ރޯޑް ޑިވެލޮޕްމަންޓް ކޯޕަރޭޝަން (އާރުޑީސީގެ) 14 މިލިއަން ވުރެ ގިނަ ރުފިޔާގެ ހިޔާނާތުގެ މައްސަލައެއް ފުލުހުން އަންނަނީ ތަހުގީގުކުރަމުންނެވެ. އަދި މި މައްސަލާގައި 3 މީހަކާ ސުވާލުކޮށް ތަހުގީގުކޮށް ނިމުމާކައި ހަމައަށް އައިސްފައިވާކަމަށް މީގެ ހަފްތާއެއްހާ ދުވަސްކުރިން ފުލުހުން ވަނީ ބުނެފައެވެ.
އާރުޑީސީގެ ބޮޑު ހިޔާނާތުގެ މައްސަލަ ބަލަންފެށީ 2022 ވަނަ އަހަރުގެ ސެޕްޓެމްބަރު މަހުއެވެ. މި މައްސަލަގައި 3 މީހެއްގެ އެކައުންޓަށް 14 މިލިއަންއަށް ވުރެން ގިނަ ފައިސާ އާރްޑީސީއިން ފޮނުވާފައިވާ ކަމަށް ފުލުހުން ވަނީ ބުނެފައެވެ. އަދި ސަރުކާރުގެ އިސްވެރިންގެ އެކައުންޓތަކަކަށާއި އާރްޑީސީގައި މަސައްކަތް ކުރާ އެހެން މުވައްޒިފުންގެ އެކައުންޓަށް މި ފައިސާ މި 3 މީހުން ފޮނުވާފައިވާ ކަމަށްވެސް ފުލުހުން ވަނީ ބުނެފައެވެ.
އާރްޑީސީގެ އެކައުންޓުން އެތަނުގެ އެއް މުވައްޒަފުގެ އެކައުންޓަށް 216 ޓްރާންސެކްޝަން ހަދާފައިވާ ކަމަށް ވެސް ފުލުހުން ވަނީ ބުނެފައެވެ. މީގެ އިތުރުން 160 ހާސް ރުފިޔާ ކުންފުންޏާއި ގާތް ގުޅުމެއް ބާއްވާ ފަރާތެއްގެ އެކައުންޓަށް ފޮނުވާފައިވާ ކަމަށް އެ އިދާރާއިން ބުނެ އެވެ. މި މައްސަލަ އާއި ގުޅިގެން 3 ތަނެއް ބަލާ ފާސްކޮށް އެ ތަންތަނުން ބޭނުންވާ އެތައް ބައިވަރު ޑޮކިއުމަންޓުތަކެއް ފެނިފައިވާ ކަމަށްވެސް ފުލުހުންވަނީ ބުނެފައެވެ.
