2023 ވަނަ އަހަރުގެ ރިޔާސީ އިންތިހާބަށް ޖުމްހޫރީ ޕާޓީން ފުރިހަމައަށް ތައްޔާރު ވަމުން ދާކަމަށް އެ ޕާޓީން ބުނެފިއެވެ.
އިރުވަރު ނޫހަށް މަޢުލޫމާތުދެއްވަމުން ޖުމްހޫރީ ޕާޓީގެ އިސް އޮފިޝަލަކު ވިދާޅުވީ، މީގެކުރިން ރިޔާސީ އިންތިހާބަހަށް ތައްޔާރު ނުވާ މިންވަރަށް ކުރިއަށް އޮތް ރިޔާސީ އިންތިހާބަށް އެޕާޓީން ތައްޔާރު ވަމުންދާ ކަމަށެވެ. އެޕާޓީން ރިޔާސީ އިންތިހާބުގައި ވާދަކުރައްވާނެ ކެންޑިޑޭޓަކު ނިންމާނީ ޕާޓީގެ ކައުންސިލުން ކަމަށް ޖޭޕީގެ އޮފިޝަލް ވިދާޅުވިއެވެ. ޕާޓީގެ ރިޔާސީ ކެންޑިޑޭޓް ވަރަށް އަވަހަށް ހާމަވެގެންދާނެކަމަށް މަޢުލޫމާތުދިން އޮފިޝަލް ވިދާޅުވިއެވެ.
އިރުވަރު ނޫހަށް މަޢުލޫމާތު ލިބިފައިވާގޮތުގައި އަންނަ ރިޔާސީ އިންތިހާބުގައި ޖުމްހޫރީ ޕާޓީން ރިޔާސީ އިންތިހާބުގައި ވާދަކުރައްވާނީ އެޕާޓީގެ ލީޑަރު ޤާސިމް އިބްރާހިމެވެ. ޤާސިމް އިބްރާހިމާ ވާދަކޮށް ރިޔާސީ ޓިކެޓް ހޯދުމަށް މިހާތަނަށް އެޕާޓީގެ އެހެން ބޭފުޅަކު ޝައުޤުވެރިކަން ފާޅުކޮށްފައި ނުވާކަމަށް މަޢުލޫމާތު ލިބެއެވެ. މިފަހަރުގެ ރިޔާސީ އިންތިހާބަކީ ޤާސިމް އިބްރާހިމް ރިޔާސީ އިންތިހާބުގައި ވާދަކުރައްވާނެ ފަހު ފަހަރު ކަމަށް ވެއެވެ. އެހެންކަމުން 2023 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމަށް ޖުމްހޫރީ ޕާޓީން ވަރަށް ފުރިހަމައަށް ތައްޔާރުވަމުންދާކަމަށް މަޢުލޫމާތު ލިބެއެވެ.
ރާއްޖޭގައި މިވަގުތު ތިއްބެވި ސިޔާސީ ލީޑަރުންގެ ތެރެއިން ޤާސިމް އިބްރާހިމަކީ ރައީސުލްޖުލްޖުމްހޫރިއްޔާ ކަމަށް ޓެސްޓް ކުރެވިފައިނުވާ ލީޑަރެކެވެ. އެހެންކަމުން މިފަހަރުގެ ރިޔާސީ އިންތިހާބުގައި ޤާސިމް ވާދަކުރައްވައިފި ނަމަ އެމަނިކުފާނަށް އިންތިހާބު ކާމިޔާބު ކުރުމުގެ ފުރުޞަތު ބޮޑުކަމަށް ސިޔާސީ މަޝްރަހު ދިރާސާ ކުރާ ފަރާތްތަކުން ބުނެއެވެ.
