މާދަމާއިން ފެށިގެން މަސްވެރިން ބާނާ މަހަށް 48 ގަޑި އިރު ތެރޭގައި ފައިސާ ޖަމާވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ އއ. އަދި ކ. އަތޮޅުގެ ބައެއް ރަށްރަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ކ. ގާފަރަށް ވަޑައިގެން އެރަށުގެ ރައްޔިތުންނާ ބައްދަލު ކުރައްވާ ވާހަކަ ދައްކަވަމުންނެވެ.
ރައީސް ވިދާޅުވީ އެމަނިކުފާނުގެ ރިޔާސީ ވައުދުފުޅާ އެއްގޮތަށް މާދަމާއިން ފެށިގެން މަސްވެރިން ކިރާ މަހަށް 48 ގަޑި އިރު ތެރޭގައި ފައިސާ ޖަމާ ކުރާނެ ކަމަށެވެ. ނަމަވެސް 48 ގަޑި އިރު ތެރޭގައި އަދި ފައިސާ ޖަމާ ކުރެވޭނީ ބޭންކް އޮފް މޯލްޑިވްސްގައި އެކައުންޓު ހުޅުވާފައިވާ މަސްވެރިންނަށް ކަމަށާއި އެހެން ބޭންކްތަކުގައި އެކައުންޓް ހުޅުވާފައިވާ ފަރާތްތަކަށްވެސް 48 ގަޑި އިރު ތެރޭގައި ފައިސާ ޖަމާ ކުރުމުގެ މަސައްކަތް ވަރަށް އަވަހަށް ކުރައްވާނެކަމަށް ރައީސް ވިދާޅުވި އެވެ.
"މާދަމާއިން ފެށިގެން ބީއެމްއެލް ގައި އެކައުންޓެއް އޮވެއްޖެ ނަމަ ކޮންމެ މަސް ދޯންޏަކަށް އެ ދޯންޏަކުން މަސްކިރާތާ ސާޅީސްއަށް ގަޑިއިރުގެ ތެރޭގައި ފައިސާ ޖަމާކުރުމުގެ ކަންތައް އެ އޮތީ ހަމަޖައްސައިދީފަ،" ރައީސް ވިދާޅުވިއެވެ.
މިއީ ފިނޭންސް މިނިސްޓްރީއާއި ބީއެމްއެލްގެ އިތުރުން މިފްކޯއާ ދެމެދު ހެދުނު އެއްބަސްވުމެއްގެ ދަށުން ހަމަޖެހިގެން ދިޔަ ކަމެއްކަން ރައީސް ވަނީ ފާހަގަ ކުރައްވާފަ އެވެ.
ރައީސް ވިދާޅުވީ މަސްވެރިންގެ އަޑު އަހައިގެން މަސްވެރިން ބޭނުންވާ ގޮތަށް މަސްވެރިކަމުގެ ސިނާއަތް ގެންގޮސްދެއްވާނެ ކަމަށެވެ.
