އެ މަނިކުފާނާ ދިމާލަށް އަމާޒު ކުރާ ބަހަކާ ގުޅިގެން އެއްވެސް މީހަކަށް ފިޔަވަޅު އަޅައި އަދަބު ނުދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޅ.ކުރެންދޫގައި ވާހަކަފުޅު ދައްކަވމުން ރައީސް ވިދާޅުވީ، އެ މަނިކުފާނާ ގުޅޭ ގޮތުން ސަރުކާރުގެ ކުންފުންޏެއްގެ މުވައްޒަފަކު ސޯޝަލް މީޑިއާގައި ދެއްކި ވާހަކަތަކާ ގުޅިގެން އެ މުވައްޒަފުގެ މަގާމު ދަށްކުރި ކަމުގެ ވާހަކަ ނޫސްތަކުން ފެނިވަޑައިގެންނެވި ކަމަށެވެ.
ރައީސް މުއިއްޒު ވިދާޅުވި ގޮތުގައި އެކަމާ ގުޅިގެން އެ މަނިކުފާނު އެސްޓީއޯގެ މެނޭޖިން ޑިރެކްޓަރަށް ގުޅުއްވައި ކަން ހިނގި ގޮތް ސާފުކުރެއްވި އެވެ. އެކަމަކު، މެނޭޖިން ޑިރެކްޓަރުގެ ޖަވާބުން އެނގިވަޑައިގަތީ އެ މުވައްޒަފާ ގުޅޭ މައްސަލަ އެ އަށް ވުރެ މާ ސީރިއަސްކަން ކަމަށް ރައީސް ވިދާޅުވި އެވެ. އެހެންވެ، އެ މައްސަލަ ބަލާފައިވަނީ އެ ކުންފުނީގެ ޕޮލިސީގެ ތެރެއިން ކަމަށް ވެސް މެނޭޖިން ޑިރެކްޓަރާ ހަވާލާ ދެއްވައި ރައީސް މުއިއްޒު ވިދާޅުވި އެވެ.
ރައީސް ވިދާޅުވީ އެ ކަން ހިނގި ގޮތް ރައްޔިތުންނަށް ސާފުކޮށްދޭން އެ ކުންފުނީގެ މެނޭޖިން ޑިރެކްޓަރުގެ އަރިހުގައި އެދިވަޑައިގެންފައިވާނެ ކަމަށެވެ.
