ރާއްޖޭގެ އެހީތެރިކަމާއިއެކު އިންޑިއާގައި ފުރަތަމަ ފަހަރަށް ސީޕްލޭންގެ ޚިދުމަތް ފަށައިފިއެވެ.
އިންޑިއާގެ ސްޕައިސް ޖެޓް އެއަރލައިނުން މިޚިދުމަތް ފަށާފައިވަނީ، ރާއްޖޭގެ ޤައުމީ އެއަރލައިން މޯލްޑިވިއަންގެ އެހީތެރިކަމާއިއެކުގައެވެ.
މިއަދު މި ޚިދުމަތް ފަށްޓަވައިދެއްވީ، އެ ޤައުމުގެ ބޮޑުވަޒީރު ނަރެންދުރަ މޯދީއެވެ. މިދަތުރާއި ގުޅޭގޮތުން މޯދީއަށް މައުލޫމާތު ދެއްވީ، މޯލްޑިވިއަންގެ ސީޕްލޭން އޮޕަރޭޓްވެސް ކުރާ ދިވެހިން ކްރޫއިންގެ ތެރޭގައި ހިމެނޭ ކެބިން ކުރޫ އިންސްޓްރަކްޓަރ ހުސައިން ފަޒީލެވެ.
މިޚިދުމަތް ފެށުމަށް ތައްޔާރުވުމަށް މިމަހުގެ 25 ވަނަ ދުވަހު ސްޕައިސް ޖެޓް އެއަރލައިނުން ވަނީ، މޯލްޑިވިއަންގެ ބޯޓެއް ޗާޓަރު ކޮށްގެން ގެންގޮސްފައެވެ. އިންޑިއާއަށް ދިޔަ މޯލްޑިއަންގެ ފްލައިޓްގައި ހިމެނެނީ، ދިވެހި ކެޕްޓަނުންނާއި ކްރޫއިންނެވެ.
ސްޕައިސް ޖެޓުން ސީޕްލޭންގެ ދަތުރުތައް ފުރަތަމަ ކުރާނީ، އިންޑިއާގެ އަޙްމަދު އާބާދުން ގުޖުރާތުގެ އަވަށެއް ކަމަށްވާ ކެވަޑިއާ އަށެވެ. މި ދެމެދު ދުވާލަކު 8 ދަތުރުކުރާނެ ކަމަށް އެއެއަރލައިނުން ބުނެއެވެ. މިދެމެދު ކުރާ ދަތުރުތަކުގެ ޓިކެޓުގެ އަގަކީ، ބޮލަކަށް 4800 އިންޑިއަން ރުޕީސްއެވެ. އަދި މިދަތުރުތަކުގައި ބޭނުންކުރަނީ، 14 ފަސިންޖަރުންގެ ޖާގައިގެ ބޯޓެއް ކަމަށް އެއެއަރލައިނުން މައުލޫމާތުދެއެވެ.
