ރިޝްވަތަކީ ޤައުމުގެ ތަރައްޤީއަށް އޮތް ބޮޑު ހުރަހެއްކަމާއި އަދި މުޅި ދުނިޔޭގައި ފެތުރިފައިވާ ނުރައްކާތެރި ބޮޑެތި ވަބާތަކުގެ ތެރެއިން ނުރައްކާތެރިކަން ފިލުވައިލަން އެންމެ އުނދަގުލީވެސް ރިޝްވަތުގެވަބާކަމުގައި، މުޅި ރާއްޖޭގެ އެންމެހައި ކަންކޮޅުތަކުގައި މިއަދު ކުރެވޭ ހުކުރުނަމާދުގައި ކިޔުމަށް ކަނޑައެޅިފައިވާ ޚުޠުބާގައި ބަޔާންކޮށްފިއެވެ.
"ރިޝްވަތަކީ ޤައުމުގެ ތަރައްޤީއަށް އޮތް ހުރަހެއް" މި މައުޟޫޢުގައި މިއަދު ދެވޭ ހުކުރު ޚުޠުބާގައި ބުނެފައި ވަނީ، ފިލުވައިލަން އެންމެ އުނދަގޫ ވަބާއަކަށް ރިޝްވަތު ވެފައި ވަނީ އެއީ ވަރަށް ސިއްރު ގޮތެއްގައި ކުރެވެމުންދާ ކަމަކަށް ވާތީއެވެ.
ރިޝްވަތުގެ ވަބާ މުޖުތަމަޢުތަކުގައި ޢާންމުވެފައިވާ ވަރަށް އިޝާރާތްކޮށް ޚުޠުބާގައި ބުނެފައި ވަނީ، މުޖުތަމަޢު ތަކުގައި ކޮންމެވެސް ގޮތަކުން ކޮންމެވެސް މިންވަރެއްގެ ރިޝްވަތަކާނުލައި އެއްވެސް ކަމެއް ނުކުރެވޭ މިންވަރަށް ރިޝްވަތު ޢާންމުވެފައި ވާކަމަށެވެ. ޢަދުލު އިންޞާފު ޤާއިމު ކުރުމަށް ހުންނަ އިދާރާތަކުގައި ވެސް ރިޝްވަތާއި ރިޝްވަތުގެ ޢަމަލުތައް އިތުރުވެފައިވުމުގެ ސަބަބުން ތަނުގެ ޢަދުލު އިންޞާފު ގެއްލި އެތައް ބަޔަކަށް ލިބެންޖެހޭ ޙައްޤުތައް ނުލިބި އެތައް ބައެއްގެ ކަންތައްތައް އެތައް ދުވަހަކަށް ލަސްވެ، އަނެއް ބައެއްގެ ކަންތައްތައް އަވަހަށް ނިމިގެންދާ ކަމަށާއި އަދި އެއްބަޔަކަށް ޙައްޤުވާ އެތައް ކަމެއް އެބައި މީހުންނަށް ނުލިބި އެ ކަންކަން ޙައްޤުނުވާ އެތައް ބަޔަކަށް ލިބިގެންދާކަމަށްވެސް މިއަދު މުޅި ރާއްޖޭގައި ކިޔުމަށް ހަމަޖެހިފައިވާ ހުކުރު ޚުޠުބާގައި ބަޔާންކޮށްފައި ވެއެވެ.
"އަޅުގަނޑުމެންގެ މިކުޑަކުޑަ މުޖުތަމަޢުވެސް މި ނުރައްކާތެރި ވަބާގައި ވަނީ ޖެހިފައެވެ. ރިޝްވަތާއި ނާޖާއިޒު ފައިދާއާއި ޚިޔާނާތުގެ ޢަމަލުތައް މުޖުތަމަޢުގައި ގިނަވެ އެކަމަކީ ވަރަށް އާދައިގެކަމެއްކަމަށް މުޖުތަމަޢުގެ ބައެއް މީހުން ވަނީ ދެކެންފަށާފައެވެ."
