ފުވައްމުލައް ސިޓީގައި ނެޓްވޯކް ހަދައިގެން މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް ހަރަކާތްތެރިވާކަމުގެ ތުހުމަތުގައި 2 މީހަކު ހައްޔަރުކޮށް ގިނަ ބައެއްގެ އެކައުންޓްތައް ހިފަހައްޓައިފި އެވެ.
ފުލުހުން ނެރުނު ނޫސް ބަޔާނެއްގައި ބުނެފައިވަނީ މިއީ މަސްތުވާތަކެތީގެ ވިޔަފާރިއާ ދެކޮޅަށް ފުވައްމުލަށް ސިޓީގައި ޖެނުއަރީ 14، 2024 ވަނަ ދުވަހުން ފެށިގެން ”އޮޕަރޭޝަން ވެށި ރައްކަލް“ ގެ ނަމުގައި ހިންގަމުންދާ ހާއްސަ ޖޮއިންޓް އޮޕަރޭޝަނެއްގެ ދަށުން ކުރެވުނު މަސައްކަތެއް ކަމަށެވެ.
ފުލުހުން ބުނީ މި މައްސަލައިގައި ހައްޔަރުކޮށްފައިވަނީ ޏ. ފުވައްމުލަށް، ދޫޑިގަން، ކަރަންކާވިލާ، އަހުމަދު ނިއުޝާދް (34އ) އާއި ޏ. ފުވައްމުލަށް، ދޫޑިގަން، ޒަމާނީގެ، ހަސަން އާޒިމް (29އ) އެވެ. މި ދެ މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުން ޑިސެމްބަރު 9، 2024 ވަނަ ދުވަހު އެވެ.
ފާއިތުވި 5 އަހަރު ދުވަހުގެ ތެރޭގައި ނިއުޝާދުގެ ބޭންކް އެކައުންޓް މެދުވެރިކޮށް 21 މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށާއި ފާއިތުވި 2 އަހަރުގެ ތެރޭގައި އާޒިމްގެ ބޭންކް އެކައުންޓް މެދުވެރިކޮށް 7 މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާކަން ތަހުގީގަށް ހޯދިފައިވާކަމަށް ފުލުހުން ބުނެ އެވެ.
މީގެ އިތުރުން މި މައްސަލައާ ގުޅިގެން 21 މީހަކާއި 2 ކުންފުންޏެއްގެ އެކައުންޓްތައް ކޯޓު އަމުރެއްގެ ދަށުން ހިފަހައްޓާފައިވާ ކަމަށާއި މި ފަރާތްތަކުގެ މައްޗަށް ތުހުމަތު ކުރެވޭ މަނީ ލޯންޑަރިންގެ މައްސަލަ ފުލުހުން ތަހުގީގު ކުރަމުންދާކަމަށް ފުލުހުން ބުނެ އެވެ
”އޮޕަރޭޝަން ވެށި ރައްކަލް“ ދަށުން މިހާތަނަށް 4،048 ހޮޓްސްޕޮޓް ބަލައި ފާސްކޮށް، 1،147 މީހުން ހުއްޓުވާ ސުވާލުކޮށް ބަލާ ފާސްކޮށް، 58 މީހަކު ހައްޔަރުކޮށްފައިވާކަމަށް ފުލުހުން ބުނެ އެވެ. އަދި ހައްޔަރު ކުރި މީހުންގެ މައްޗަށް ތުހުމަތު ކުރެވޭ ޖުމުލަ 75 މައްސަލައެއް ތަހުގީގުކޮށް، 65 މައްސަލައެއްގެ ތަހުގީގު ނިންމާ ޕީޖީ އޮފީހަށް ފޮނުވާފައިވާކަމަށްވެސް ބުނެފައިވެ އެވެ.
