށިއިރު ފިނިޝިން ނުހިމަނާ ގްރޮސް ފްލޯއޭރިއާގެ އަކީ އަކަފޫޓަކަށް 1319 ރުފިޔާއެވެ. މި އަގަށް ބަލާލަމާ ހެއްޔެވެ؟ މިއީ ދިވެހި ބޭންކުތަކުން މިހާރު ދޫކުރާ ހައުސިން ލޯނުތަކާއި ރިއަލްސްޓޭޓް ލޯނުތަކުގައި މެދުފަންތީގެ ގެދޮރު އިމާރާތްކުރުމަށް ކަނޑައަޅާފައިވާ ސީލިންގާ އެއްހަމައެއްގެ އަގެކެވެ. މިއަގުގައި އެކަށީގެންވާ ރަނގަޅު ފެންވަރުގައި ތަނުގެ ފިނިޝިން ނިންމެއެވެ. މީގެ ސާފު ހެކި އެ ހުރީ ހުޅުމާލޭގެ އިމާރާތްތަކުން ފެންނާށެވެ. ސުވާލަކީ ހިޔާ މަޝްރޫއުވެސް އަކަފޫޓަކަށް 1300 ރުފިޔާއަށްވުރެ މައްޗަށް ޖެހުނުއިރު، ތަނުގައި ތަށިމުށި ޖަހާ ފިނިޝިންގެ ކަންކަން ނުނިންމުނީ ކީއްވެގެން ހެއްޔެވެ؟ މި ސުވާލު އުފެދުމާއެކު ޑރ. މުއިއްޒުގެ ހުރިހާ ތުހުމަތަކާއި ޝަކުވާއެއް އަމާޒު ކުރެއްވީ މި ޝަރުކާރަށެވެ. ކަމުގެ ހަގީގަތާ ދުރަށް ވަޑައިގަތުމަށްޓަކައެވެ.
ފަންސަވީސް ބުރީގެ ޓަވަރުތައް އެޅުމަށް ކުރިމަތިލި ކުންފުނިތަކުގެ ތެރެއިން މަޝްރޫއު ހަވާލުކޮށްފައިވަނީ އެންމެ މަތީ އަގު ހުށަހެޅި ފަރާތަށެވެ. މިއީ ހަގީގަތެވެ. ސަބަބެއް ކަމަށް ޑރ. މުޢިއްޒު ވިދާޅުވެފައިވަނީ ޕްރޮޖެކްޓަށް އިކުއިޓީ ލިބޭނެ ކަމުގެ ޔަގީން ބޮޑީ އެފަރާތުން ހުށަހެޅި ހުށަހެޅުންތަކުގައި ކަމަށްވީތީއެވެ.
އެހެންނަމަވެސް ފަންސަވީސް ބުރީގެ ޓަވަރުތަކުގެ މަޝްރޫއު ހަވާލުކުރާނެ ބަޔަކު ކަނޑައެޅުމުގެ ކަންކަން އޭރު ހިނގާ ދިޔަ ގޮތް ގާތުން ތަޖުރިބާކުރި މީހަކު ބުނި ގޮތުގައި އޭރު ސަރުކާރުގެ ވެރިންނާއި ކުންފުނިތަކުގެ ވެރިން ބޮޑަށް ބެލީ، ޕްރޮޖެކްޓް ހަވާލުކުރުމާއެކު ޕްރޮޖެކްޓުގެ ޖުމްލަ އަގުގެ މަދުވެގެން ފަސް އިންސައްތައަށްވާ ފައިސާ އެމީހުންނަށް ދޭން އެއްބަސްވާ ބަޔަކަށް މަސައްކަތް ހަވާލުކުރުމަށެވެ. ބައެއް ކުންފުނިތަކުން ބުނެފައިވަނީ އަމިއްލަ އިކުއުޓީގައި ޕްރޮޖެޓް ހިންގަން ޖެހޭތީ، ސަރުކާރުގެ ވެރިން ޑިމާންޑްކުރި އެފައިސާ ދެވޭނީ ބައިބަޔަށް ބަހާލައިގެން ކަމަށެވެ. އެހެންނަމަވެސް ޕްރޮޖެކްޓް ހަވާލުކުރި ކުންފުނިން އެއްބަސްވީ ޕްރޮޖެކްޓުގައި ސޮއިކުރުމާއެކު މަދުވެގެން 25 މިލިއަން ޑޮލަރު ގާތްގަނޑަކަށް 400 މިލިއަން ރުފިޔާ، ސަރުކާރުގެ ވެރިންގެ ޝަރުތުތަކާ އެއްގޮތަށް ދިނުމަށެވެ. އެ ކުންފުންޏާ މަޝްރޫއު ހަވާލުކުރި ސަބަބަކީ މިއީއެވެ.