ދިވެހިމުޖުމަތަޢުގެ ތެރޭގައިވެސް ރިޝްވަތު ޢާންމުވެފައިވާ މިންވަރު ފާހަގަކޮށް ޚުޠުބާގައި ބުނެފައި ވެއެވެ.
"ތިމާއަށް ޙައްޤުނޫން ކަމެއް ނުވަތަ ޙައްޤު ނޫން އެއްޗެއް ލިބިގަތުމަށް ނުވަތަ ތިމާ ކަމަކުން ބަރީއަވެ ސަލާމަތްވުމަށް ފައިސާ ނުވަތަ އެ ނޫންވެ. މިސް އެއްޗެއް މިހަކަށް ނުވަތަ ބަޔަކަށް ހޯދައި ދިނުން" އަކީ ރިޝްވަތުގެ މަފްހޫމު ނުވަތަ މާނަކަމަށް ބަޔާންކުރުމާއެކު، އެކަމުގެ ނަތީޖާއަކީ، ޤައުމާއި މުޖުތަމަޢު ހަލާކުގެ ތެރެއަށް ވެއްޓިގެން ދިއުމަށް މެދުވެރިވެގެން ދިއުމުގެ އިތުރުން ޤައުމުގެ ތަރައްޤީގެ ދުވެލި މަޑުޖެހި ކުރިއެރުމަށް ހުރަސް އެޅުންކަންވެސް ޚުޠުބާގައި ފާހަގަކޮށްފައި ވެއެވެ.
ޤަވާޢިދާ ޚިލާފަށް ކަންތައް ނިންމުމަށް ނުވަތަ ކުރުމަށް ދޭ ފައިސާ އާއި ތަކެއްޗާއި ކެއުމާއި ސައި އަދި މިނޫން ވެސް މިފަދަ މަންފާތައް ޙައްޤު ނޫން ފަރާތްތަކަށް ހޯދައި ދިނުންވެސް ރިޝަވަތުގެ ތެރެއަށް ވާންނާނެކަން ބަޔާންކުރުމާއެކު، އެފަދަ ކަންކަމަކީ އިސްލާމްދީނުގައި ޙަރާމް ކުރައްވަފައިވާ ބޮޑެތި ފާފަތަކުގެ ތެރެއިން ފާފަ ތައްކަމުގައި ޚުޠުބާގައި ބުނެފައި ވެއެވެ.
ވައްކަމުގެ މައްސަލަ ތަކުގައްޔާއި، މަސްތުވާތަކެތި ފަދަ މައްސަލަތަކުގައި ތުހުމަތު ކުރެވި ބަންދުކުރެވިފައިވާ މީސްމީހުންގެ އަތުން ހަދިޔާ އަތުލުމާއި، އެކިއެކި މަޤާމުތަކުގައި އެކިކަންތަކާއި ހަވާލުވެގެން އުޅޭ މުވައްޒަފުންނަށް ހަދިޔާ ދިނުމަކީ އަދުގެ މުޖުތަމަޢުގެ ތެރެއިން އެންމެ ޢާންމުކޮށް ފެންނަ ރިޝްވަތުގެ ވައްތަރުކަން ފާހަގަކޮށް، އެފަދަ އެއްވެސް ކަމެއްވެސް އިސްލާމް ދީނުގައިވެސް ހުއްދަނުވާނެކަން، މިއަދު ކިޔުމަށް ހަމަޖެހިފައިވާ ޚުޠުބާގައި ބަޔާންކޮށްފައި ވެއެވެ.
