އާދަމުގެ ދަރީންގެ ތެރޭގައި ހިމެނުނު އެންމެ މަތިވެރި އަޚްލާޤެއްގައިވާ ޝަޚްޞިއްޔަތަކީ، މިއުއްމަތުގެ ނަބިއްޔާ އަދި މުސްލިމުންގެ ނަމޫނާ، محمد صلى الله عليه وسلم ކަމުގައި ވިދާޅުވެ ޖަމްޢިއްޔަތުލް ސަލަފްގެ ރައީސް ޝައިޚް ޢަބްދުﷲ ބިން މުޙައްމަދު އެޙަޤީޤަތް ތަކުރާރުކޮށް ހަނދާންކޮށްދެއްވައި ފިއެވެ.
މިފަދައިން ހަނދާންކޮށްދެއްވައި ޝައިޚް ޢަބްދުﷲ މިއަދު ކުރެއްވި ޓްވީޓުގައި، މީސްތަކުންގެ ޙިސާބު އަވަސް ކޮށްދެއްވުމަށް ޤިޔާމަތް ދުވަހު ﷲ ގެ ޙަޟްރަތުގައި ދެންނެވުމުގެ ޙައްޤުވެރިޔަކީވެސް محمد صلى الله عليه وسلم ކަމަށް ވިދާޅުވެ އެޙަޤީޤަތްމަތިންވެސް ހަނދާންކޮށްދެއްވާފައި ވެއެވެ.
ޤިޔާމަތްދުވަހުގެ ބިރުވެރިކަމަކީ އިންތިހާ ބިރުވެރިކަމެކެވެ. އެދުވަހުގެ ބިރުވެރިކަމާހުރެ މީސްތަކުން އެބައިމީހުންގެ މައިންބަފައިންނާއި އަނބިދަރީން ދޫކޮށް އަމިއްލަ ޖާނައިގެން ފިލަން ދުވާނެކަމުގައިވެސް ކީރިތި ޤުރުއާނުގައި މާތް ﷲ މީސްތަކުންނަށް ހަނދާންކޮށްދީފައި ވެއެވެ.
ޤިޔާމަންދުވަހުން މީސްތަކުން މަޙްޝަރުކުރެވޭނީ މައިންގެ ބަނޑުން އުފަންވީގޮތަށް "އޮރިޔާން" ޙާލުގައިކަމަށް މާތް ﷲ ގެ ނަބިއްޔާ ވިދާޅުވުމުން މުސްލިމުންގެ މައިކަމަނާ ޢާއިޝަތުގެ ފާނުގެ ހިތްޕުޅުގައި އެކަމާމެދު ސުވާލުއުފެދި، އޮރިޔާން ހާލުގައި މީސްތަކުން ތިބޭހިނދު އެއްބަޔަކު އަނެއްނަޔަކަށް ނުބަލާނެތޯ ސުވާލުކުރެއްވުމުން ޢާއިޝަތުގެ ފާނަށް ޖަވާބުދެއްވައި ނަބިއްޔާ ވިދާޅުވެފައިވެއެވެ.
"އޭ ޢާއިޝާއެވެ. އެބައިމީހުން އެފަދަ ކަމަކާމެދު އުޅެވޭވަރަށްވުރެ އެދުވަހުގެ ބިރުވެރިކަން މާ ބޮޑެވެ"
ބިރުވެރި އެ ދުވަހުގައި ޝަފާޢަތްތެރިވުމުގެ ފުރުޞަތު ލިބިވަޑައިގަންނަވާ ހަމައެކަނި އިންސާނާ މިއުންމަތުގެ ނަބިއްޔާ محمد صلى الله عليه وسلم ގެ ޝަފާޢަތުން މަޙްރޫމްވެގެން ހިނގައިދާނެ ބަޔެއްކަމުގައި އަޅަމެން ނުލަށްވާށި….އާމީން
