ޒަމާނާ އެއްގޮތަށް ކުރިއަށް ދާންވާނީ ދީންވެރި ބައެއް ގޮތުގައިކަމަށް ދިވެހި ޒުވާނުންނަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިލްތިމާސް ކުރައްވައިފި އެވެ.
ރައީސް މުއިއްޒު މިހެން ވިދާޅުވީ ދިވެހި ޒުވާނުންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގަ އެވެ.
ރައީސް ކުރެއްވި ޕޯސްޓުގައި ވަނީ ޒަމާނީ އާ ފިޔަވަޅުތަކުގެ މަތީގައި ހަލުވިކަމާއެކު ދިވެހި ޒުވާނުން ދަތުރުކުރުމަށް ގޮވާލައްވާފަ އެވެ. އަދި ކުރިއަށް ދާންވާނީ ދީންވެރި ބައެއްގެ ގޮތުގައިކަމަށްވެސް ރައީސް މުއިއްޒު ވިދާޅުވި އެވެ.
ޒަމާނީ އާ ފިޔަވަޅުތަކުގެ މަތީގައި ހަލުވިކަމާއެކު ދިވެހި ޒުވާނުން ދަތުރުކުރާށެވެ. ގައުމާއި މުޖުތަމައާއި އާއިލާއަށް ވަފާތެރި ދުޅަހެޔޮ ހުލްގުހެޔޮ ދީންވެރި ބައެއްގެ ގޮތުގަ އެވެ.
ކޮންމެ އަހަރެއްގެ އޮކްޓޫބަރު މަހުގެ 22 ވަނަ ދުވަހަކީ ޒުވާނުންގެ ދުވަހުގެ ގޮތުގައި ކަނޑައަޅާފައި 2019 ވަނަ އަހަރު އެވެ.
22 އޮކްޓޫބަރަކީ މީގެ 17 އަހަރު ކުރިން ރައްޔިތުންގެ ހާއްސަ މަޖިލީހުގެ 185 ވަނަ ޖަލްސާއިން، އުމުރުން 18 އަހަރުން މަތީގެ ކޮންމެ ދިވެހި ރައްޔިތަކަށް އިންތިހާބުތަކުގައްޔާއި، ރައްޔިތުންގެ ހިޔާލު ހޯދުމުގެ އާންމު ވޯޓުތަކުގައި ވޯޓު ދިނުމުގެ ހައްގާއި، އިންތިހާބުތަކުގައި، އެކިއެކި މަގާމުތަކަށް ކުރިމަތިލުމުގެ ހައްގާއި، އެ މީހަކު އަމިއްލައަށް ނުވަތަ އެމީހަކު މިނިވަންކަމާއެކު އިހުތިޔާރުކުރާ މަންދޫބުން މެދުވެރިކޮށް، ރައްޔިތުންގެ ކަންތައްތައް ހިންގުމުގައި ބައިވެރިވުމުގެ ހައްގު ލިބިދިނުމުގެ މާއްދާ ފާސްކުރި ތާރީހީ ދުވަހެވެ.
މީގެކުރިން ޒުވާނުންގެ ދުވަސް ފާހަގަކުރަމުން ދިޔަ ތާރީހު އެކި ފަހަރުމަތިން ވަނީ ބަދަލުކޮށްފަ އެވެ. މިގޮތުން، އެންމެ ފުރަތަމަ ގައުމީ ފެންވަރުގައި ޒުވާނުންގެ ދުވަސް ފާހަގަކުރީ 1 މާޗް 1992 ގައެވެ. އޭގެފަހުން ދުނިޔޭގެ ޒުވާނުންގެ ދުވަސް ކަމަށްވާ އޮގަސްޓު މަހުގެ 12 ވަނަ ދުވަސް އެއީ ރާއްޖޭގެ ޒުވާނުންގެ ދުވަހުގެ ގޮތުގައި ފާހަގަކުރަމުން ގެންދިޔަ އެވެ. އަދި ފަހުން މި ދުވަސް ފާހަގަކުރަމުން ގެންދިޔައީ ނޮވެންބަރު މަހުގެ 17 ވަނަ ދުވަހު އެވެ.
