ޗައިނާއާ ދެކޮޅަށް ރައީސް ނަޝީދު ކުރައްވާ ޓްވީޓްތައް: ދިވެހި ގައުމަށް ނުރައްކަލާއި ގެއްލުންވާ ހިސާބަށް

ރައީސް މުޙައްމަދު ނަޝީދަކީ ރާއްޖޭގެ ގާނޫނު ހަދާ މަޖިލީހުގެ ރައީސެވެ. މިއީ ގައުމެއްގެ ނިސްބަތުން އެންމެ ނުފޫޒު ފަދަ އަދި ބައިނަލްއަގުވާމީ މައިދާނުގައި އެ ބޭފުޅެއްގެ ބަސްފުޅާއި އަމަލުފުޅުތަކަށް އަބަދުވެ ފާރަވެރިވާނެ ބޭފުޅެކެވެ. އެހެންކަމުން އެ ބޭފުޅެއްގެ ބަސްމަގު ހުންނަންވާނީ އެގައުމަކަށް އެއްވެސް މާނައެއްގައި ގެއްލުމެއް، ދެރައެއް ނުލިބޭނޭ ފަދަ ގޮތަކަށްކަން ކަށަވަރެވެ. ޚާއްސަކޮށް ދިވެހި ގައުމުގެ ސަލާމަތާއި އިގްތިސާދަށާއި ތަރައްގީއަށް ނުތަނަވަސްކަން ލިބޭ ގޮތަށް، ގާނޫނު ހަދާ ބާރުގެ އެންމެ މަތީ ވެރިޔާގެ ބަސްމަގު ހުންނަ ނަމަ އެއީ ގައުމަށް ވެވޭ ބޭއިންސާފެކެވެ. ދިވެހި ދައުލަތުގެ ޚާރިޖީ ސިޔާސަތު ވަކި ގޮތަކަށް ބައްޓަންކޮށް ގުޅުން ބަދަހި ކުރަމުންދާއިރު، ވަކި ގައުމަކާމެދު ނަފްރަތާއި ދެކޮޅުވެރިކަން އުފެދޭ ގޮތަށް ނުވަތަ އެ ގައުމެއްގެ މިނިވަންކަމަށް އަސަރުކުރާ ގޮތަށް ވާހަކަ ދެއްކެވުމުން ގަބޫލެއް ނުކުރެވެއެވެ.

ރައްޔިތުންގެ މަޖިލީހުގެ ރައީސްކަމުގެ ހުވާ ކުރެއްވި ފަހުން، ރައީސް ނަޝީދުގެ ބަހުގެ ހޫނު ހަމަލާއަށް ޗައިނާއަށް ދޭތެރެދޭތެރެއިން ދެއްވައެވެ. ރާއްޖޭގައި އެންމެ ފަހުން ހުންނެވި ޗައިނާގެ އެމްބެސަޑަރު އެއް ކަމަކަށް އެންމެ ގިނައިން ޓްވީޓް ކުރައްވާފައިވަނީ ރައީސް ނަޝީދު ޗައިނާއާ ބެހޭ ގޮތުން ކުރައްވާފައިވާ ޓްވީޓްތަކަށް ރައްދު ދެއްވުމަށެވެ.

ޗައިނާއާ ދެކޮޅަށް ރައީސް ނަޝީދު ކުރައްވާ ޓްވީޓްތަކާއި ދައްކަވާ ވާހަކަފުޅުތަކުގެ ސަބަބުން ދިވެހި ރާއްޖެއަށް ގެއްލުން އެބަ ލިބެއެވެ. ދިވެހި ރާއްޖެއަށް ޗައިނާއިން ކަނޑައަޅާފައި ހުރި ކުރީގެ ސަފީރު ދައުރު ނިންމަވައި ޗައިނާއަށް ފުރާވަޑައިގަތުމުގެ ކުރިން ޗައިނާގެ ބޮޑެތި އިންވެސްޓަރުންގެ ޓީމެއް ރާއްޖެ ގެންނަވައި، ރާއްޖޭގެ ތަރައްގީ އާއި އިގްތިސާދަށް ދިރުން ގެންނާނެ ގިނަ މަޝްރޫޢުތަކަކަށް އިންވެސްޓްކުރުވުމަށް ކުރެއްވި މަސައްކަތް ހުއްޓަވައިލައްވައި، އެ ޓީމާއެކު ފުރާވަޑައިގެންނެވީ ރައީސް ނަޝީދު ކުރެއްވި ޗައިނާގެ ލޯނުތަކާ ގުޅޭ ޓްވީޓްތަކުގެ ސަބަބުންނެވެ. އެޓީމުން ނިންމީ، ދިވެހި ދައުލަތުގެ ގާނޫނު ހަދާ ބާރުގެ އެންމެ މަތީވެރިޔާގެ ބަސްމަގު ހުރި ގޮތުން ޗައިނާގެ އިންވެސްޓަރުންނަށް ރައްޖޭގައި އިންވެސްޓްކުރުން ރައްކާތެރި ނޫން ކަމަށެވެ. މި ގެއްލުނީ ކިހާ ބޮޑު ފުރުސަތެއް ހެއްޔެވެ؟ މިވާހަކައިގެ ހަގީގަތް އެނގިވަޑައިގަންނަވާނެ އެމްޑީޕީގެ ރައްޔިތުންގެ މަޖިލީހުގެ މެންބަރުން ތިބޭނެއެވެ.

