އެވިޑް ކޮލެޖާއި އޭޝިއަން އެކަޑެމީ އޮފް އޭރޯނޮޓިކްސްއާއި ދެމެދު ސޮއިކުރި ސޭލްސްޕަރޗޭސް އެގްރީމެންޓް އުވާލައިފިއެވެ.
މި އެއްބަސްވުން އުވާލިކަން ހާމަކުރައްވާ އެވިޑް ކޮލެޖްގެ ޗެއަރމަން ޢަބްދުﷲ މުސްތާޤް ރަޝާދު ވިދާޅުވީ އެވިޑް ކޮލެޖުން ޕްލޭން ތަކެއްކޮށް އެކަން ކާމިޔާބު ކުރުމަށް ގިނަ މަސައްކަތްތަކެއް ކުރެވުނު ކަމަށެވެ. ނަމަވެސް އެއްބަސްވުން އުވާލަން ޖެހުނީ ތަކުރާރުކޮށް ކުރި މަސައްކަތުންވެސް ބައެއް މުއައްސަސާތަކުން މިކަމަށް ލިބެންޖެހޭ އެއްބާރުން ނުލިބޭތީ އިތުރަށް ކުރިއަަށްދެވޭނެ އެއްވެސް ގޮތެއް ނެތިގެން ކަމަށެވެ.
ފްލައިން ސްކޫލް ހިންގުމަށް އެވިޑުން ވަނީ މިހާތަނަށް ހަތަރުމިލިއަން ރުފިޔާއަށްވުރެ ގިނަ ރުފިޔާ ޚަރަދުކޮއްފައި ކަމަށާއި، މި އެއްބަސްވުން އުވާލަން ޖެހުމަކީ އެވިޑްކޮލެޖަށް ލިބުނު ވަރަށްބޮޑު ގެއްލުމެއްކަމަށް މުސްތާޤް ވިދާޅުވިއެވެ.
ފްލައިން ސްކޫލް ހިންގުމުގެ އެއްވަސްވުމުގައި އެވިޑު ކޮލެޖުން ސޮއިކުރީ މިއަހަރު ޖޫން މަހުގެ 24 ވަނަދުވަހުއެވެ.
