ޕީޕީއެމް/ޕީއެންސީ މަޖްލިސް 2024 ޕްރައިމަރީގައި ވާދަކުރުމަށް ފޯރމު ހުށަހަޅުއްވާފައިވާ އަހްމަދު ނަސީރު ކެމްޕެއިން އޮފީހެއް މާލޭގައި ހުޅުވައިފިއެވެ.
މާލޭގައި ހުޅުވި މިކެމްޕެއިން އޮފީހަކީ މީގެކުރިން ރައީސް ޑރ.މުހައްމަދު މުއިއްޒުއަށް ކެމްޕޭންކުރުމަށް ނަސީރު އަމިއްލަ ހަރަދުގައި ހަދައި ބޭނުންކުރަމުން އައި ޖަގަހައެކެވެ.
ނަސީރުގެ ކެމްޕޭން ޓީމުން މައުލޫމާތު ދޭ ގޮތުގައި މި ހުޅުވުނު ނަސީރުގެ ކެމްޕޭން އޮފީހުން އިހަވަންދޫ ދާއިރާގެ މަޖްލިސް ޕްރައިމަރީ ކާމިޔާބުކުރުމަށް ވަރަށް ގިނަ ހަރަކާތްތައް ކުރިޔަށްއޮތްތަނުގައި ހިންގާނެކަމަށެވެ. އަދި ހުޅުމާލޭގައި ނަސީރުގެ ކެމްޕެއިން އޮފީހެއް ހުޅުވައި ކެމްޕެއިން ހަރަކާތްތަށް ފުޅާކުރާނެކަމަށް އެޓީމުން އިރުވަރުނޫހަށް މައުލޫމާތުދިނެވެ.
މަޝްހޫރު ވިޔަފާރިވެރިޔާ އަހުމަދު ނަސީރަކީ އިހަވަންދޫ ދާއިރާގައި ޕީޕީއެމް އާލާކޮށް ނެގެހެއްޓުމުގައި އެންމެ އިސްދައުރެއް އަދާކުރި ފަރާތެވެ. މިގޮތުން އެމްޑީޕީގެ ވެރިކަމުގައި އިހަވަންދޫ ދާއިރާގައި ވަޅުޖެހިފައިއޮތް ޕީޕީއެމް ނަގާ ކޮޅަށްޖަހައި އެމްޑީޕީގެ ބޮޑު މެޖޯރިޓީއެއް އޮތް އިހަވަންދޫގެ ކައުންސިލްގެ 7 ގޮނޑީގެ ތެރެއިން 6 ގޮނޑި ޕީޕީއެމަށް ހޯއްދަވައިދެއްވިއެވެ. އަދި ދާއިރާގެ ރަށްރަށުގައި ޕީޕީއެމް ކުރިއަރުވަން ރަށްރަށުގައި ޖަގަހަތައް ހަދައި އަމިއްލަ ހަރަދުގައި އެތަންތަނުގައި ވަސީލަތްތައް ޤާއިމްކޮށްދެއްވިއެވެ.
