މިނިވަންކަމާ ގުޅޭ ސިޔާސަތުތައް ފިޔަވާ ދެން އަބަދުވެސް އެންމެ އިސްކަން ދެއްވާނެ ދާއިރާއަކީ ރައްޔިތުން ގެދޮރުވެރިކުރުމާއި ބޯހިޔާވަހިކަމުގެ ދާއިރާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެގޮތުން އަންނަ އަހަރުގެ ބަޖެޓު އެކުލަވާލުމަށް ހުށަހަޅާފައިވަނީވެސް، ބޯހިޔާވަހިކަމުގެ މައްސަލައަށް ޙައްލު ގެންނާނެ ބަޖެޓެއްގެ ގޮތުގައިކަން އެމަނިކުފާނު ފާހަގަކުރެއްވިއެވެ.
އެމަނިކުފާނު މިހެން ވިދާޅުވީ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ލުއި ލޯނު ތަޢާރަފުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދުގެ ދަށުން "ހިޔާވަހި ފައިނޭންސް ސްކީމް" މިއަދު ތަޢާރަފުކޮށްދެއްވައި ދެއްކެވި ވާހަކަފުޅުގައެވެ. މި ސްކީމް ތަޢާރަފުކުރީ އިސްލާމިކް ސެންޓަރުގައި ބޭއްވުނު ރަސްމިއްޔާތެއްގައެވެ.
ހިޔާވަހި ފައިނޭންސް ސްކީމްގައި މާލެ ސަރަޙައްދު، އަރބަން ސެންޓަރުތައް އަދި ވަކިވަކި ރަށްތަކަށް ދޫކުރާ ލޯނު ހިމެނެއެވެ. އެއީ އަތޮޅުތަކުގެ ރަށްތަކަށް 1 މިލިއަން ރުފިޔާގެ ކެޕްގެ ލޯނު، އަރބަން ސެންޓަރުތަކަށް ޚާއްޞަކޮށް 3 މިލިއަން ރުފިޔާގެ ކެޕްގެ ލޯނު އަދި މާލެ ސަރަޙައްދުން 6 މިލިއަން ރުފިޔާއާ ހަމައަށް ލޯނު ދޫކުރާނެއެވެ.
އަންނަ އަހަރަށް ހުށަހެޅި ބަޖެޓުގައި ހިޔާވަހި ލޯނު ސްކީމަށް 1 ބިލިއަން ރުފިޔާ އަދި ސަރުކާރުން ހިންގާ އިޖުތިމާޢީ ބޯހިޔާވަހިކަމުގެ މަޝްރޫޢުތަކަށް 1.5 ބިލިއަން ރުފިޔާ ވަނީ ހިމަނާފައެވެ. 1 ބިލިއަން ރުފިޔާ ސަރުކާރުން ބޭންކުތަކަށް މި ސްކީމަށް އިންވެސްޓްކުރިނަމަވެސް، ބޭންކުތަކުން ލޯނު ދޫކުރާއިރު ޖުމްލަ 2 ބިލިއަނާ ހަމައަށް ލޯނު ދޭނެކަމަށް ރައީސް ވިދާޅުވިއެވެ.
ރައީސް ވިދާޅުވީ މި ސްކީމްގައި އެހީ ދޭނީ ބިން އޮވެ ގެދޮރު ނޭޅިވާ މީހުންނަށާއި، މުޅިން އަލަށް ގެދޮރު އިމާރާތްކުރުމާއި، އަޅަން ފަށާ ނުނިމި ހުރި އިމާރާތްތައް ނިންމުމަށް އެހީ ދިނުމަށްކަމަށެވެ. އަދި މިހާރު އިމާރާތް އަޅާ މަރާމާތަށް ބޭނުންވެފައިވާ ފަރާތްތަކަށްވެސް ލޯނު ދޫކުރާނެކަމަށް އެމަނިކުފާނު ވިދާޅުވިއެވެ.
މި ހަފުތާގައި ލޯނަށް ހުޅުވާލުމަށް ހަމަޖެހިފައިވާއިރު، އަންނަ އަހަރުން ފެށިގެން ލޯނު ދޫކުރަން ފަށާނެކަމަށް ރައީސް ވިދާޅުވިއެވެ. މި ސްކީމަކީ ދާއިމީކޮށް ކޮންމެ އަހަރަކުވެސް ހުޅުވާލާ ފުރުޞަތަކަށް ވެގެންދާނެކަމަށާއި، އެކަމަށް ބޭނުންވާ ފައިސާ ކޮންމެ އަހަަރެއްގެ ބަޖެޓުގައި ހިމަނުއްވާނެކަމަށް ރައީސް ވިދާޅުވިއެވެ.
ގެދޮރުވެރި ކުރުމާއި ބެހޭ ވަހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވީ، މި ސްކީމުން މާލީ ތަނަވަސްކަން ނެތުމުގެ ސަބަބުން ދަތިހާލުގައި އުޅޭ ވަރަށްގިނަ އާއިލާތަކަކަށް ފަސޭހަތަކެއް ލިބިގެންދާނެ ކަމަށެވެ. އެގޮތުން ރާއްޖޭގެ އެކި ރަށްރަށުގައި ގެދޮރު ނޭޅި ތިބި ފަރާތްތަކަށް 5% ސަރވިސް ޗާޖެއްގައި ފައިސާ ދޫކުރުމަށް މި ސްކީމް އެކުލަވާލާފައިވާކަމަށް އެމަނިކުފާނު ވިދާޅުވިއެވެ.
ހިޔާވަހި ފައިނޭންސް ސްކީމްގެ ދަށުން ލޯނު ނަގާ ފަރާތްތަކުން އެއްވެސް އިކުއިޓީއެއް ދައްކާކަށް ނުޖެހޭނެއެވެ. ނަމަވެސް ޝަރީޢާ އުސޫލުތަކާ އެއްގޮތަށް ޢަމަލުކުރުމަށްޓަކައި "ނޮމިނަލް ކޮންޓްރިބިއުޝަން" އެއް ދައްކަން ޖެހޭނެކަމަށް ވަޒީރު ވިދާޅުވިއެވެ. އަދި މިނިސްޓްރީން އާންމުކުރާ ރަސްމީ އަގުތަކެއްގެ މަތީން ބަންޑާރަ ގޯތި އަމިއްލަ ކުރުމުގައި އަގު ނެގޭނެ ކަމަށްވެސް އެމަނިކުފާނު ވިދާޅުވިއެވެ.
މާލެ ސަރަޙައްދަށް ހުޅުވާލާ ފުރުޞަތުގައި، ގޭގެ ބެހެނިވެރިންނާއެކު އެކުވެގެން 6-10 މިލިއަން ރުފިޔާގެ ލޯނަށް އެދެވޭނެކަމަށް ރައީސް ވިދާޅުވިއެވެ. ހުރިހާ ލޯނެއްވެސް ދޫކުރަނީ 5% އިންޓްރެސްޓް ރޭޓުގައި 25 އަހަރުން އަނބުރާ ދައްކާގޮތަށެވެ.
