ރާއްޖޭގެ ޖަލުތަކުގައި ކޮވިޑް-19 ފެތުރެމުންދާކަމަށް ޖަލުތައް ބަލައްޓާ މޯލްޑިވްސް ކަރެކްޝަނަލް ސާރވިސްއިން ބުނެފިއެވެ.
ކަރެކްޝަނަލް ސާރވިސްއިން ކުރި ޓްވީޓެއްގައި ބުނެފައިވަނީ މާލޭ ޖަލާއި، ހުޅުމާލޭ ޖަލުގެ އިތުރުން މާފުށީ ޖަލުން ކޮވިޑް ފެނިފައިވާ ކަމަށެވެ. މިގޮތުން މާލޭ ޖަލުން 8 ގައިދީއަކު ކޮވިޑަށް ޕޮޒިޓިވްވެފައިވާއިރު މާފުށީ ޖަލުން ވެސް ގައިދީއަކު ކޮވިޑަށް ޕޮޒިޓިވް ވެފައިވާ ކަމަށް ކަރެކްޝަނަލް ސާރވިސްއިން ބުނެއެވެ.
"ކޮވިޑްގެ އަލާމާތް ހުރެގެން ނެގި ސާމްޕަލް ތަކުން ހުޅުމާލެ ޖަލުން 1 އޮފިސަރަކާއި މާލެ ޖަލުން 8 ޤައިދީއެއްގެ އިތުރުން މާފުށި ޖަލުން 1 ޤައިދީ އަކު ވަނީ ޕޮޒިޓިވް ވެފައެވެ. މިވަގުތު އިތުރު އޮފިސަރުންނާއި ޤައިދީންގެ ސާންޕަލް ދަނީ ނެގެމުން." ކަރެކްޝަނަލް ސާރވިސްއިން ކުރި ޓްވީޓްގައި ބުނެފައި ވެއެވެ.
ޖަލަކީ ފަަސޭހައިން ބަލި ފެތުމުގެ ފުރުޞަތު ބޮޑު ތަނެކެވެ. މިގޮތުން ކުދި ގޮޅިތަކެއްގައި އެކަށީގެންވާ ވަރަށްވުރެ ގިނަ ޤައިދީން ތިބޭއިރު މި އެންމެން ބޭނުންކުރަނީ އެއް ފާހާނާއެވެ. ޖަލުގެ ބޭސްފަރުވާނެ ކަންކަމާމެދު ބޮޑެތި އިހުމާލުތަކެއް ވަމުންދާކަމަށްބުނެ އެފަދަ މައްސަލަތައް ހިއުމަން ރައިޓްސް ކޮމިޝަނަށާއި ކޯޓްތަކަށް ގިނައިން ހުށައެޅެއެވެ. އަދި ބޭސްފަރުވާގެ ކަންކަމުގެ އިހުމާލުގެ ސަބަބުން ކޯޓްތަކުން ބޮޑެތި ކުށްވެރިން ދޫކޮށްފައިވެސް އެބަހުއްޓެވެ.