ރައީސް ނަޝީދު ޗައިނާއާ ދެކޮޅަށް ކުރައްވާ ޓްވީޓްތަކާއި ދައްކަވާ ވާހަކަތަކުގެ ސަބަބުން ދެގައުމުގެ ގުޅުމަށް ބުރޫއެރިއަ ނުދިނުމަށްޓަކައި ފޮރިން މިނިސްޓަރު އަބްދުﷲ ޝާހިދު ޗައިނާގެ އޮފިޝަލުންނާ ވާހަކަ ދައްކަވައި، މަޝްހަރު ފިނިކޮށްލައެވެ. ހަމަޖެހޭ ބުއްދިއަކުން ވިސްނާލާއިރު މިއީ ވަރަށް ޖޯކެކެވެ. ރައީސް ނަޝީދު މިކަމާ ދެވަނަ ވިސްނެވުމަކަށް ވަޑައިގަންނަވަން ޖެހެއެވެ.

ޗައިނާގެ މަޝްރޫއުތަކަކީ ތަރައްގީގެ ނަމުގައި ގައުމުތައް ދަރަނި ދަންތުރައެއްގައި ޖައްސައި، އަޅުވެތިކުރުމުގެ އަމަލެއްގެ ގޮތުގައި ރައީސް ނަޝީދު ގެންދަވަނީ ސިފަކުރައްވަމުންނެވެ. ރައްދުގައި ޗައިނާއިން ބުނަނީ އެގައުމުން ގައުމުތަކުގެ ތަރައްގީއަށާއި އިގްތިސާދީ ކުރިއެރުވުމަށް އެހީތެރިވަނީ އެގައުމަކުން ގަބޫލުކުރާ އުސޫލުތަކާއި ގާނޫނުތަކާއި ގަވާއިދުތަކާ އެއްގޮތްވާގޮތުގެ މަތިންނެވެ. އަދި އަބަދުވެސް ޗައިނާއާ ގައުމުތަކާ ވާހަކަ ދެކެވޭނެ ކަމަށާއި ޗައިނާއަކީ ގައުމުތަކަށް އޮތް ބިރެއްގެ ގޮތުގައި ރައީސް ނަޝީދު ސިފަކުރައްވާތީ، އެފަދައިން ޢަމަލު ނުކުރެއްވުމަށް އެ ގައުމުގެ އޮފިޝަލުން ތަކުރާރުކޮށް ވަނީ ވިދާޅުވެފައެވެ.

މިފަހަރު ރާއްޖޭގެ 56 ވަނަ މިނިވަން ދުވަހާ ގުޅުވައިގެން ރައީސް ނަޝީދު ކުރި ޓްވީޓްގެ ސަބަބުން ޗައިނާގެ ނުރުން އިންތިހާއަށް ބޮޑުވެއްޖެއެވެ. އަދި އެއީ ޗައިނާގެ ސަލާމަތާއި ރައްކާތެރިކަމާ ގުޅިފައިވާ މުހިއްމު މައްސަލައަކާ ގުޅިގެން ރައީސް ނަޝީދު ކުރެއްވި ޓްވީޓެކެވެ. އެ ޓްވީޓަށް މިފަހަރު ޗައިނާ އެމްބަސީން ކޮށްފައިވާ ޓްވީޓްގެ ރާގު ހުރީ ކުރީ ފަހަރުތަކަށްވުރެ ހަރުކަށި އަދި ނުރުހުމުގެ ރާގެއްގައެވެ.

ރައީސް ނަޝީދުގެ މިނިވަން ދުވަހުގެ ޓްވީޓްގައި ވިދާޅުވެފައިވަނީ ސައުތު ޗައިނާ ކަނޑުގައި އޮންނަ ސްޕްރަޓްލީ ރަށްތަކުގެ ވަށައިގެންވާ ކަނޑުގެ ސަރަހައްދުގެ ދަތުރުފަތުރުކުރުމުގެ ހައްގު ހިމާޔަތް ކުރުމަށް އެ ކަނޑަށް އިނގިރޭސި މަނަވަރުތައް ވަނުމަކީ މިނިވަން ދުވަހު އެ މަނިކުފާނަށް ލިބިވަޑައިގަންނަވާ ހިތްހަމަޖެހުމެއް ކަމަށެވެ.

