ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަޒީރުންގެ މަޖިލީހަށް ގެނައި ބަދަލާއެކު ތިން މިނިސްޓްރީއަކަށް އައްޔަން ކުރެއްވި ތިން ވަޒީރުންނަށް ރުހުން ދޭން މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ފާސްކޮށްފި އެވެ.
ރައީސް މުއިއްޒު ބަދަލުކުރައްވާފައިވަނީ ފޮރިން މިނިސްޓަރާއި ހެލްތް މިނިސްޓަރާއި ފިނޭންސް މިނިސްޓަރެވެ. އެގޮތުން ފޮރިން މިނިސްޓަރަކަށް ކުރިން ހެލްތް މިނިސްޓްރީގައި ހުންނެވި ޑރ. އަބްދުﷲ ހަލީލް އައްޔަން ކުރެއްވި އިރު ކުރިން ފޮރިން މިނިސްޓަރު ކަމުގައި ހުންނެވި މޫސާ ޒަމީރު އައްޔަން ކުރެއްވީ ފިނޭންސް މިނިސްޓަރުގެ މަގާމަށެވެ. ހެލްތް މިނިސްޓަރަކަށް އައްޔަން ކުރެއްވީ އަބްދުﷲ ނާޒިމް އިބްރާހިމް އެވެ.
މި ބަދަލުތައް ގެންނެވުމަށް ފަހު ރައީސް ވަނީ މި ވަޒީރުންނަށް ރުހުން ހޯދުމަށް މަޖިލީހަށް ފޮނުވާފަ އެވެ. މަޖިލީހުން މި މައްސަލަ ދިރާސާ ކުރުމަށް ފޮނުވާފައިވަނީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށެވެ. އެ ކޮމިޓީގެ މިއަދުގެ ބައްދަލުވުމުގައި ވަނީ އެ ވަޒީރުންނަށް ރުހުން ދޭން ފާސްކޮށްފަ އެވެ.
ޤާނޫނުއަސާސީގައި ބުނެފައިވަނީ ވަޒީރުންގެ މަޖިލީހަށް ރައީސުލްޖުމްހޫރިއްޔާ އައްޔަނުކުރާ މީހުންގެ ނަންތައް އެމީހުން އައްޔަނު ކުރެވޭ ދުވަހުން ފެށިގެން ހަތް ދުވަހުގެ ތެރޭގައި ރައްޔިތުންގެ މަޖިލީހުގެ ރުހުން ހޯދުމަށްޓަކައި އެމަޖިލީހަށް ހުށަހަޅަންވާނެ ކަމަށެވެ.