ރިޝްވަތަށް މަގުފަހިވާ ބައެއް މުހިންމު ސަބަބުތައް ފާހަގަކޮށް ޚުޠުބާގައި ހާމަކޮށްފައިވާ ކަންކަމުގެ ތެރޭގައި، އެފަދަ ޢަމަލުތަކުގައި ބައިވެރިވާ މީހުންގެ އީމާންތެރިކަމެއް ނެތުމެމާއި، ރިޒުޤު ދެއްވާ ފަރާތަކީ މާތް ﷲ ކަން ޤަބޫލު ނުކުރެވުމުމަކީ އެންމެ ފުރަތަމަ އަދި މައިގަނޑު ސަބަބުގެ ގޮތުގައި ފާހަގަކޮށް ބުނެފައި ވެއެވެ.
ތިމާއަށް ލިބޭމިންވަރަށް ޝުކުރުވެރި ނުވުމާއި ތިމާއަށްވުރެ ތަނަވަސްކަމުގައި އުޅޭ މީހުން އުޅޭ ގޮތަށް އުޅޭހިތްވެ މާއަވަހަށް މުއްސަނދިވާން ބޭނުންވުމާއެކު، ރިޝްވަތުގެ ގޮތުގައި ފައިސާ އާއި ތަކެތި ހޯދިކަމުގައި ވިޔަސް އެތަކެތީގައި ބަރަކާތް ނުހުންނާނެކަމާއި އަދި އެ ގޮތަށް އުޅެން ވެއްޖެނަމަ މުޅި ޢުމުރުގައިވެސް އުޅެންޖެހޭނެ ގޮތަކީ އެއީކަން ހިތަށް ނޭރުމަކީ، ރިޝްވަތުގެ ހުތުރު ފާފައިގައި ޖެހެވެން މެދުވެރިވާ ދުނިޔެވީ މައިގަނޑު ސަބަބުތަކުގެ ގޮތުގައި ޚުޠުބާގައި ބަޔާންކޮށްފައި ވެއެވެ.
މީހަކަށް ލިބޭ އާމްދަނީ މަދުވުމަކީ އެ މީހަކު ރިޝްވަތު ހިފުމަށް ނުވަތަ ދީނުގައި ޙަރާމް ކުރައްވައިފައިވާ އެނޫންވެސް ކަންތަކަށް އަރައިގަތުމަށް މަޖުބޫރުކުރުވާ ކަމެއް ނޫންކަމާއި، މާތް ﷲ ގެ ހެޔޮމިންވަރަށް އީމާންވެ، އެ މީހެއްގެ ޢަމަލުތައް އިޞްލާޙުކޮށް ޢިއްޒަތުއްނަފުސު ރައްކާތެރިކުރުމާއެކު އެމީހެއްގެ ރިޒުޤު ތަނަވަސްކޮށްދެއްވުމަށް އެދި ﷲ ގެ ޙަޟްރަތުގައި ދަންނެވުމުން، ކޮންމެ ނަފުސަކަށްވެސް ރިޒުޤުދެއްވަނީ ﷲ ކަމުގައި ވީހިނދު، އެ ގޮތަކީ އެމީހާއަށް އެންމެ ރަނގަޅު ގޮތް ކަމަށްވާނަމަ އެގޮތް މާތް ﷲ ހިންމަވައި ދެއްވާނެކަން ފާހަގަކޮށް، ތަރައްޤީއަށް އޮތް މިބޮޑު ހުރަސް އަދި ފިލުވައިލަން އެންމެ އުނދަގޫ ވަބާކަމުގައިވާ ރިޝްވަތުގެ ޢަމަލުން ދުރުވެތިބުމުގެ އެންމެ އެކަށޭނަ މަގުވެސް، މުޅި ރާއްޖޭގެ އެންމެހައި ކަންކޮޅުތަކުގައި ކިޔުމަށް މިއަދު ކަނޑައެޅިފައިވާ މިއަދުގެ ހުކުރު ޚުޠުބާގައި ބަޔާންކޮށްދީ ހަނދާންކޮށްދީފައި ވާކަންވެސް ފާހަގަކޮށްލެވެއެވެ.
advertisment
advertisment
