މަގާމަކަށް ކުރިމަތިލާންކެރެން ވާނީ ތިމާ ބޭނުންވެގެން ރައްޔިތުންނަށް ހިދުމަތެއްދޭންކަމަށް މާލޭ ސިޓީގެ މޭޔަރު ކަމަށް ކުރިމަތިލައްވާފައިވާ ކުރީގެ ޕޮލިސް ކޮމިޝަނަރ ހުސެއިން ވަހީދު ވިދާޅުވެއްޖެއެވެ.
ސީޕީ ހުސެއިން ސޯޝަލް މީޑިއާގައި އާންމުކުރެއްވި ޕޯސްޓެއްގައި ވަނީ މިހާތަނަށް ޕީީޕީއެމް ޕީއެންސީގައި ހިމެނޭ އިތުރު މެމްބަރަކު މޭޔަރު ކަމަށް ކުރިމަތި ލާން އުޅޭކަމެއް އެނގިވަޑައި ނުގަންނަވާ ކަމަށެވެ. ހުސެއިން އެ ވިދާޅުވީ ރައީސް ޔާމީން ދައުރުގައި ރައީސް އޮފީހުގެ މިނިސްޓަރު އާޒިމާ ޝުކޫރުގެ ވާހަކައެވެ. އާޒިމާ ވަނީ މާލޭގެ މޭޔަރު ކަމަށް ވާދަކުރައްވާނެ ކަމަށް އިއުލާން ކުރައްވާފައެވެ. އަދި މާލޭ ސިޓީގެ މޭޔަރު އަދި އިންތިހާބީ ރައީސް ޑރ. މުގައްމަދު މުއިއްޒުގެ ތާއީދު ވެސް އޮތީ އެކަމަނާއަށް ކަމަށް ވަނީ ވިދާޅުވެފައެވެ. ނަމަވެސް އާޒިމާއަކީ ޕީޕީއެމް ނުވަތަ ޕީއެންސީގެ ދަފްތަރުގައި ހިނެނޭ މެމްބަރެއް ނޫނެވެ. ނިމިގެންދިޔަ ރިޔާސީ އިންތިހާބުގައިވެސް ޕީޕީއެމް ޕީއެންސީ ކޯލިޝަންގެ ކެމްޕެއިނަކުން އެކަމަނާ ފެނިފައެއް ނުވެއެވެ.
ހުސެއިން ވިދާޅުވީ، ޕީޕީއެމް ޕީއެންސީ ކޯލިޝަންގެ ޕްރައިމަރީއެއް އޮތިއްޔާ އެކަމަށް ތައްޔާރު ކަމަށާއި ނަމަވެސް އެކޯލިޝަނުން އިތުރު މެމްބަރަކު މޭޔަރު ކަމަށް ކުރިމަތިލާން ނިންމާފައިވާކަން އެނގިވަޑައިނުގަންނަވާ ކަމަށެވެ.
"ވޭތުވެދިޔަ ކުރު މުއްދަތުގައި ސިޔާސީ ގޮތުނާއި ދުނިޔަވީކަންކަމަށް މަޝްވަރާކޮށް ބަހުސްކޮށްލާނެ ގިނަ ބަޔަކު އުފެދުމުގައި މަދަދުވެރިއަކަށް ވެވުނީތީ އުފާ ކުރަން الحمدالله. އެ ބާބު ނިމުނީ، އެ ބާބުގެ ތަޖުރިބާއާއި ދަރުހުގެ އަލީގައި އިތުރު ހިތްވަރަކާއި އެކު މުޅިން އައު ބަޔަކު އުފެއްދޭތޯ މަސައްކަތް ވަރަށް އަވަހަށް ފަށާނަން. އިންސާނީ ވަސީލަތް ތަރައްގީ ވުމަށް އެހީތެރިވުމަކީ ވަރަށް ބޮޑު ހިތްހަމަޖެހުމެއް." ހުސެއިން ވިދާޅުވިއެވެ.
ކުރީގެ ޕޮލިސް ކޮމިޝަރު ހުސެއިން ވަހީދަކީ ރައްޔިތުންނާއި ފުލުހުންގެ ލޯބި ލިބިފައިވާ ހިންގުންތެރި ކުޅަދާނަ ލީޑަރެކެވެ. މާލޭ ސިޓީގެ މޭޔަރު ކަމަށް އެންމެ ޤާބިލް ބޭފުޅަކީ ހުސެއިން ކަމަށް ޝައްކު ކުރާނެ މީހަކު ނުހުންނާނެއޭ ބުންޏަސް ދޮގަކަށް ނުވާނެއެވެ.
