ރާއްޖޭގައި މަސްވެރިކަން ކުރާގޮތް ޒުވާން މަސްވެރިޔާ ސާޖިންގެ ވީޑިއޯތައް މެދުވެރިކޮށް އިނގިރޭސިވިލާތުގެ މިނިސްޓަރ އޮފް ސްޓޭޓް ފޮރ ޕެސިފިކް އެންޑް އެންވަރަމެންޓް، ޒެކް ގޯލްޑް ސްމިތުގެ ސަމާލު ކަމަށް ގެެނެސްފިއެވެ.
ސާޖިން ހިއްސާކުރި ވީޑިއޯއަކީ ރާއްޖޭގައި ތިވާމެއްޓާ ރައްޓެހި ގޮތަށް ކުރަމުންދާ ދޮށީގެ މަސްވެރިކަމުގެ ވީޑިއޯއެކެވެ. ބެލެވޭ ގޮތުގައި ސްޓޭޓް މިނިސްޓަރު އެ ވިދާޅުވީ ރާއްޖޭގައި ކުރާ ދޮށީގެ މަސްވެރިކަމަކީ ދުނިޔެއަށް ހުރި މިސާލެއް ކަމަށެވެ.
މިއާއެކު ބޭރު ޤައުމުތަކުގެ ގިނަ ބައެއްގެ ސަމާލުކަމަށް މި ވީޑިއޯވަނީ އައިސްފައެވެ. ޒެކް ގޯލްޑްސްމިތުގެ ޓުވިޓަރ ފޮލޯވަރުންގެ އަދަދު 95 ހާހަށްވުރެ ގިނައެވެ.
ޒެކް ގޯލްޑްސްމިތުގެ ރީ-ޓުވީޓަށް މީހުން ކޮމެންޓު ކުރަމުންދާއިރު، ދިވެހިން މަސްވެރިކަން ކުރާގޮތަށް ގިނަ ބަޔަކު ދަނީ ތަޢުރީފް ކުރަމުންނެވެ.
ޒުވާން މަސްވެރިޔާގެ ސޯޝަލް މީޑިއާއަކީ މިވަގުތު މަސްވެރިކަމުގެ ފޮޓޯ އަދި ވީޑިއޯ ހިއްސާކޮށް މަސްވެރިކަމާއި ގުޅުންހުރި މައުލޫމާތު ގެނެސްދިނުމަށް އެންމެ ކުރީގައި އުޅޭ އެއް މީޑިއާއެވެ. ސާޖިންގެ ސޯޝަލް މީޑީއާ ބަލާ އަދަދު އުޅެނީ މަހެއްގެ މަށްޗަށް އެވްރެޖްކޮށް 10 މިލިއަނަށްވުރެ މަތީގައި ކަމަށް ސާޖިން މައުލޫމާތު ދެއެވެ. އެއީ ފޭސްބުކް، ޓްވިޓާ އަދި އިންސްޓަގްރާމް ގެ ޒަރިއްޔާއިން ހިއްސާކުރާ ޕޯސްޓްތަކުގެ “ޕޯސްޓް ރީޗް” އެވެ.
ސާޖިންގެ ވީޑިއޯއަށް ގިނަ އަދަދެއްގެ ބޭރުގެ ފަރާތްތައް ކޮމެންޓުކޮށްފައި ހުރެއެވެ. ދޮޮށީގެ މަސްވެރިކަމަކީ ބޭރުގެ ގިނަ ފަރާތްތަކަށް އެހާ ދެކެ ފަރިތަ ބާވަތެއްގެ މަސްވެރިކަމެއް ނޫނެވެ. އަދި ރާއްޖޭގައި ކުރަނީ މިފަދަ މަސްވެރިކަމެއް ކަން އެނގި ރާއްޖޭގެ މަސްވެރިންނަށް ތަޢުރީފްގެ ބަސްތައް ބުނެފައި ހުރެއެވެ.
