ވަންދޫ ކައުންސިލްގެ ނައިބްރައީސް ހުސެއިން އަފީފު އެމްޑީޕީއަށް ސޮއިކުރައްވައިފިއެވެ.
ހުސެއިން އަފީފު އެމްޑީޕީއަށް ސޮއިކުރެއްވީ އެޕާޓީގެ އެންމެ އިސްލީޑަރު އަދި ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު މިއަދު ވަންދުއަށް ކުރެއްވި ޒިޔާރަތުގެ ތެރެއިން ކައުންސިލަރުންނާއެކު ބޭއްވި ބައްދަލުވުމެއްގެ ތެރެއިންނެވެ. ހުސެއިން އަފީފު ވަނީ އެމްޑީޕީއަށް ސޮއިކުރެއްވުމަށް "އެމްޑީޕީގެ އެންމެ އިސް ލީޑަރާ" ފޯމް ހަވާލުކުރައްވާފައެވެ.
ހުސެއިން އަފީފު ކައުންސިލަށް ހޮވުނީ އަމިއްލަގޮތުން ވާދަކުރައްވައިގެންނެވެ. ވަންދޫ ކައުންސިލަށް ދެން އިންތިހާބުވީ އެމްޑީޕީގެ ހަތަރު މެމްބަރުންނެވެ. ހުސެއިން އަފީފު އެމްޑީޕީއަށް ސޮއި ކުރުމާއެކު ކައުންސިލްގެ ހުރިހާ ގޮނޑިއެއް އެމްޑީޕީއަށް މިހާރުވަނީ ލިބިފައެވެ.
މީގެކުރިން އެރަށު ކައުންސިލްގެ އެއްވެސް ގޮނޑިއެއް އެމްޑީޕީއަށް ކާމިޔާބުކުރެވިފައެއް ނުވެއެވެ. ނަމަވެސް ކިނބިދޫ ދާއިރާގެ މެމްބަރު މުޙައްމަދު ނާޝިޒް އެދާއިރާގައި އެމްޑީޕީ ކުރިއަރުވަން ކުރާ މަސައްކަތުން އެދާއިރާގެ އެތައް ބަޔަކު މިހާރު ވަނީ އެމްޑީޕީއާ ގުޅިފައެވެ. އޭގެ ނަތީޖާއެއްގެ ގޮތުން އެދާއިރާގެ ކައުންސިލްގެ ގިނަ ގޮނޑިތަކެއް އެމްޑީޕީއަށް ކާމިޔާބުވިއެވެ.
