ވަޒީރުންގެ މަޖިލިހަށް ސަރުކާރުން ގެނައި ބަދަލާ އެކު، އަލަށް އައްޔަން ކުރެއްވި ތިން ބޭފުޅުންނަށް ރައްޔިތުންގެ މަޖިލީހުން ރުހުންދޭން ފާސްކޮށްފި އެވެ.
ސަރުކާރުން ގެނައި ބަދަލާއެކު ފޮރިން މިނިސްޓަރު ކަމުގައި ހުންނެވި މޫސާ ޒަމީރު ފިނޭންސް މިނިސްޓަރުގެ މަގާމަށް، ހެލްތު މިނިސްޓަރުގެ މަގާމުގައި ހުންނެވި ޑރ. އަބްދުالله ހަލީލު ފޮރިން މިނިސްޓަރަކަށް އަދި ރައީސް އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެސިޑެންޓް އޮން ޕަބްލިކް ޕޮލިސީގެ މަގާމު ފުރުއްވަމުން ގެންދެވި އަބްދުﷲ ނާޒިމް އިބްރާހިމް ހެލްތު މިނިސްޓަރަކަށް އައްޔަންކޮށްފައިވެ އެވެ.
މިއަދުގެ ޖަލްސާގައި ވަކި ވަކި ވޯޓަށް އަހާފައިވާއިރު މިނިސްޓަރު ހަލީލާއި މިނިސްޓަރު ޒަމީރު އަދި މިނިސްޓަރު ނާޒިމަށް ރުހުންދޭން ފެންނަ ކަމަށް 86 މެންބަރުންގެ އިއްތިފާގު ފާސްކޮށްފައިވެ އެވެ.
އެ ބޭފުޅުންނަށް ރުހުން ހޯދުމަށް ރައީސް ޑރ. މުހައްމަދު މުއިއްޒު ހުށަހެޅުއްވި މައްސަލަ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއިން ދިރާސާކޮށްފައިވެ އެވެ.