މި ފައިސާގެ ތެރެއިން ބައެއް ކުންފުނިތަކުގެ ވެރިންނަށް ތިން މިލިއަން ޑޮލަރު (46 މިލިއަން ރުފިޔާ) ލިބުނެވެ. އެފައިސާ ބައެއް މީހުން ޖަމާކޮށްފައިވަނީ ގާތް ރައްޓެހިންގެ އެކައުންޓްތަކަށެވެ. އެހެންކަމުން 6.6 ބިލިއަން ރުފިޔާގެ ލޯނުވެސް ހިމަނައިގެން މުޅި މަޝްރޫއަށް ބޭރުވާނެ ކަމަށް ކުރީ ސަރުކާރުން ހިސާބުކޮށްފައިވާ 9.4 ބިލިއަން ރުފިޔާގެ ތެރެއިން 400 މިލިއަން ރުފިޔާ މަޝްރޫގެ މަސައްކަތުގައި ނުހުމެނި، އެފައިސާ ވަދެފައިވަނީ އޭރުގެ ސަރުކާރުގެ ވެރިންގެ ޖީބުތަކަށެވެ. އޭގެ ތެރޭގައި ކުންފުނިތަކުގެ ވެރިންނާއި ރައްޔިތުންގެ މަޖިލީހުގެ ސަރުކާރު ހިންގާ ޕާޓީގެ މެންބަރުންނާއި ވެރިކަންކުރާ ޕާޓީގެ ވެރިންވެސް ހިމެނެއެވެ.
ފްލެޓް ލިބުނު ފަރާތްތަކުން ތިން މަސް ދުވަހުގެ ތެރޭގައި ތަނުގެ ފިނިޝިން ނިންމުމަށް މި ސަރުކާރުން ކަނޑެޅުމުން ޑރ. މުޢިއްޒު ވިދާޅުވެފައިވަނީ އެ މުއްދަތު އެއް އަހަރަށް އިތުރުކުރަން ޖެހޭ ކަމަށެވެ. އަދި އެ މުއްދަތުގައި ކުލި ނުހިނގާ ގޮތަށް ހެދުމަށެވެ. މިކަން މުޢިއްޒުގެ ޕްރެޒެންޓޭޝަނުގައި ހިމަނާފައިވާ ފައިސާގެ އަދަދުތަކާއި އިންޓަރެސްޓް ރޭޓުތަކާ ގުޅުވާލުމުން، އެއް އަހަރު ދުވަހުގެ އިންޓަރެސްޓް ފީ ޕްރޮޖެކްޓުގެ އަގަށް ވަދެ، ޕްރޮޖެކްޓުގެ އަސްލު އަގު އަނެއްކާވެސް އުފުލިގެންދާނެއެވެ. މިއީ ސަރުކާރަށާއި ތަނުގެ ވެރިންނަށް އުފުލަން ޖެހޭނެ އިތުރު ބުރައެކެވެ. މި ވާހަކަތައް ޑރ. މުއިއްޒުގެ ޓެކްނިކަލް ވިސްނުމުގެ ކަރުދާހުގައި ހިމަނުއްވާފައެއް ނުވެއެވެ. ސިޔާސީ ގޭމުގެ ކޮންޓްރޯލު ގެއްލިދާނެތީއެވެ.
ހިޔާ ފްލެޓުގެ މަޝްރޫޢާ ގުޅިފައިވާ ހަގީގީ މައްސަލަތައް އުފަންވެފައިވަނީ ޑރ. މުޢިއްޒުގެ ހައުސިން މިނިސްޓަރުކަމުގެ ޒައާމަތުގައެވެ. ފުރަތަމަ ކަމަކީ ބޮޑު އަގުގައި ބަޔަކަށް މަޝްރޫއު ހަވާލުކުރުމެވެ. އެ މަޝްރޫއުގެ ފައިސާއިން 400 މިލިއަން ޑޮލަރުގެ ނާޖާއިޒު ފައިދާ އޭރުގެ ސަރުކާރުގެ ވެރިން ނެންގެވުމެވެ. އަދި ފިނިޝިން ނިންމޭނެ އަގު އަކަފޫޓަކަށް ޖެހުނުއިރު، ފިނިޝިން ނުހިމެނައި، މަޝްރޫޢު ބަޔަކާ ހަވާލުކުރުމެވެ. މިކަންކަން އޭރު ކުރެއްވިނަމަ ފްލެޓް ލިބުނު ރައްޔިތުންގެ މިއަދުގެ ކަންބޮޑުވުންތަކަށް އެކަށީގެންވާ ހައްލުތައް މިއަދު އޮންނާނީ ލިބިފައެވެ.
