ލޯ-ކާބަން ތަރައްޤީއަކީ މިހާރު އިޚްތިޔާރީ ކަމެއް ނޫން ކަމަށާއި، އެއީ ކޮންމެހެން ކުރަންޖެހޭ ކަމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ރައީސް މިގޮތަށް ވިދާޅުވީ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ)ގެ ދަށުން ބޭއްވުނު 29 ވަނަ ކޮންފަރެންސް އޮފް ދަ ޕާޓީސް (ކޮޕް29)ގެ އަރިމަތީގައި ޗައިނާގެ ޝަންޑޮންގ ޕްރޮވިންސްއިން އިންތިޒާމުކޮށްގެން ބޭއްވި ރަސްމިއްޔާތުގަ އެވެ.
ރައީސް ޑރ. މުޢިއްޒު ވިދާޅުވީ، އިންޓަރނޭޝަނަލް ޒީރޯ ކާބަން އައިލެންޑް އިނީޝިއޭޓިވްއަކީ މޫސުމަށް އަންނަ ބަދަލުތަކާ ގުޅޭގޮތުން ދުނިޔޭގެ ފެންވަރުގައި އަޅާ ފިޔަވަޅުތަކުގެ ތެރެއިން މުހިންމު ފިޔަވަޅެއް ކަމުގަ އެވެ. އަދި މޫސުމަށް އަންނަ ބަދަލުތަކުގެ ސަބަބުން ކުރާ އަސަރުތައް އިތުރުވަމުންދާތީ، ލޯ-ކާބަން ތަރައްޤީއަކީ ކޮންމެހެން ބޭނުންތެރި ކަމެއްކަމަށް ރައީސް ފާހަގަކުރެއްވި އެވެ.
ރައީސް ޑރ. މުޢިއްޒު، ޗައިނާގެ ރައީސް ޝީ ޖިންޕިންގ އަދި ޗައިނާގެ ސަރުކާރުން ތިމާވެށްޓާ ރައްޓެހި އަދި ލޯ-ކާބަން ތަރައްޤީއަށް ކުރައްވާ މަސައްކަތްޕުޅުތަކަށާއި، ދިވެހިރާއްޖޭގެ ތިމާވެށީގެ މަސައްކަތްތަކަށް ދެއްވާ ހިތްވަރަށް ޝުކުރު އަދާކުރެއްވި އެވެ. އަދި 2060 ވަނަ އަހަރާ ހަމައަށް ކާބަން ނިއުޓްރަލް ޤައުމަކަށް ވުމަށް ޗައިނާއިން ކަނޑައަޅުއްވާފައިވާ ލަނޑުދަނޑި ފާހަގަކުރައްވައި، އެއީ ލީޑަރޝިޕްގެ ފެންވަރު ރަނގަޅު މިސާލެއްކަމަށް ވިދާޅުވި އެވެ.
ރައީސް ޑރ. މުޢިއްޒު ވިދާޅުވީ، މޫސުމަށް އަންނަ ބަދަލުތަކާ ގުޅޭގޮތުން އަޅާ ފިޔަވަޅުތަކަކީ އެންމެން ގުޅިގެން ކުރަންޖެހޭ މަސައްކަތެއް ކަމަށެވެ. މިގޮތުން، މޫސުމާ ގުޅޭ މާލީ އެހީގެ ލަނޑުދަނޑިއެއް އެއްބަސްވުމަށް ކޮޕް29ގައި ބައިވެރިވާ ޤައުމުތަކަށް ގޮވާލެއްވިއެވެ.
މި ރަސްމިއްޔާތުގައި ބައިވެރިވެވަޑައިގަތީ ދުނިޔޭގެ އެކި ކަންކޮޅުތަކުން ވަޑައިގެންނެވި ޤައުމުތަކުގެ ލީޑަރުންނާއި، ތިމާވެށީގެ ދާއިރާގެ މާހިރުންނެވެ. މި ބައްދަލުވުމުގައި މޫސުމަށް އަންނަ ބަދަލުތަކާ ގުޅޭގޮތުން އަޅަންޖެހޭ ފިޔަވަޅުތަކާ ބެހޭގޮތުން މަޝްވަރާކުރެވި، ކުރިއަށް އޮތް ތަނުގައި އަޅަންޖެހޭ ފިޔަވަޅުތަކާ ބެހޭގޮތުން މުހިންމު ނިންމުންތަކެއް ނިންމުނެވެ.
