ކޮވިޑުން ރައްކާތެރި ވުމަށް ވެކްސިން ހޯދުމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހުގެ ލީޑަޝިޕް ދައްކަދީފިކަމަށް ކުރީގެ ނައިބް ރައީސް އަހުމަދު އަދީބު އިސްވެ އުފައްދަވާފައިވާ މޯލްޑިވްސް ތާރޑްވޭ ޑިމޮކްރެޓްސް (އެމްޓީޑީ)ން ބުނެފިއެވެ.
ރައީސް އިބްރާހިމް މުޙައްމަދު ސޯލިހަށް ތައުރީފް ކުރައްވާ އެމްޓީޑީން ނެރުނު ނޫސްބަޔާނެއްގައި ބުނެފައިވަނީ ގިނަ ގައުމުތަކުގެ މިއަދުގެވެސް ހާލަތަކީ އެގައުމުގެ ރައްޔިތުންނަށް ދޭނެ ވެކްސިންވެސް ނުލިބި އެތައް ބަޔަކު ކޮވިޑް-19 ގެ ބަލީގެ ޝިކާރައަކަށްވެ ނިޔާވަމުން ދިއުން ކަމަށެވެ. އަދި ރައީސް ސޯލިހުގެ ލީޑަރޝިޕްގެ ދަށުން ދިވެހި ރާއްޖެއިން މިވަނީ ކޮވިޑް ކޮންޓްރޯލް ކުރުމާއި ވެކްސިން ހޯދުމުގައި ބޮޑެތި ކުރިއެރުންތަކެއް ހޯދާފައި ކަމަށް އެމްޓީޑީގެ ބަޔާނުގައި ވެއެވެ.
"ރައީސް ސޯލިހްގެ ލީޑަރޝިޕްގެ ދަށުން ރާއްޖެއަށް ބޭނުންވާވަރަށް މިވަނީ ވެކްސިން ހޯދިފައެވެ. މިކަން މިޕާޓީ އިން އުފަލާއި ޝުކުރުވެރިކަމާއި އެކީ ފާހަގަ ކުރަމެވެ. އަދި ރައީސް ސޯލިހު އިންސާނިއްޔަތުކަން އިސްކުރައްވާ ރާއްޖޭގައި މަސައްކަތް ކުރާ ބިދޭސީން އިސްތިސްނާނުކޮށް ވެކްސިން އެމީހުނަށްވެސް ހިލޭ ޖަހައިދީ، މިހާރު ރާއްޖޭގެ %61 އާބާދީ ދެޑޯޒް ޖަހާ ވެކްސިނޭޝަން ފުރިހަމަކޮށްފިއެވެ. އަދި %70 މީހުން ފުރަތަމަ ޑޯޒް ޖަހައިފިއެވެ. މިއީ ދުނިޔާގެ ފެންވަރުން ބެލިނަމަވެސް ވަރަށް ބޮޑުކުރިއެރުމެކެވެ. މި އާލަމީ ވަބާގެ ތެރޭގައި ޑޮކްޓަރުންނާއި ނަރުހުންނާއި، އެޗް.ޕީއޭ، މޯލްޑިވްސް ރެޑް ކްރެސެންޓް، ޑަބްލިއު.އެޗް.އޯ މާލްޑިވްސް އަދި ފްރަންޓް ލައިންގައި މަސައްކަތް ކުރާ ހުރިހާ ހިދުމަތްތެރިން ކުރައްވަމުންދާ ބުރަ މަސައްކަތް މިޕާރޓީން ހިތުގެ އަޑީން ގަބޫލްކޮށް ޝުކުރުވެރިކަމާއި އެކީ ސެލިއުޓްކުރަމެވެ." އެމްޓީޑީގެ ބަޔާނުގައިވެއެވެ.
ވެކްސިން ނުޖަހާފަރާތްތަކުގެ ތެރޭގައި 18 އަހަރާއި 26 އަހަރުގެ ދެމެދު ޒުވާނުން ގިނަކަން ފާހަގަކޮށް ރައީސް ސޯލިހު ގޮވާލާފައިވާ ގޮވާލުމާއި އެއްގޮތަށް ފަރުދީ އަދި އާއިލީ ޒިންމާއެއްކަން މިކަން ދެކިގެން ވެކްސިން ފުރިހަމަކުރުމަށް ހުރިހާ ޒުވާނުން އަތުކުރި އޮޅާލާ އިސްނަގައިގެން ވެކްސިންޖަހަން ދިޔުމަށް މި ނޫސްބަޔާނުގައި ވަނީ ގޮވާލާފައެވެ.