އެޗްއެމްއެސް ކުއީން އެލިޒަބަތު ނަމަކަށް ކިޔާ އެއާ ކްރާފްޓް ކެރިއަރަކާއި އެ ކެރިއަރާއެކު ދަތުރުކުރާ ސްޓްރައިކް ގްރޫޕްގެ މަނަވަރުތައް ޗައިނާގެ އިންޒާރުތަކަށް ބެލުމެއް ނެތި، މި ހަފުތާގައި ވަނީ ޗައިނާ އިން މިލްކުވެރިކަމަށް ދައުވާކުރާ ސައުތު ޗައިނާ ކަނޑަށް ވަދެފަ އެވެ. އެ ކެރިއަރާއެކު އިނގިރޭސި ރޯޔަލް ނޭވީގެ ހަ މަނަވަރަކާއި ސަބްމެރިންއަކާއި އެމެރިކާގެ މަނަވަރަކާއި ނެދަލޭންޑްސްގެ މަނަވަރެއް ދަތުރު ކުރާ ކަމަށް މިހާރު ނޫހުން ރިޕޯޓްކޮށްފައިވެއެވެ.

ނަޝީދުގެ ޓްވީޓަށް ރައްދު ދީ، ރާއްޖޭގައި ހުންނަ ޗައިނާގެ އެމްބަސީން ކުރި ޓްވީޓެއްގައި ބުނީ، ޗައިނާގެ ވަށައިގެންވާ ކަނޑުގެ ސަރަހައްދާއި އެ ކަނޑުން ބައިނަލްއަގްވާމީ ގާނޫނުތަކާ އެއްގޮތަށް ދަތުރުކުރުމުގެ ހައްގަށް އެ ގައުމުން އިހުތިރާމް ކުރާ ކަމަށެވެ.

ރައީސް ނަޝީދުގެ ޓްވީޓާއި އިނގިރޭސިންނާއި ގުޅިފައިވާ މަނަވަރާއި ހަނގުރާމަމަތީ ފްލީޓްގެ އަމަލާމެދު ނުރުހޭކަން ހާމަކޮށްދިނުމުގެ ގޮތުން ރާއްޖޭގައި ހުންނަ ޗައިނާ އެމްބަސީން ރައީސް ނަޝީދު ޓެގްކޮށް ކުރި ޓްވީޓުގައި ބުނެފައިވަނީ އަސްކަރީ ބާރު ދައްކައި ޗައިނާ އަށް ބިރު ދައްކަން އުޅުމަކީ އެ ގައުމުގެ ސަލާމަތާއި ރައްކާތެރިކަމަށް އޮތް ބިރެއް ކަމަށެވެ. އަދި އެފަދަ ކަންކަމުގެ ސަބަބުން ސަރަހައްދީ ހަމަޖެހުން ގެއްލޭނެ ކަމަށެވެ.

ސައުތު ޗައިނާ ސީގެ ބައެއް ރައްތަކާއި ބައެއް ސަރަހައްދުތަކުގެ މިލްކުވެރިކަމާމެދު އަވަށްޓެރި ގިނަ ގައުމުތަކުން އަބަދުވެސް ދައުވާކުރެއެވެ. އެހެންނަމަވެސް އަސްކަރީ މަރުކަޒުތައް ގާއިމްކޮށް ޗައިނާގެ ބާރު އެ ސަރަހައްދުގައި ބޮޑުކޮށްފައިވަނީ އެގައުމުން ބުނި ގޮތުގައި، ގައުމުގެ ސަލާމަތާއި އިސްތިގުލާކަށް ގެއްލުން ވެދާނެތީއެވެ.

ރައީސް ނަޝީދަކީ އަބަދުވެސް އިންޑިޔާއާއި އެމެރިކާ އަދި އިނގިރޭސިވިލާތަށް ތާޢީދުކުރައްވާ ބޭފުޅެކެވެ. އަދި އިންޑިއާ އަށް ވަޑައިގަންވާ ކޮންމެ ފަހަރަކު އެގައުމުގެ މީޑިޔާތައް މެދުވެރިކޮށް ޗައިނާއަށް ވަރަށް ބޮޑަށް ފާޑު ވިދާޅުވެފައިވެއެވެ. މިއީ ރާއްޖެ ފަދަ ކުޑަ އަދި ނާޒުރު އިގްތިސާދެއް އޮންނަ ގައުމެއްގެ ގާނޫނު ހަދާ މަޖިލީހުގެ އެންމެ މަތީވެރިޔާގެ ހައިސިއްޔަތުން ޢަމަލުކުރެއްވުން އެންމެ ރަނގަޅު ގޮތެއް ނޫނެވެ. ފާޅުގައި ވަކި ގައުމަކާ މިހާ ބޮޑަށް ޖައްސާލުމުގެ ސަބަބުން ރާއްޖެއަށް ފޫނުބެއްދޭނެ ގެއްލުމާއި ދެރަ ލިބުމަކީ ދުރުގައި އޮތް ކަމެއް ނޫނެވެ.