ލާމު އަތޮޅުގައި ފެށި އެންދެރި މަޝްރޫއުގެ ދަށުން ގުދުރަތީ ރައުސްމާލު ވަޒަންކުރުމުގެ މަސައްކަތް މުޅި ރާއްޖެއަށް ފުޅާކުރާނެ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ތާރިޤް އިބްރާހިމް ވިދާޅުވެއްޖެ އެވެ.
އިއްޔެ ލ. ފޮނަދޫގައި ބޭއްވުނު އެންދެރި ސްމޯލް ގްރާންޓްސް 2024 ހަވާލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ތާރިޤް ވިދާޅުވީ، ބޭރުގެ ގިނަ ގައުމުތަކުގައި އެ ބައެއްގެ މުހިންމު ގުދުރަތީ ވަސީލަތްތަކުގެ އަގު ވަޒަންކުރެވިފައިވާ ކަމަށެވެ. ނަމަވެސް، ދިވެހިރާއްޖޭގެ އެންމެ މުހިންމު ވަސީލަތްތައް ކަމުގައިވާ ފަރުތަކާއި، ކުޅިފާޗަސްބިންތަކާއި، މޫދުވިނައިގެ މާހައުލީ ނިޒާމުތައް އަދި ވަޒަންނުކުރެވި އޮތް ކަމަށް މިނިސްޓަރު ފާހަގަކުރެއްވި އެވެ.
އެންދެރި މަޝްރޫއުގެ ދަށުން މި މަސައްކަތް ކުރުމަށް ހަވާލުކޮށްފައިވަނީ އޮސްޓްރޭލިއާގެ ޔުނިވަރސިޓީ އޮފް ނިއު ސައުތް ވޭލްސްއާ ކަމަށް އެންވަޔަރަންމަންޓް މިނިސްޓްރީން މަޢުލޫމާތުދެ އެވެ. މިގޮތުން، ލާމު އަތޮޅުގެ މުރަކަ ފަރުތަކާއި، މޫދު ވިނައާއި، ކުޅިފާޗަސްބިންތަކުގެ މިންވަރާއި ފެންވަރު ބެލުމުގެ ދިރާސާތަކެއް މި އަހަރު ތެރޭގައި ވަނީ ކޮށްފަ އެވެ.
މި މަސައްކަތުގެ ނަތީޖާ އާންމުކުރުމަށާއި ކަމާ ގުޅުންހުރި މުއައްސަސާތަކަށް ބޭނުންވާ ތަމްރީނު ދިނުމަށްޓަކައި ޔުނިވަރސިޓީ އޮފް ނިއު ސައުތް ވޭލްސްގެ ޓީމެއް މި އަންނަ ނޮވެމްބަރު މަހު ތެރޭގައި ރާއްޖެއަށް ޒިޔާރަތްކުރާނެ ކަމަށްވެސް އެންވަޔަރަންމަންޓް މިނިސްޓްރީން ހާމަކޮށްފައިވެ އެވެ.
މި މަޝްރޫއުގެ ސަބަބުން ދިވެހިރާއްޖޭގެ ގުދުރަތީ ވަސީލަތްތަކުގެ އަގު ވަޒަންކުރެވި، އެ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމަށް މަގުފަހިވެގެންދާނެ ކަމަށް ބެލެވެ އެވެ.
