އިލެކްޝަންސް ކޮމިޝަނުން މިމަހު ބާއްވަން ނިންމެވި 3 ބައި-އިލެކްޝަނެއްގެ ތާރީޚު ފަސްކުުރައްވައިފިއެވެ.
މިމަހުގެ 17ގައި ކޮމިޝަނުން ބާއްވަން ނިންމެވި 3 ބައި-އިލެކްޝަނަކީ ހއ. ތަކަންދޫ ކައުންސިލްގެ އަންހެން މެންބަރާއި ނ. ވެލިދޫ ކައުންސިލްގެ މެންބަރާއި މ. މަޑުއްވަރީ ކައުންސިލްގެ ރައީސް އިންތިޚާބު ކުރުމަށް ބާއްވާ ބައި-އިލެކްޝަނެވެ.
މީގެ ތެރެއިން ހއ. ތަކަންދޫ ކައުންސިލްގެ އަންހެން މެންބަރާއި ނ. ވެލިދޫ ކައުންސިލްގެ މެންބަރު އިންތިޚާބުކުރުމަށް ބައި-އިލެކްޝަން ބޭއްވުމަށް ކޮމިޝަނުން ކުރިން ނިންމަވާފައިވަނީ މާރޗް 17 ވަނަ ދުވަހަށެވެ. އަދި މ. މަޑުއްވަރީ ކައުންސިލްގެ ރައީސް އިންތިޚާބު ކުރުމަށް ބައި-އިލެކްޝަން ބާއްވަން ކޮމިޝަނުން ކުރިން ނިންމަވާފައިވަނީ މާރޗް 30 ވަނަ ދުވަހަށެވެ.
އިލެކްޝަންސް ކޮމިޝަނުން ހާމަކުރެއްވި ގޮތުގައި މި 3 ބައި-އިލެކްޝަން ވެސް މިހާރު އޮންނާނީ އަންނަ މޭ މަހުގެ 4ވާ ހޮނިހިރު ދުވަހުއެވެ. މިދުވަހު ވޯޓުލުން ކުރިއަށްދާނީ ހެނދުނު 8:00 ފެށިގެން ހަވީރު 16:00 އަށެވެ. އަދި ވޯޓު ގުނަން ފަށާނީ ވޯޓު ނަގާ ނިމޭތާ 30 މިނެޓު ފަހުން ކަމަށާއި ރަސްމީ ނަތީޖާ އިޢުލާނުކުރާނީ މޭ މަހުގެ 6 ވަނަ ދުވަހު ކަމަށް އިލެކްޝަންސް ކޮމިޝަނުން ހާމަކުރައްވައެވެ.
މި ބައި-އިލެކްޝަންގެ ތާރީޚު ބަދަލުކުރެއްވުމަށް ނިންމެވީ އިންތިޚާބުތަކާބެހޭ ޢާންމު ޤާނޫނަށް 5 ވަނަ އިޞްލާޙު ގެނައުމުގެ ޤާނޫނު ތަސްދީޤުކުރައްވައި ގެޒެޓުގައި ޝާއިޢުކުރުމާ ގުޅިގެން ކަމަށް ކޮމިޝަނުން ވިދާޅުވެއެވެ. އިންތިޚާބުތަކާބެހޭ ޢާންމު ޤާނޫނަށް ގެނެވުނު 5 ވަނަ އިޞްލާޙުގައި އޮންނަނީ ރަމަޟާން މަހަކަށް އެއްވެސް އިންތިޚާބެއް ދިމާވާނަމަ އެ އިންތިޚާބެއް ބާއްވަން ވާނީ ރަމަޟާން މަސް ނިމި 10 ދުވަސް ފަހުން ކަމަށެވެ.
