ރާއްޖޭގައި އުޅޭ ހުރިހާ ބިދޭސީންގެ މަޢުލޫމާތު އެއްކޮށް، ޤަވާއިދާ ޚިލާފަށް އުޅޭ ބިދޭސީން ޤަވާއިދުގެ ތެރެއަށް ވެއްދުމަށް ހިންގާ އޮޕަރޭޝަނުގައި މިހާތަނަށް 4000އަށް ވުރެއް ގިނަ ބިދޭސީންގެ ބަޔޮމެޓްރިކް ޑާޓާ އެއްކޮށްފިއެވެ.
އޮޕްރޭޝަން ކުރަނގިއާއި ގުޅޭ ފަހުގެ މައުލޫމާތު ހިއްސާކުރަމުން ދާޚިލީ ސަލާމަތާއި ފަންނިއްޔަތާއި ބެހޭ ވުޒާރައިން ވިދާޅުވީ މީހުން ދިރިއުޅޭ 45 ރަށެއްގައި ކުރަނގި އޮޕަރޭޝަން ފަށާފައިވާކަމަށެވެ. އޭގެ ތެރެއިން 8 ރަށެއްގައި ތިބި ހުރިހާ ބިދޭސީންގެ މައުލޫމާތު އެއްކޮށް ނިންމައިފައިކަމަށް އެ ވުޒާރާއިން ވިދާޅުވިއެވެ.
ދާޚިލީ ސަލާމަތާއި ފަންނިއްޔަތާއި ބެހޭ ވުޒާރާއިން ވިދާޅުވީ މި އޮޕްރޭޝަން ފަށާފައިވާ 45 ރަށުން، ޖުމްލަ 4،272 ބިދޭސީއެއްގެ ބަޔޮމެޓްރިކް ޑާޓާ އެއްކޮށްފައިވާކަމަށެވެ.
އޮޕްރޭޝަން ކުރަނގި ފަށާފައިވާ ބައެއް ރަށްރަށުގެ މަޢުލުމާތު ދާޚިލީ ސަލާމަތާބެހޭ ވުޒާރާއިން ވަނީ ހިއްސާކޮށްފައެވެ.
އެގޮތުން ހއ. ދިއްދޫން 390 ބިދޭސީން، ރ. އަލިފުށިން 178 ބިދޭސީން، ރ. ދުވާފަރުން 140 ބިދޭސީން، ކ. ގާފަރުން 105 ބިދޭސީން، ކ. ހިންމަފުށިން 701 ބިދޭސީންގެ މަޢުލޫމާތު އެއްކޮށްފައިވެއެވެ. މީގެ އިތުރުން ކ. މާފުށިން 1،076 ބިދޭސީން، ލ. ގަމުން 200 ބިދޭސީން އަދި ސ. ހިތަދޫން 114 ބިދޭސީންގެ މަޢުލޫމާތު އެއްކޮށްފައިވާކަމަށް އެވުޒާރާއިން ވިދާޅުވިއެވެ.
ރާއްޖޭގައި އުޅޭ ހުރިހާ ބިދޭސީންގެ ފޮޓޯއާއި އިނގިލީގެ ނިޝާން ނެގުމަށާއި، ޤަވާއިދާ ޚިލާފަށް އުޅޭ ބިދޭސީން ޤާނޫނީ އިމުގެ ތެރެއަށް ފެއްތުމަށް ހިންގާ އޮޕަރޭޝަން "ކުރަނގި" މިހާރު ވަނީ މުޅި ރާއްޖެއަށް ފުޅާކޮށްފައެވެ.
