ވާދަވެރި ބީލަމުގެ އުސޫލުން ޓެންޑަރ ބޯޑުން ބިޑުތައް ކާމިޔާބުކުރާ ބައެއް ކުންފުނިތަކާއެކު މަސައްކަތު އެއްބަސްވުންތަކުގައި ސޮއިކުރުމަށް ދައުލަތުގެ ބައެއް އިދާރާތަކުން އުޒުރު ދަށްކަމުންދާކަން އިރުވަރު ނޫހަށް ކަށަވަރު ވެއްޖެއެވެ.
ޕްރޮޖެކްޓް ހަވާލުކުރުމުގެ އެއްބަސްވުމުގައި ސޮއިކުރުން ފަސް ކުރަމުން ގެންދަނީ އެއް ކުންފުންޏަކަށް ގިނަ މަސައްކަތްތަކެއް ހަވާލުކުރުމުން މުއްދަތަކަށް ނިންމުމަށް ދަތިވެދާނެކަމަށް ބުނެއެވެ.
"އެއީ ޓެންޑަރ ބޯޑުން ބަލަން ޖެހޭނެ ކަމެއް. ނޫނީ ބީލަކަށް ހުޅުވާލާއިރު އެ ކަންބޮޑުވުން ހައްލުވާ ގޮތަށް ބީލަން ކަރުދާސް އޮންނަން ވާނީ. ޕްރޮޖެކްޓް އެވޯޑުކުރާ ހިސާބަށް ދިޔައިމަ އޮފީހެއްގެ މޭޒު ދޮށުގައި އިންނަ ފަރުދަކަށް މުޅި މަރުހަލާ އަނބުރާލުމުގެ ބާރު އޮވެގެން ނުވާނެ. އެއީ ވަރަށް ނުރައްކާ ކަމެއް،" ނަން މަޝްހޫރު ކޮންސްޓްރަކްޝަން ކުންފުންޏެއްގެ މެނޭޖިން ޑިރެކްޓަރަކު ވިދާޅުވިއެވެ.
ޓެންޓަރ ބޯޑުން އަމަލުކުރަމުން ގެންދަނީ ޕްލޭނިން މިނިސްޓްރީގައި ދަފުތަރު ކޮށްފައިވާ ކުންފުނިތަކުގެ މާލީ އަދި ފަންނީ ގާބިލްކަމަށް ބަލައި އެ ކުންފުންޏެއް ގިންތިކޮށްފައިވާ އުސޫލަށެވެ. އެއުސޫލުގައި އެއް ކުންފުންޏަށް އެއް ފަހަރާ ގިނަ ވެގެން ހަވާލު ކުރެވޭނީ ކިތައް ޕްރޮޖެކްޓްކަން ކަނޑައަޅާފައި އޮވެއެވެ.
ބައެއް ގާނޫނީ ވަކީލުން ވިދާޅުވި ގޮތުގައި ޓެންޑަރ ބޯޑުން ބިޑް ކާމިޔާބުކޮށް އެވޯޑު ލެޓާ އެ ކުންފުންޏަކަށް ފޮނުވުމަށް ފަހު، މަސައްކަތް ހަވާލު ނުކުރަން ދައުލަތުގެ އެއްވެސް މުވައްސަސާއަކުން މަސައްކަތްކުރާނަމަ އެއީ ނުރަނގަޅު ސަގާފަތެއްގެ ފެށުމެވެ. އެއީ ޓެންޑަރ ބޯޑުން ނިންމާ ނިންމުންތައް ދައުލަތުގެ އޮފީހެއްގައި ހުންނަ ޕްރޮޖެކްޓް އޮފިސަރަކަށް ބަދަލުކުރުމުގެ ބާރު ގާނޫނާ ޚިލާފަށް ނެގުމުގެ ޢަމަލެކެވެ. އަދި އެއީ ގުޑް ގަވަނަސްގެ އުސޫލުތަކާ ވެސް ބީރައްޓެހި ޢަމަލެކެވެ.
އިރުވަރު ނޫހަށް އެނގިފައިވާ ގޮތުގައި ޕާރފޮމަންސް ގެރެންޓީ ވެސް ހުށަހަޅާފައި ބައެއް ޕްރޮޖެކްޓްތައް ވެސް ސަރުކާރުގެ ބައެއް އިދާރާތަކުން އެ ޕްރޮޖެކްޓްތަކުގެ އެއްބަސްވުމުގައި ސޮއި ނުކޮށް ގެންދަނީ ލަސްކުރަމުންނެވެ.
"އެ އޮފީހަކުން ބޭނުންވާ ގޮތަކަށް ބީލަމުގެ ޝަރުތުތައް ކަނޑައަޅާފައި ޓެންޑަރ ބޯޑަށް ފޮނުވީމަ ޓެންޑަރ ބޯޑުން މިކުރާ ކަމަކީ ވާދަވެރި ބިޑު އުސޫލުން މަސައްކަތް ހަވާލުކުރާނެ ބަޔަކު މި ހޮވަނީ. އެގޮތަށް ބަޔަކު ހޮވަނީ ހުރިހާ ޝަރުތުތަކެއް ހަމަވޭތޯ ބެލުމަށް ފަހު. އެ މަރުހަލާ ނިމުމުން އެ މަސައްކަތުގެ ބެލެނިވެރި ފަރާތުން އަލުން ޓެންޑަރ ބޯޑަށް ވުރެ ފުޅާ ވިސްނުމެއް ގެންގުޅެ، ޕްރޮޖެކްޓްތައް ކުންފުނިތަކަށް ހަވާލުކުރުން ލަސްކުރުމަކީ ކުންފުނިތަކަށް ވަރަށް ބޮޑެތި ގެއްލުންވާނެ ކަންކަން. އަދި އެއީ ކޮރަޕްޝަނަށް މަގުފަހިވާނެ ކަމެއްވެސްމެ. އެހެންވެތާ ޓެންޑަރ ބޯޑު މެދުވެރިކޮށް ބިޑު ކުރަނީ ވެސް،" ގާނޫނީ ވަކީލަކު ކަންބޮޑުވުން ފާޅުކުރިއެވެ. "ހަގީގަތުގައި ޓެންޑަރ ބޯޑުން ވެސް ބަލަން އެބަ ޖެހޭ އެވޯޑު ކުރާ ޕްރޮޖެކްޓުގެ އެއްބަސްވުންތަކުގައި އިދާރާތަކުން ސޮއިކުރޭތޯ އާއި ނުވަތަ އެކަން ތަންފީޒު ކުރޭތޯ ވެސް."
