ވިލިމާލެ ކުޑަކުދިންގެ ހިޔާގައި އަލިފާނުގެ ތިން ވަނަ ހާދިސާ ފާއިތުވި ހަފުތާގައި ހިނގާ ދިޔައިރު، އެކަމުގައި ދައުލަތުގެ ހިމާޔަތް ލިބިގެން އެ ހިޔާގައި އުޅޭ ކުދިންގެ ރުޅިވެރި އަމަލެއް ހިމެނޭ ކަމަށް ބެލެވޭ ވަރަށް ބައެއް މަޢުލޫމާތުތައް ހުރީ ތިލަވެފައެވެ. ތަން ހިންގުމާއި ހަވާލުވެވަޑައިގެން ހުންނެވި އެންމެ އިސްވެރިޔާގެ އޮފީހުގައި ގަސްދުގައި، ހިޔާގައި އުޅޭ ކުއްޖަކު ރޯކޮށްލި ކަމަށް ހެކިވާނެ މީހުން އެބަ އުޅެއެވެ. އެއީ ސީއީއޯ މެދު އުފެދުނު ރުޅިވެރިކަމެއްގެ ނަތީޖާއެވެ.
މީގެ ކުރިން ހިޔާގެ ކޮޓަރިއެއްގައި އަލިފާން ރޯކޮށްލީ ވެސް ހަމަ ހިޔާގެ ކުއްޖަކު އައި ރުޅިން ކަމަށް ދެކެވޭ ވާހަކަތަކަށް ބާރުލިބޭ ހެކި އެބަހުއްޓެވެ. އެފަހަރު އެއީ ދެކުދިންގެ ދެމެދުގައި ހިނގި ފިނި ޒުވާބެއްގެ ހޫނު ބަދަލު ހިފުމެއް ކަމަށް ވެއެވެ.
ގަސްތުގައި މީހުންގެ މުދަލަށް ގެއްލުން ދިނުމާއި ހުޅު ޖެހުން ފަދަ ޢަމަލުތަކަކީ ސީދާ ޓެރަރިޒަމްގެ ޢަމަލުތަކެވެ. އެހެންކަމުން ވިލިމާލޭ ކުޑަކުދިންގެ ހިޔާގައި ދައުކަލަތުގެ ހިޔާމަތުގައި "ކުދި ޓެރަރިސްޓުން" އެބަ ހިމެނޭ ނޫން ތޯއެވެ. އަންނަ ރުޅީގައި ގަސްދުގައި ތަންތަނުގައި ހުޅުޖަހައި ރޯކުރަނީއެވެ. މިފަދަ ކޮންމެ ހާދިސާއަކުން ވެސް ދައުލަތަށް އިންތިހާއަށް ގެއްލުން އެބަ ލިބެއެވެ. ބިރުވެރިކަން އެބަ އުފެދެއެވެ.
ހިޔާގެ ހަގީގަތްތައް ދަންނަ މީހަކު ނޫހުގައި ނަން ނުޖެހުމަށް ޝަރުތުކޮށް، ކިޔައިދިން ގޮތުގައި ކުދިންގެ ޢަމަލުތައް ހުންނަ ގޮތުން، އެމީހުން ބަލަހައްޓަން ތިބޭ މީހުންގެ ފަރާތުން އެކަންކަން ހުއްޓުވުމަށް މަސައްކަތްކުރުމުން، ބައެއް ފަހަރު އެމީހުންނަށް ކުދިންގެ އިންޒާރާއި ބިރު ދެއްކުމާ ކުރިމަތިވެއެވެ. އަދި ދައުލަތުގެ އިދާރާތަކަށް ބައެއް ކުދިން ގަސްދުގައި ދޮގު ހަދާ އޮޅުވާލާ ހާލަތްތަކުގައި ވެސް، އެފަރާތްތަކުން ބުރަވަނީ ކުދިންގެ ވާހަކަތަކަށް ކަމަށް ވާތީ، މުވައްޒަފުންނަށް ވެސް އިސްލާހު ކުރުމުގެ ޢަމަލުތައް ކުރިއަށް ނެރުމަށް ފަސް ޖެހެވެނީއެވެ.
މިއީ މުޅި ދައުލަތުގެ ކަމާ ބެހޭ އިދާރާތަކުން އެކުއެކީގައި މަސައްކަތްތައްތަކެއްކޮށް ވަށާޖެހޭ ރަނގަޅު ހައްލެއް ހޯދުމަށް ލަސްނުކޮށް މަސައްކަތްކުރަން ޖެހޭ ވަގުތެވެ. ކުޑަކުދިންގެ ހިޔާގައި ތިބޭ ކުދިން ގަސްދުގައި ތަންތަނުގައި ހުޅުޖެހުމަށް އެއްވެސް ހުއްޖަތެއް ނެތެވެ. އެއީ ޓެރަރިޒަމްގެ ޢަމަލެކެވެ. ޖެހޭނީ އެކަހެރިކޮށް އެމީހުން ރީހެބިލިޓޭޓް ކުރުމުގެ ޚާއްސަ ޕްރޮގްރާމެއް ހިންގާށެވެ. ނޫނީ އެމީހުންގެ މައްޗަށް ވެސް ގާނޫނު ހިންގައި، ގާނޫނު ދަންނަ އުސޫލެއްގެ ތެރެއިން އެމީހުން އިސްލާހު ކުރުމުގެ މަސައްކަތްކުރުމެވެ.
ގުދަނުގައި ރޯވެއްޖެއެވެ. ކުދިން އުޅޭ ކޮޓަރިއެއްގައި ރޯވެއްޖެއެވެ. އެންމެ ފަހުން ވެރިމީހާގެ އޮފީސް އަނދައިފިއެވެ. މިއިން ކޮންމެ ހާދިސާއެއްގެ ފުނަން ފީނާ ބަލާއިރުވެސް ތަނުގައި ތިބޭ ކުދިންގެ ނުކަސިޔާރު އަމަލުތަކާ މިހާދިސާތަކާ ގުޅުވާލެވެއެވެ.
ކުޑަކުދިންގެ ހިޔާގައި އުޅެން ފުރުސަތު ލިބުމަކީ ބޭނުން ކޮންމެ ގޮތަކަށް އުޅެން ލިބޭ ލައިސެންސެއް ނޫނެވެ. ހިފެހެއްޓުންތައް ގިނަކޮށް، ހިމާޔަތް ފުޅާކުރަން ވިސްނުން އިސްކުރާށެވެ. ކުދިންގެ ނޭއްގާނީ ކޮންމެ އަމަލަކީ ފަސްއަޅާ ފޮރުވަން ޖެހޭ ވަރަށް ވުރެ މާ ނާޒުކު ކަންކަމެވެ. މިއީ ޕީއާރު ގޭމަކުން ނިންމާލެވޭ ވަރަށް ވުރެ ވޭން ހުރި މަޢުލޫއެކެވެ.