"ކޮވިޑް-19ގެ އާލަމީ ވަބާ އަކީ ދުނިޔޭގެ ފަހުގެ ތާރީހުގައި ދިމާވި އެންމެ ބޮޑު ސިއްހީ ކާރިސާއެވެ. އަދި ދެމިގެން މިދާ ވަބާގައި އެތައް ބަޔަކު ވަނީ ދުނިޔެ ދޫކޮށް ގޮސްފައެވެ. މިކަމާއި ގުޅިގެން އެޅަން ޖެހުނު ފުރަބަންދުގެ ސަބަބުން ދަތުރުފަތުރުކުރުމާއި އަދި އެހެން ގޮންޖެހުންތަކުގެ ސަބަބުން ބޭސްފަރުވާއަށް ހުރަސްއެޅި އެތައް ބަޔަކު ވަނީ އެހެން ބަލިތަކުގައި ވެސް ދުނިޔެދޫކޮށް ގޮސްފައެވެ. އަދި ނަފްސާނީ ގޮތުން އެތައް މައްސަލަތަކެއް ދިމާވެ އިގްތިސާދީ ގޮތުން އިއާދަ ނުކުރެވޭނެ ވަރުގެ ގެއްލުންތައް އެތައް ގައުމަކަށާއި އެތައް ބަޔަކަށް ވަނީ ކުރިމަތިވެފައިއެވެ. ދުނިޔޭގެ ގައުމުތަކުގައި ކޮވިޑް-19 އާއި ދެކޮޅަށް ބޭނުން ކުރަމުންދާ އެންމެ ބޮޑު ހަތިޔާރަކީ ވެކްސިނޭޝަން އެވެ." މި ނޫސް ބަޔާނުގައި ވެއެވެ.
ވެކްސިން ޖެހުމުގެ މުހިންމުކަން ފާހަގަކޮށް މި ނޫސްބަޔާނުގައި ވަނީ މިކަމަށްވުރެ ބޮޑު ޤައުމީ ކަމެއް މިއަދު ނެތް ކަމަށެވެ.
"އެހެނީ ކޮވިޑުގެ ސަބަބުން އެތައް ބައެއްގެ ދިރިއުޅުން ހަލާކުވެ ގައުމައް ދަނީ އެތައް ބޮޑެތި ގެއްލުންތަކެއް ވަމުންނެވެ. މިއަދު އެންމެ މުހިއްމީ މިކަން ގައުމީ ކަމެއްގޮތުގައި ދެކި މިވަގުތައް ސިޔާސީ ހިޔާލު ތަފާތުތައް އެއްކިބާކޮށް، މުޅި ދިވެހިރާއްޖޭގައި ދިރިއުޅޭ އާބާދީ ވެކްސިންގެ 2 ޑޯޒް ޖަހާ ނިންމުމެވެ. އަދި ކޮވިޑްއިން ވީހާވެސް އަވަހަކަށް އަރައިގަތުމަށް ކުރެވެން ހުރި ހުރިހާ މަސައްކަތެއްކުރުމާއި އެކީ މިކަމުން ސަލާމަތް ކޮށްދެއްވުމަށް އެދި މާތް ﷲ ކިބައަށް ދުއާކޮށް ވަކީލުކުރުމެވެ." މި ބަޔާނުގައި ވެއެވެ.
އެމްޓީޑީއަކީ އެންމެ ގިނަ ޒުވާނުން ބައިވެރިވެގެން މިހާތަނަށް އުފެއްދި ޕާޓީއެވެ. އެ ޕާޓީ އިފްތިތާހުކުރުމުގެ ޖަލްސާގައި ގިނަ އަދަދެއްގެ ޒުވާނުން ބައިވެރިވިއެވެ. މިކަން ވެގެންދިޔައީ އެހެން ޕާޓީތަކަށް ލިބުނު ބޮޑު ހައިރާން ކަމަކަށެވެ.
